Youq rog guh hong nyaengq gaenq haujlai nanz mbouj ndaej ma ranzcoj lo, miz di siengjniemh lo, ngoenzneix singhgiz roek ndaej- hoengq, cij ndaej ma ranzcoj yawjyawj.

Haeuj cou lo, mbwn sang rumz liengz, mbanjranz bya heu raemx seuq, hoengheiq singjsien, gwnzmbwn mbin miz geij duj fwjhau, lumj naeuz angqcoux daeg lwg de youq baihrog youzlangh nanz mbouj ndaej maranz nei.

Daengz bakmbanj, baez cuengq da yawj bae naj, gyang doengh haeuxnaz baenz lo, henjrwgrwg, lumj naeuz dak baenz benq gim nei, rumz- cou ci daeuj, haeux langh hwnjhwnj roengzroengz, heiq haeux homfwdfwd, sojmiz cungjdwg baenzneix lai sug, gijneix couhdwg feihdauh mbanjranz ba.

Bakmbanj, roen lij dwg diuz roen rin caemh gyouh haenx, henz aen ranzvax gaeuq he miz go mak lwgndae hung ndeu, gwnz de hoij rim lwgndae, aen beij aen mwnz, aen beij aen ndeiyawj, lumj venj rim baenz aen baenz aen daengloengz nei, gaenq henj lo, hawj vunz yawj ndaej doek- meih bae.

O, gou siengj hwnjdaeuj lo, go haenx dwg go makndae laeng Baeuqsam. Seiz lij iq, youq ndaw mbanj dou geij lwg lwgnyez gig iu, ciengzciengz bae caeg gij lwgndae Baeuqsam daeuj gwn, gij saeh haenx lumj ngamq fatseng youq ngoenzlwenz nei. Seizde, dou ngamq ndaej roek caet bi baedauq, ngamq haeuj hagdangz, saedceij gvaq ndaej hoj lai, gwn mbouj imq daenj mbouj raeuj, ngoenznaengz cuengqhag le ciengz dwk gvaq ndaw reih bae ra maenz ngad roxnaeuz lwgdumh daeuj gwn. Bae ra raen maenz ngad le loek hwnjdaeuj mboujguenj baenzlai, baez uet haeuj dinvaq bae couh dwk haeuj ndaw bak haeb gwn, mbangj baez bae caeg gij makmaenj roxnaeuz lwgbieng ranz bouxwnq lij caengz baenz haenx daeuj gwn, vih gij saeh neix dou ciengzciengz deng bouxlaux ndaw mbanj ndaq baenz ma.

Doeklaeng, dou fatyienh moix bi daengz seizcou, go mak lwgndae bak dou ranz henz suen Baeuqsam cungj venj rim lwgndae, seiz lwgndae lij heu, gyoengq lwgnyez iu dou couh yawj hoz ngednged lo, yienznaeuz Baeuqsam dwg ranznden gou, lwgndae laeng de baenz gwn le de lij baen saekdi hawj gou gwn, hoeng gijneix cungj mbouj ndaej yw gij ngah conghhoz gou, ndigah gij lwgnyez iu dou cungj gyaez bae caeg aeu daeuj gwn cij biuhhoz.

Geiq ndaej seizhaenx, gou caeuq Daeghenj、Daeglingz geij boux hujgeiq ciengzciengz bae caeg lwgndae Baeuqsam. Seizde, gij lwgndae Baeuqsam lij heu caengz baenz gwn, dou gaenq yawj hoz lo. Miz baez ndeu dou bae caeg aeu geij aen, aenvih lwgndae lij caengz cug, gwn hwnjdaeuj saepsangsang, Daeglingz naeuz aeu gyu daeuj caemj gwn, hoeng cix mbouj baenz gwn, yienghneix, dou youh daengx caenh he, hoeng ngoenzngoenz cungj byaij gvaq laj go’ndae Baeuq- sam bae guhcaeg yawj gij lwgndae de henj caengz henj. Baeuqsam baez raen dou gvaqbae cungj ndaq naeuz:“Geij lwg fangzbyaiz sou, aen lwgndae lij caengz henj couh naemj mbaet aeu bae gwn lo, danghnaeuz deng gou gaemh ndaej, gou couh euj gij fwngz sou raek bae lo.” Hoeng mboujguenj baenzlawz ndaq, dou cungj swnh de mbouj youq ranz seiz bae caeg gij lwgndae de.

Miz bi ndeu seizcou, gij lwgndae Baeuqsam youh baenz ndaej sej- lwdlwd lo, venj rim gwnz go bae, aen beij aen henj, hawj vunz yawjraen dwk myaiz yawh bae. Ngoenzde, Daeghenj ciuz naeuz:“Gij lwgndae Baeuqsam henj lo, haengjdingh ndeigwn bw, raeuz guhlawz bae caeg aeu geij aen daeuj gwn cij ndaej.” Dou ngaekngaek gyaeuj. Banngaiz, cuengqhag le, bae damqcaz ranz Baeuqsam miz mbouj miz vunz youq ranz, dou geij lwg hujgeiq couh laeglemx mo bae daengz laj go lwgndae Baeuqsam, dawz faexsaux gyongz gij lwgndae henj roengzdaeuj.

（1）