Baihgwnz naeuz gou hoj,

Ra boux goq mbouj miz,

Hawj saek it saek i,

Gouq mingh’iq gaxgonq.

Ndaej ciengx gou mbouj dai,

Nai gyoengq bouxdaeuz gonq,

Mbouj dwg donq song donq,

Ciengx raeuz onj gvaq ngoenz.

Hawj gou ndaej dihbauj,

Baedauq mbouj you gwn,

Docih aen baihgwnz,

Hung gvaq mbwn gvaq deih.

Ndwen ndaej ngaenz ciengx mingh,

Bingh hix dawz bae yw,

Donq gwn noh daengz lw.

Ngoenzfwz bae mbouj dauq.

Miz cwngfuj miz dangj,

Saeh angq daeuj lailai,

Mbouj you caeuz you ngaiz,

Hai bak eu fwen haenh.

Gou lwgda mbouj ndei,

Mbouj rox bae ndaem haeux,

Miz cwngfuj soengq daeuj,

Gaeuq gwn gvaq bi’ndwen.

Cwngfuj baenzneix ndei,

Meiz(miz) ngaenz hawj gou yungh,

Ngoenzneix gou vuenyungz,

Mbouj ndaej lumz dangj aen.

Docih Gungcanjdangj,

Soengq gij angq hawj gou,

Gwndaenj cungj mbouj you,

Mbouj caiq raen hojnanh.

Gungcanjdangj caen ndei,

Bauj gou meiz(miz) gwndaenj,

Soengq hawj caez hawj caenh,

Gou lumz ndaenq lumz haemz,

Aen seiq neix caen ndei,

Meiz(miz) dangj daeuj bangcoh,

Gouq boux gungz boux hoj,

Fangzhwnz loq hix riu.

Baengh cwngfuj guh ndei,

Gou cij meiz(miz) ngoenz angq,

Baengh miz Gungcanjdangj,

Bouxgyanq ndaej vuenyungz.

Mehmbwn hix rox bienq,

Diendeih hix rox fan,

Miz cwngfuj daeuj bang,

Gou baenz ranz baenz riengh.

Duzgaeq cix yungz bwn,

Bouxvunz cix yungz daenj,

Vunzmbanj bouxboux haenh,

Naeuz gou gaenq baenz sau.

Ngoenz gwn ndei daenj ndei,

Vunz lai meiz(miz) saek siengq,

Naeuz gou vunz bienq yiengh,

Bouxboux siengj daeuj gouz.

Vunz haeuj mbanj daeuj cam,

Vunz haeuj ranz daeuj caj,

Baez caeuq gou raennaj,

Mbouj ngah(siengj) dauqbae ranz.

Sai laux baenz aeu yah,

Mbwk geq baenz haq vunz,

Gaxgonq daenj mbouj gwn,

Lwg vunz mbouj haeuj gaenh.

Gou lwgsau cibbet,

Lulet maj baenz vunz,

Miz dangj soengq vuenyungz,

Gou doengz vunz doengz doih.

Seiz miz gwn miz daenj,

Gou hix naemj baenzgya,

Miz lwgmbauq daeuj ra,

Dafangz sim hix baih.

Seiz miz gwn miz daenj,

Gou hix naemj lailai,

Mbouj dwg dawz bae gai,

Bouxsai lawz hix baenz.(11)