Ngoenzneix gouj nyied gouj,

Dieg gou gig angqnaek,

Gyong laz caezgya ndaek,

Geizsaek mbin rim deih.

Ciet neix gingq bouxlaux,

Hauq de dang gaiq bauj,

Ndaw sim geiq hauqdauh,

Causim hix mbouj lau.

Bouxlaux ndithaemh nding,

Aencingz raeuz gaej lumz,

Haex nyouh de fwngz gumz（gop）,

Lumz de baenz fangzbyaiz.

Meh daiqndang cib ndwen,

Raeuz dwen daih ciep daih,

Ciengx lwg caen mbouj ngaih,

Lailai hauqswnh de.

Baenz sai muengh baenz lungz,

Baenz sau muengh fungh mbin,

Gaej vut de lumj rin,

Ndaw sim in bohmeh.

Bohmeh beij bya sang,

Dangq fwn rumz mbouj lawq,

Gim ngaenz nanz ndaej cawx,

Gaej hawj de hojlienz.

Duzga rox fanbwnq,

Hauqswnh aeu geiq ndi(ndei),

Yiengz gvih meh gwn cij,

Lij iq raeuz couh rox.

Gwnzbiengz yienghyiengh ak,

Bak saeh hauq byaij gonq,

Gamjaen gaej hawj son,

Faex gon（dingz） rumz gag doengh.

Ngoenzneix geij coenz fwen,

Bi’ndwen lumj raemx vaij,

Gouj nyied gouj ciet daih,

Aeu lai gingq vunzgeq.