11 nyied, Aen Ban Fazgvanh Yenzsiuh Guekgya Cingq Hwngfat youq Guekgya Fazgvanh Yozyen gawjbanh. Baez yenzsiuhbanh neix dwg gij cungyau gijco gvancez guhsaed Dangjcunghyangh gvendaengz youh ndei youh vaiq hwnqguh hwngfat hong baijbouh“it rangh it loh”. Yenzsiuhbanh gungh guh cibseiq ngoenz, 35 boux fazgvanh daj Aihsaingozbijya、Luz- vangdaz、Yozdan、Menjden、Majwjdaifuh、Swh- lijlanzgaj、Gihlijbahswh、Bahbuyasinhgijneiya、Danghgyah、Sazmohya daengj 10 aen guekgya daeuj neix camgya yenzsiuh. 11 nyied 8 hauh, gyoengq yozyenz yenzsiuhbanh daeuj daengz Gvangjsih Nanzningz. Guekgya Fazgvanh Yozyen Gvangjsih Fwnhyen guh aen hoih ciudaih, cingj Gvangjsih Gveicinhingh Vwnzva Yisuzdonz Cuzyingj Beixnuengx Gohdui hawj gyoengq hek guekrog biujyienj vwnzyi cezmuz. Gyoengq canghfwen cingsaenz gvaekgvaek, singfwen goksadsad, caenhcingz caen’eiq aeu Vah- cuengh Vahgun Yinghyij sam cungj vah bae angq ciengq fwen goeknduj Bouxcuengh raeuz, lumjbaenz《Fwen Coux Hek Bouxcuengh》《Fwen Gingq Laeuj Bouxcuengh》《Docih Lo》 daengj, yienjok lwgminz Mbanjcuengh raeuz dak hek gig daegbied. Gyoengq hek guekrog caeuq bouxhek daj Baekging daeuj haenx haenh ndei haenh ak.
(Boz Yizdungz/薄一童)