11 nyied 18 hauh dwg ngoenz Fuconh Yauzcuz Swciyen laebbaenz 40 hopbi, yienh de yaek youq 18 hauh daengz 19 hauh youq yienhsingz guh hozdung angqhoh. Seiqcib bi daeuj, Fuconh Yauzcuz Swciyen daiqlingx vunzlai gak minzcuz doxgiet buekguh、haenqrengz baenaj, guh ok cingzcik ronghsag. Bi 2022, gij swnghcanj cungjciz daengx yienh miz 119.53 ik maenz ngaenz, beij bigwnz lai 5.8%, bi 2012 ngamq ndaej 46.69 ik maenz ngaenz, neix lai gvaq bi 2012 boix ndeu. Yienh de aeu ndaej “aen yienh guhyiengh guh minzcuz doxgiet daengx guek”daengj 39 aen ciengj guekgya gaep, vunzlai gak minzcuz ndaw yienh gag roxnyinh ngoenz ndei gvaq ngoenz.

Vihle guh ndei hozdung, Hocouh Si caeuq Fuconh Yauzcuz Swciyen gonqlaeng laeb aen cuj hoh laeb yienh, caemhcaiq guh fueng’anq, seizneix gak cungj hong gaenq bwh ndei. Fuconh yaek aeu aen hozdung neix langhbaij ginghci hwngfat、aenbiengz onjdingh、minzcuz doxgiet、lwgminz an’onj、guhhong sim’angq, mboujduenh doidoengh aenbiengz ginghci hwngfat youh ndei youh vaiq, hwnqguh “Fuconh gyaeundei”.

(Liz Yozliengz/黎学良 Yangz Yij/杨 羽)