Mbouj dauq dieg neix youq,

Couh mbouj siengj baenzlai,

Bae ciengx namh ciengx raiz,

Dai bae lumz hojnanh.

Mbouj dauq dieg neix youq,

Couh nyienh bae ciengx rum,

Goet naeuh dieg namh um,

Cij lumz hoj lumz heiq.

Lix hix mbouj miz naj,

Nyienh gvaq lawz bae gaenz,

Mingh yak doek ndangsaenz,

Da raen mbouj gvaq ciuh.

Mbouj rox gvaq gizlawz,

Youq ndaw ranz baenqcienq,

Lwgda mbouj lingzbienh,

Ienq mingh youh ienq hoen.

Gou vunz lix dangq dai,

Hai bak mbouj miz vah,

Caen naemj bae diuq dah,

Mbouj naemj youq lajmbwn.

Mboujmiz ngaenzcienz sawj,

Vunz hawj gou cix aeu.

Ngaenz coq roengz daehbaeuz,

Ndaw simdaeuz gig heiq.

Miz boux soengq ngaenz hawj,

Sawjyungh gou roxnyinh,

Ndaej gwn aendungx imq,

Gou roxnyinh baenz ciuh.

Yahnax miz hawj daenj,

Yahbaj faen hawj gwn,

Yienghyiengh goq lumj vunz,

Hwnzngoenz mbouj youheiq.

Boiz yahnax mbouj gvaq,

Doiq yahbaj mbouj daengz,

Gyoengqde dai haeuj yaem,

Boiz mbouj daengz saek yiengh.

Boux hawj neix hawj haenx,

Cingz yaenq ndaw simdaeuz,

Ndiep ngaek caiq ndiep ngaeu,

Aeu maz boiz ndaej hwnq.

Vunz bae daengz diegrog,

Ok hong cix ndaej ngaenz,

Vunz lwgda yawjraen,

Ndaej ngaenz cien ngaenz fanh.

Vunz rox bae laeuq ngaenz,

Ndaej baenz cien baenz fanh,

Gou gwn youq ndaw mbanj,

Mbouj gamj senj fajdin.

Gou raiz mbaw baugau,

Gyau bae daengz ndaw yangh,

Naeuz gou gya mbouj dangq,

Muengh dangj ndaej hai aen.

Baugau bae geij ngoenz,

Vunz roengzdaeuj daengz mbanj,

Raen gou hoj youh gyanq(gungz),

Bouxboux danq heiq raez.

Yanghfuj hawj giuci,

Miz haeux miz buhvaq,

Ciuh vunz raez baenz dah,

Daengq gou aeu gvaq ndei.

(10)