Mbanj gou dwg youq goengq bya faex heu raemx loeg ndeu, daengx mbanj miz ngeihcib ranz baedauq. Aen hanghceij ndaw mbanj daj dinbya iet daengz gyaeuj mbanj aen daemzbya. Song rangh ranz youq song mbiengj ei diuz loh baiz ndaej cingjcingj caezcaez, couh lumj gyoengq hagseng cingq lieddoih caj lauxsae roengz minghlingh nei. Aen daemz najmbanj moix ngoenz cinghcingh yawj gij raemx daj diuz mieng menhmenh lae coh doenghnaz najmbanj, cici cetcet, mbouj dingz mbouj duenh.

Youq ndaw singz youq nanz le, gou cungj maij do lwg rag gvan bae mbanjranz cumhcumh cetcet, nyouq gij namhheiq mbanjranz, dingq gij sing mbanjranz rwz sug sim sug haenx Dingz din youq henz mieng najmbanj, gou nyinhnaeuz diuz mieng cingq yiengq gou gangjgangj doengh aen goj seiziq ndaw mbanj.

Henz Raemx·Sim’angq

Seiziq, seizhah ndit ndat heiq hwngq, ndaw mbanj hix dwg ceiq hoenghhwd. Ngoenz couhmoz, bouxlaux youq ndaw doenghnaz guh hong, dou lwgnyez bang yawj vaiz. Seiz ndit haenq, dou couh yien duzvaiz daeuj ndaw daemz byok ndang. Mingzgangj dwg duzvaiz byok ndang, gizsaed dwg dou gyoengq lwgnyez aeu dajcaemx youzraemx. Yawj! Doengh boux dajcaemx fei haenx lumj duzbit nei, ndaem hwnj ndaem roengz, seiz mbouj seiz daj baihneix ndaem raemx, youh daj baihhaenx mauh gyaeuj hwnjdaeuj, sing riu sing yuq hoengh doh ndaw daemz gwnz daemz. Baezbaez ndaw daemz lwgnyez lai gvaq vaiz, sing’angq beij haw hoengh. Couhsuenq dwg ngoenz doegsaw, daengngoenz yaek doek bya, sing cung hagdangz ngamq yiengj, gyoengq nyezdoih lumj bit iq ngamq daj ndaw roengq langh okdaeuj nei mbin ok hagdangz, cigsoh buet bae henz daemz. Yaephe henz daemz cungj dwg gij sing hemq sing yuq. Doenghboux din vaiq fwngz vaiq, yaepyet couh duet ndei buhvaq “bumh” diuq roengz raemx bae, raemx va sinz daengz gyang mbwn, dujduj “vahau” hai rim ndaw daemz; hix miz boux ei bak daemz byaij bae henz mieng ra bya ra nyauh; doenghboux mbouj siengj roengz raemx, cix vid gavaq soengz dwk, caenh soengz youq dindaemz dinmieng yawj doenghboux doengzdoih guhcaemz guh’angq; lij miz mbangj youq henz mieng fan rin ra baeu bw sae. Henz mieng ndaw daemz, seiz mbouj seiz cienz daeuj sing yuq goksadsad.

Ndaw Doengh·Saeh’angq

Doenghnaz najmbanj, mboujdanh ciengx le daengx mbanj vunz, lij louz miz saeh’angq seiziq ceiq nanzlumz dou. Doenghnaz ndaem song cin haeux, gvej itmiuz seiz, bouxhung coemj gvej haeux, dou nyez iq youq ndaw doengh caij boengz lah. Gaej gangj, seizhaenx laj din caij boengz, ndaw bak boq goekfiengz, caen hawj vunz nanzlumz a! Bouxhung youq ndaw naz gvej haeux, seiz mbouj seiz fatyienh miz rongz roeggyaen, ndigah dou youh dwg gip gyaeqroeg, youh dwg gyaep roegmeh gaeb roeg hung, ndaw doengh sing riu sing buet, ndaw doengh hoenghngaungau.

Seizhaenx haeux souhaeuj mbouj suenq ndei, dou lwgnyez bae ndaw naz, cawz le lah boengz gyaep roeg, lij aeu bae liemx haeuxrieng. Doengh gaiq naz gvej haeux gvaq, bohmeh cungj daengq dou bae liemx doengh rieng haeux dinj liemzseu gvej mbouj deng haenx. Geiq ndaej miz baez ndeu, gou caeuq go’ngeih bae baih nazhung liemx haeux, liemx ndaej gaem haeuxrieng naekgywggywg, fatyienh rongz roeggyaen youq ndaw fiengz, dou couh bae gaeb roeg gip gyaeqroeg. Go’ngeih din mbaeu fwngz mbaeu byaij gvaqbae, byaij gyawj rongzroeg, de song fwngz baez ca, coemj ndaej duz roegmeh ga raezyatyat, de din soengz ndaw boengz mbouj maenh, duzroeg youh deng buet deuz lo, loengh ndaej go’ngeih youh ngengngeng cengjcengj bae gyaep roeg, doeklaeng roeg gyaep mbouj ndaej, loengh ndaej daengx ndang lumj vaiz youq ndaw boengz gyuek ndang ngamq hwnjdaeuj nei. Seizneix naemj hwnj aen ciengzmienh haenx, lij lumj cingq youq dangqnaj, lij yinx ndaej gou riu ndaej dungxgienj bae. Gvej haeux ngeihcin couh engq mizyinx lo. Heiq liengz mbwn gvengq, seiz haeuxhenj, raemx siuj naz hawq, ndigah hong sou haeux cungj dwg daengx ranz hungsaeq “ok congh” camgya. Dawz gak cungj hongdawz: Liemzseu、dajgokgei、hanzsoem、gokveiz、daehnaengngwz, youq ndaw doenghnaz guh ndaej hoenghhwdhwd. Bouxlaux faen hong ndei, dou couh gak boux haenqrengz guh ndei faenh hong cihgeij. Hong sat haeux hwnj ci, gyoengq nyezsai couh hainduj bae ra congh nou lo. Gyaep nou ok congh ceiq mizyinx: Mizseiz aeu hoenz oenq, mizseiz aeu raemx cung, cijaeu loengh ndaej duznou mbouj miz giz ndoj buet ok congh daeuj, dou couh sim muenx eiq cuk hai bak daeh caj nou gag ndonj haeuj daeh lo.

Ndaw Mbanj·Feih Gvaq Cieng

Seiziq miz lah miz angq, lijmiz gij gwn hawj dou ceiq simsiengj lo. Ceiq hawj dou ngoenz siengj hwnz ngeix couh dwg gvaq cieng lo. Seiziq gvaq cieng, mboujdanh mizyinx caemhcaiq mizfeih. Moix bi yaek daengz cieng, gyoengqvunz bae rog guh hong couh faenfaen dauq ranz. Aen nienzdaih gwndaenj cengqgengz haenx, ndwencieng cix ndaej gej lom saivaq nyaemh gwn daih gwn.

Youq haemhndaep, ranzranz nyaengq bwh caeuz haemhndaep: Gaj gaeq cien bya, bauq ngaizboeg……Lijmiz swiq rong cimq haeuxnah, bwh daengz ngoenz coit suek faengx ciep bimoq. Baiq yieng cit gvaq bauqrengh, daengx ranz hunghung iqiq angqangq yangzyangz humx youq henz daiz gwn ndaej vansub gangj ndaej hoenghhwd. Feih gvaq cieng cij miz angqyangz: Caenhguenj gwn imq lah ndei, cijguenj sim’angq simvuen, mbouj heiq mbouj you.

Aen mbanj iqet youq ndawsim, mboujguenj ngoenz byaij ngoenz youq, de cungj dingh youq ndawsim gou. Seiq ciet miz vahoengz mbaw heu, va rang mak van; seiqvunz huzndei gaenxgiemh, vunz dangq vunz baengh. Danghnaeuz ndwenngoenz gvaq ndaej menh, aenvih va rang lij raezrangh, ngoenz sou lij mizmuengh. Seizneix dauqngeix ngoenz youq ndaw mbanj, yienznaeuz gek miz cien bya fanh raemx, hoeng gou cungj muengh gyoengq doengzdoih ndaejhoengq lai dauq ranz lwnhlwnh goj, gangjgangj gij dauqngeix gyaeundei doengh- baez, hawj raeuz simsangj simvuen.