Hujgeiq bae dajgoeng,

Doxdoeng baengh dienhvah,

Gou cix naemj bae gvaq,

Dalah(yawj) mbouj raen ngaeuz.

Raen hujgeiq okdou,

Aen sim gou hix cak,

Ienq mingh gou daiyag,

Gag ndaenq raemxda roengz.

Gouh haiz lajdin vaih,

Fouz vunz daiq bae aeu,

Hujgeiq langhnaeuz youq,

Daiq raeuz bae haw cawx.

Buh sik mbouj rox neuj(nyib),

Heuh bouxlawz daeuj bang,

Hujgeiq mbouj youq ranz,

Gou ngoenz fanz geij sauh(baez).

Hujgeiq bae hamj geuq,

Caiq heuh cix mbouj raen,

Gou muengh mbwn yawj ndaen,

Mbouj raen vunz dauqcoh.

Miz diuz roen hawj gou,

Mbouj daej baenz yienghneix,

Doengzdoih caemh hujgeiq,

Vunz okbae ra ngaenz.

Ngoenz maz cij lumz haemz,

Haemh maz cij lumz heiq,

Ngoenz maz lumj hujgeiq,

Cij mbouj ngeix baenzlai.

Lix hix mbouj baenz gya,

Git boux gya boux hoh,

Geq mbouj miz boux goq,

Dai gyang loh saek ngoenz.

Gag youq gag mbouj baenz,

Daraen fouz vunz lingx,

Laux mbouj miz boux gingq,

Mingh mbouj miz giz baengh.

Rox seng daeuj mbouj baenz,

Nyienh dai gaemz dungxmeh,

Gou yied bi yied geq,

Bohmeh sim hix genz.

Bohmeh heiq lailai,

Lau gou dai lanzcienh,

Vunz bae youx doxlienh,

Gou baenqcienq gyang ranz.

Gou ndaej nyi vunz gangj,

Miz gyadangq cij bengz,

Mbwk mbouj youq dieg seng,

Goet cij bengz lumj doih.

Mingh gou dwg mingh naeuh,

Seng daeuj baenzneix ca,

Saek ngoenz mbouj baenzgya,

Gik lwgda doengzdoih.

Naeuz geq cix okhaq,

Caj boux aeu mbouj meiz(miz),

Gou lwgda mbouj ndei,

Mbouj meiz(miz) bouxlawz nyienh.

Miz bouxmoiz haeuj mbanj,

Dawz raeuz bae damqcaz,

Song sam ngoenz cix ra,

Naeuz dafangz hojciengx.

Miz vunz daeuj daengz ranz,

Cam gou baenzlawz yiengh,

Rox lwgda mbouj siengq,

Vunz mbouj nyienh ciengx raeuz.

Gou naeuz mbouj bae haq,

Gag gvaq ciuh hix baenz,

Mbouj gangj vunz cix raen,

Guh mbouj baenz saek yiengh.

Mbouj dwg gou mbouj haq,

Mbouj dwg bwnda sang,

Vunz rox gou dafangz,

Doiq bae ranz vaiqdangq.(8)