Ngoenzneix dwg ngoenz singhgiz, nanzndaej yietnaiq youq ranz, gou dajsuenq daengx ngoenz youq ranz mbouj okdou, cuengqsoeng ndok ndang.

Gyanghaet cib diemjcung, gou gamz ienhom, gikrairai ing youq gwnz daengq sahfaz, dingq gij yinhyoz lajmbanj daj ndaw yinhyangj cienz okdaeuj, ndeidingq youh daengx ndang soengcwdcwd.

“Dunghdungh …… dunghdungh ……” Gou cingq simmaez dingq ciengqgo, sawqmwh dingqnyi sing roq dou. “Dwg bouxlawz daeuj ni?” Gou doq naemj doq byaij bae haidou.

Boux ranznden Yahsam, de raemxda loenq- byapbyap ndwn youq bakdou gou. “Yahsam, ngoenzneix baenzlawz ndaejhoengq daeuj ranz gou youz ne, vaiqdi haeuj ranz daeuj ba……”Gou ganjgaenj heuh de haeuj ndawranz daeuj naengh.

Gangj daengz Yahsam neix, de dwg lajmbanj boux ranznden gou, gaenq ndaej roekcib bet bi lo. Daeglwg de youq ndawsingz guh seng’eiq, bouxvunz simsoh youh rox guhsaeh, geij bi gvaqbae, de youq ndawsingz cawx ndaej aen ranz sanghbinjfangz ndeu, youh caiq caeuq gou baenz boux ranznden dem.

Daeglwg Yahsam gig hauqswnh, cawx ranz moq le, couh bae ranzcoj ciep daxmeh daeuj ndawsingz caeuq de gwnyouq. Ciuhvunz Yahsam cungj dwg youq lajmbanj gwndaenj majhung, baengh fajfwngz gaenxguh de youq ndaw reihnaz lajmbanj roengz- rengz ganqguh cij ndaej ciengx daengx ranz. Seizneix de geq lo, mbouj ndaej guh hong naek, hoeng daengz ranzmoq ndawsingz le lij daengx mbouj roengz daeuj.

Daeujdaengz ranzmoq, Yahsam dauqcawq byaijbyaij yawjyawj, yawj siujgih baihndaw miz mbouj miz gizlawz ndaej ndaem go doxgaiq. De raen siujgih aen com he, miz di dieg iq ndeu mbouj miz vunz leix, gaenq hwnj go rum go haz lo, di dieg iq ndeu, ndaem mbouj ndaej haeuxyangz, hix ndaem mbouj baenz go duh, Yahsam couh dawz gij dieg iq neix cingjleix ndei le, aeu daeuj ndaem byaekheu.

Mbwn raeuj fwn swnh, gij byaekheu Yahsam baenz gwn lo, de couh soengq hawj gyoengqdou geij boux ranznden. Bingzseiz ranz lawz nyaengq lai mbouj miz seizgan daiq lwgnyez le, de cungj rox bae bang gyoengqde ciuqgoq it ngoenz buenq ngoenz.

Yahsam dwg siujgih dou boux vunzgeq ceiq ndei ndeu, ngoenzneix gou yawj gij saeknaj de gig youheiq, wnggai dwg bungz daengz gijmaz nanzsaeh lo.

Yahsam naengh roengzdaeuj, gou ndenq boi raemx ndeu hawj de, raen de naj nyaeuqnyeunyeu, gou cam:“Yahsam, yawj saeknaj mwngz yienghneix, dwg mbouj dwg miz gijmaz nanzsaeh lo?”

“Daeghoz a, dwg miz gienh saeh he hawj gou gwn mbouj baenz ninz mbouj onj, gou ra mwngz, naemj hawj mwngz bangbang gou.” Yahsam saenzdidi doiq gou gangj, lumj yaek daej oksing bae.

“Yahsam, raeuz cungj dwg vunzsug lo, miz gijmaz mwngz couh gangj ba, ndaej bang gou caenhrengz bae bang mwngz, cuengqsim.” Gou nai de naeuz.

“Dwg yienghneix, ranznden gou Siujlij, dwg vunz lajmbanj raeuz, gij neix mwngz rox lo, gou caeuq daxmeh de dwg baengzyoux ndei, ciengz- ciengz doengzcaez bae youz doxbyaij. De dang hwnj daeuz hung le, ranz dou hix miznaj haujlai, hoeng duenhgonq, dingqnyi de ngaiz gijveij dawz bae lo, naeuz aeu ciepsouh saemjcaz diucaz, dingqnaeuz aeu ngaenz vunz. Gou ciengzciengz soengq byaekheu bae hawj de, dwg mbouj dwg hix famh saeh lo? Siujlij deng daiq bae gvaq le, gou itcig gwn mbouj roengz, ninz mbouj ndaek, mwngz naeuz yienghlawz guh cij baenz a?”

“Yahsam, bingzseiz sou guhdoih byaijdoengh, doxbang doxsoengq di byaekheu roxnaeuz gijmaz doxgaiq bingzciengz yungh, caeuq famh saeh aeu ngaenz vunz mbouj miz gijmaz gvanhaeh ne, mwngz cuengqsim ba.”

Gou naeuz:“Dam aeu ngaenz vunz, dwg boux guhhong guekgya aeu gij hong bonjndang de daeuj ciemq bienhleih, dam gwn, caeg aeu, luq aeu roxnaeuz yungh gij famhsaeh wnq daeuj ciemq aeu gij doxgaiq goenggya, aeu gij ngaenzcienz bonjlaiz mbouj dwg duh de haenx, vih bouxwnq maeuz aeu leih’ik daengjdaengj.”

“Yahsam, bingzseiz mwngz soengq di byaek he hawj Siujlij, dwg mwngz gagnyienh soengq hawj de, mbouj dwg Siujlij cam mwngz aeu, de mbouj dwg daegdaengq ciemq aeu gij byaek mwngz, yienghneix mbouj dengsaeh. Mwngz soengq byaek hawj de, gij byaek neix dwg bingzciengz ndwenngoenz raeuz yungh, mbouj dwg gimngaenz roxnaeuz gij doxgaiq dijcienz, mwngz hix mbouj gouz de, yienghneix mbouj miz gijmaz saeh ne.”

“Dwg yienghneix a, baenzneix gou couh cuengqsim lo. Hojsik lo, Siujlij boux vunz baenzlai ndei, dang hwnj gizcangj le, baenzlawz couh famh gij saeh neix a. Lij iq vunzgeq couh son raeuz, mbouj dwg doxgaiq swhgeij mbouj ndaej aeu, yienghlawz majhung le, dang hwnj bouxdaeuz lo, couh dawz gij dauhleix neix lumz bae a. Ae! Gij doxgaiq guekgya hix gamj aeu, caen dwg mbouj wnggai a!”

“Hojlienz daxmeh Siujlij lo, daj Siujlij lij iq, boh de couh deng bingh naek dai bae lo, lw daxmeh de boux vunz ndeu ciengx daengx ranz vunz, dauqcawq ciq ngaenz hawj geij boux lwg doegsaw, Siujlij bizyez le, miz gij hong onjdingh, lij dang hwnj gizcangj dem, mbouj yungzheih maenh’ak gvaq vunz lo, seizneix youh ok saeh yienghneix.”

“Aeyo! Mbouj rox daxmeh Siujlij baezlaeng yienghlawz gvaq saedceij a!” Yahsam danqheiq mbouj dingz.

Yahsam doq gangj raemxda doq doekbyapbyap, aiq dwg aenvih hojsik Siujlij, aiq dwg aenvih hojlienz daxmeh Siujlij, roxnaeuz aenvih gij saeh wnq. Dingq gij sing danqheiq Yahsam, gou yawj ok conghcueng baihrog bae, mbwnheiq lij dwg cinghriri, seiz mbouj seiz mbin gvaq geij duj fwjndaem, caj fwjndaem sanq bae, mbwn lij caiq ronghcakcak okdaeuj.