Daengngoenz baihdoeng hoengz youh

moq,

Ciuqrongh lajbiengz dangj dawz dox;

Buek dai buek leix ndaej fanndang,

Bouxminz miz fuk mbouj lumz dangj.

Bak bi gaxgonq,

Lajbiengz mbouj rongh laep lai;

Ienq lix ienq dai,

Mbouj miz haeuxngaiz gwn imq,

Bouxgungz deng gvat,

Guek raeuz mbouj ak deng hangz;

Gvejdieg mbouj cam,

Gyoengqde lij ram ngaenz dauq.

Mboujmiz nazreih,

Lwgminz gwnheiq hix dai;

Caizcawj gwnngaiz,

Bya noh gwnz daiz baij doh.

“Ruz hoengz” hailoh,

Caenh vih bouxhoj vuenyungz;

Cungj mbouj aeu goeng,

Gyoengq boux gunghnungz gaengaenj.

“Ndoi” deng nyoengxlaemx,

Lajbiengz mbouj raemh minz vuen;

Vunzlai eufwen,

Gij va ndaw suen engq hoengh.

Raeuz youq caengz onj,

Guek wnq couh ndonj daeuj hangz;

Raih ndaej gwn rang,

Dauqlaeng aenndang nanz bauj.

Dangj begfwngz cauhgya,

Caez damqra,

Caenh caenca saedguh;

Mboujlau gwn haemzhoj,

Raeuz cungj rox,

Hawj guekcoj fouqgiengz.

Dangj mboujlumz simnduj,

Ndang doek noh,

Vih bouxhoj hairoen;

Daihgya bouxboux raen,

Guh ndaej baenz,

Dangj raeuz caen hungmbwk!

Guh gaijgwz hailangh,

Raeuz simsangj,

Guek wnq angq lumj gaeng;

Rumzcin ci daeujdaengz,

Raeuz maijhaengj,

Va hai laengz mbouj ndaej!

Ginghci ndaej fazcanj,

Vunzlai angq,

Bouxboux danq dangj raeuz;

Gwndaenj cungj mbouj you,

Baez okdou,

Naengh cinou (ci’nyaeq) cwxcaih.

Boux guh reih guh naz,

Fwngzswix vaz,

Cik fwngzgvaz hix vax;

Mbouj daengj hix mbouj caj,

Gannanz gvaq,

Ciuq miz saj raek hoz.

Dangj gyaez boux ranzgungz,

Caenh ietfwngz bangcoengh;

Danghnaeuz youq ndaw rungh,

Dangj hix cungj siengj daengz.

Mauhgungz cungj vut caez,

Vunzlai maijgyaez dangj;

Bouxboux cungj simsangj,

Youh caemh angq yamqdin.

Deng swhyienz caihaih,

Dangj mbouj gaij codaeuz;

Lajbiengz gyoengqvunz naeuz,

Vunz guek raeuz miz fuk.

Binghraq gyuek lajbiengz,

Daengx guek riengz dangj byaij;

Binghraq deng hoenxbaih,

Bouxboux maij dangqmaz.

Binghraq gyuek lajbiengz,

Guek wnq deng gyuek naek;

Gouz bang bau hozgaek (hozgyaenh),

Dangj sikhaek anbaiz.

Guh“it rangh it loh”,

Souh’ik doh cienz giuz;

Gyoengq guekgya angqriu,

Dap ndaej giuz fazcanj.

Dangj simsoh huzndei,

Guek wnq caez daeuj gap;

Youh mizmbei dawzrap,

Mbouj luenhngab saek coenz.

Caeuq guekak bingzyawj,

Han sing “mbouj” ndi saenz;

Enj aek byaij hwet baen(soh),

Heuh de saenzdedded.

Swnghdai leixniemh moq,

Mbouj gangj boq dwg caen;

Mbouj gvej haz dwk fwnz,

Singdanq rwenz ndeidingq.

Vih gemjnoix mokfaenx,

Dangj heuh gaenx gemjbaiz;

Mbwn bienq lamz simhai,

Haemh doek raiz va angq.

Bya heu ranzmbanj gyaeu,

Raemxdah lou(lae) gvaq mbanj;

Bya youq dah gag angq,

Bouxyouz danq mbouj dingz.

Yinx raemx haeuj cien gya,

Raemx gag ma mbouj duenh;

Seiz rap raemx gaenq duenj,

Vunz naeuz habsuenq raeuh.

Guh saenqhwng lajmbanj,

Byawz hix gangjnaeuz ndei;

Sezsih lienhndang caez,

Ndangdaej ndei danq dangj.

Guh mieng sam mienh lwenj,

Raemx ma swnh habhoz;

Guhnaz veh lamzdoz,

Go demsou eu hoengh.

Dangj guh fanj nduknaeuh,

Mbouj dwg yaeuh vunzlai;

Lwgminz cungj simhai,

Gwn haeuxngaiz miz feih.

Riengz dangj mbouj doxbiek,

Gwn lwgbiek hix gaen;

Dangj hawj minz gij aen,

Boiz baenz ciuh mbouj liux.

Hai da yawj bae gyae,

Bi dem bi meiz(miz) muengh;

Raeuz gak cuz beixnuengx,

Rox mizmuengh goekgaen.

Gwn miz feih, ndaej youq ndei,

Gwnz roen siujgangh caezcaemh bae,

Caez buekguh, guek fouqmeiz(miz),

Buekmingh haenqguh mbouj cizngeiz

(ngeizvaeg).

Dangj yawj gyae, minz ngonz gyae,

Riengz unq din dangj caez yamqbae;

Sim byaengq hai, caemh huzndei,

Bya heu gyaeundei raemx rij lae.

Va gyaez rwi, rwi gyaez va,

Caen dwg lumjbaenz lingz caeuqbya;

Ma maij cawj, cawj haengj ma,

Dangj minz couh lumj raemx caeuq

bya.

Minz gyaez dangj, dangj gyaez minz,

Daengx guek bouxboux siuyingzyingz

(najriu).

Dangj yawj gyae, ceiq yinghmingz,

Vunzlai riengz dangj byaij mbouj dingz.