Bohmeh seng ok ndang,

Sim caemh fanz caemh heiq,

Vunz seng lwg fukgveiq,

Raeuz feiq uk feiq sim.

-

Boh yied ngoenz yied geq,

Meh yied ngoenz yied roz,

Lau gou dai gyang loh,

Ra bouxgoq mbouj doiq.

-

Bohmeh geq mbouj ndaej,

Hawj bouxlawz ciengx raeuz,

Ngeix caen ndaenqngaeu’ngaeu,

Ngeix daengz sim raeuz luenh.

-

Cog bohmeh mbouj youq,

Bouxlawz bang ra gwn,

Mboujnyienh youq lajmbwn,

Lau git vunz git doih.

-

Mwh bohmeh lij lix,

Gou mbouj ngeix geijlai,

Bohmeh baez naeuz dai,

Lai gwn heiq geij boix.

-

Bohmeh guh sinhoj,

Vihliux goq ndang raeuz,

Baeg hix mbouj nyaekngaeu,

Mbouj hawj raeuz lanzcienh.

-

Mbouj miz ngaenz ndawdaeh,

Daeqhaeuj ndoeng bae ra,

Vat rag faex rag nya,

Dawz ma vuenh ngaenz yungh.

-

Ngaenzcienz youq gungx nya,

Ra okdaeuj dwk daeh,

Yienznaeuz baeg mbouj ndaej,

Daeq gvaq rungh gvaq banz.

-

Lauheiq gou dungxiek,

Buet gvaq giz youh giz,

Mbouj lwnh miz mbouj miz,

Gabi sieng hix buet.

-

Gou goet mingh mbouj ndei,

Meiz(miz) maz boiz bohmeh,

Gyoengqde ciengx lwg geq,

Bohmeh mbouj raen rengz.

-

Mbouj gangj ndaej gwn rengz,

Raen gou bengz doeng angq,

Seng gou daeuj ienqdanq,

Ganq mbouj dij saek faen.

-

Bi daihbet daihgouj,

Bouxboux bae doegsaw,

Gou youq ranz baihndaw,

Gigcaw(heiq) daej mbouj duenh.

-

Raen vunz bae hagdangz,

Gou sim angq lailai,

Aen hoz haenz yaek dai,

Hai din naemj bae riengz.

-

Boh naeuz cih saw dij,

Hix nyienh hawj gou bae,

Hojsik byaij mbouj ndei,

Bae mbouj miz boux daiq.

-

Caj daengz nuengx haeuj hag,

Gou gag angq ndawsim,

Baedauq miz boux cing(yien),

Angq lumj ndaej gimyawh.

-

Gou rox cih saw dij,

Caeuq vunz bae hix saengz,

Mboujmiz daiz inglaeng,

Hix bae saengzlele.

-

Gou youq baihrog ndun(ndwn),

Gaex rin hung daeuj naengh,

Aeu rin daeuj guh daengq,

Naengh dingq vunz hwnjdangz.

-

Boux lauxsae sim ndei,

Cing gou haeuj bae hag,

Dingqnyi vunz hai bak,

Gou gag geiq ndawsim.

（5）