Bohmeh gou seng dou sam beixnuengx. Daj dou iq daengz hung, daxboh gou caenndang son’gyauq dou guhvunz guhsaeh, gangj dauhleix hawj dou saenqfug, mbouj dub mbouj ndaq, de baenzlawz guh, dou couh baenzde hag. Daxboh gou ciengzseiz naeuz, guh vunz youq lajmbwn, itdingh aeu roxsoq, gaej hawj vunz naeuz raeuz mboujmiz gya’gyauq.

Daxboh gou lij iq seizhaenx, buz gou baenzbingh naek, mbouj geijlai nanz couh dai lo. Daxboh gou doeg cuhcungh sat couh deng maranz, caeuq goeng gou doih guhhong, ciengx song boux nuengxsai. Aen ranz mboujmiz bouxmeh, boh gou couh lumj bouxmeh ityiengh, sinhoj dwg- rengz hawj de roxsoq vaiq, beizheiq swnhheiq, rox nyiengh vunz, rox ndiep vunz.

Son’gyauq lwg gienh saeh neix, daxboh gou soqlaiz mbouj gaemfaex bangx, hix mbouj maenxda, engq mboujyungh gangj gyoengqdou lo. Dou danghnaeuz guh saeh loeng, raen daengz aen lwgda daxboh, couh ngaemgyaeuj roengzdaeuj nyinhloek lo.

Gou doeg siujyoz seiq nienzgaep mwhhaenx, ngoenzngoenz guhcaemz guh’angq, mbouj yunghsim doeg- saw, daengz gaujsi, suyoz ngamq gauj ndaej 48 faen. Mboujrox dwg mbouj dwg lauxsae suyoz lwnh daxboh gou nyi, banhaemh gou maranz, gwn haeuxcaeuz sat, daxboh naeuz gou:“Aeu cieng(mbaw) sigenj suyoz mwngz hawj gou yawj mbat he.” Gou doeksaet yat, najhoengz rwzdik, daj ndaw daehsaw mbut(mbon) cieng sigenj suyoz okdaeuj, gyau hawj daxboh. Daxboh gaem cieng sigenj fan bae fan dauq yiuq, hix mbouj gangj saek coenzvah. Gou najmong yaek dai lo, ngaemgyaeuj roengzdaeuj, mbouj gamj oksing. Daxboh fan daengz mienh 48 faen de, hix mbouj dingz roengzdaeuj nauq, couh fan gvaqbae lo. Fan sat, daxboh aeu cieng sigenj hawj gou, hix mbouj gangj gijmaz vah nauq. Gou saetnaj yaek dai lo, yaek ra congh- gyoengj ndonj haeujbae mbouj baenz yiengh. Daj baezde hwnj, gou mbouj gamj luenh baeyouz lo, haeujsim doegsaw, faensoq suyoz hix gauj ndaej daih’it mingz lo.

Daxboh beizheiq swnh, gaen gyoengq vunzlai guhdoih youq, gizgiz nyiengh vunz, vunzlai hix gyaez de, gingqnaek de. Miz bi ndeu, ranznden guh ranzmoq, ciemq ranz dou sam cik dieg. Vunz ranz dou mbouj fug, siengj bae ra ranznden gangj dauhleix. Daxboh gienqnaeuz vunzranz, lwnh gojgaeq Cinghcauz Ganghhih dayozsw Cangh Yingh sij fung 《Sawranz》 de, gienqnaeuz vunzranz nyienghbouh, lij yinxyungh sei ndaw gojgaeq de naeuz:“Cienleix sijsaenq cij vih ciengz, nyiengh de sam cik youh baeuzyouq. Cangzcwngz fanhleix haemj banz gaeuq, mboujraen bide Cinz Sij- vangz.” Dauhleix gangj doeng le, vunzranz dingq sat, hix mboujcaiq hemq lai lo. Doeklaeng, ranznden hix rox daengz baenzneix guh mboujdoiq, gag doiqnyiengh gaiq dieg ciemq haenx hawj dou, song ranz vunz doxndei lumj gaeuq.

Daxboh gou sim ndiep vunz- biengz、bangcoh vunzbiengz. Gou bet bi mwhhaenx seizdoeng, lajmbanj daihloh byaij daeuj boux vunz youzlangh ndeu, boux vunz de daenj buhvaq youh mbang youh reng, cingsaenz mbouj daih cingqciengz, dungx iek yaek dai lo. Gyoengq vunzmbanj lau de, lijmiz vunz gaem diuzfaex yaek caenh de. Daxboh gou mbouj lau de, bae daiq boux vunz youzlangh neix maranz, cauxfeiz hawj de raeujndang, dawz haeuxndat byaekndat soengq daengz gwnz fwngz de. Boux vunz youzlangh neix gwnguk gwnsat, cix gangj mbouj ok coenz vah ndeu, raemxda doekswdswd. Soengq boux vunz youzlangh de okbae liux, daxboh doiq dou naeuz:“Raen boux- wnq miz hojnanz, raeuz aeu caenh- liengh bangcoh de. Langhnaeuz bungz daengz gaiq saeh neix, raeuz hix yaekaeu bouxwnq bangcoh. Mingzbeg lwi?” Dou geij beixnuengx ngaek- gyaeuj ngetnget.

Lijmiz gienh saeh ndeu, gou daengz banneix lij geiq ndaej cingcuj. Gou ngamq doegsaw bizyez camgya gunghcoz mwhhaenx, miz ngoenz ndeu, gou roengzban ma daengz ranz, yawjraen ndawranz vunz rim caez, cungqgyang humx boux goengdamengz ndeu caeuq boux lwgnyez sai ndeu. Boux goengdamengz ajbak guhfwen naeuz, boux lwgnyez sai neix bohmeh dai caez, mbouj miz vunz ciengx de, hix mbouj ndaej bae hagdangz doegsaw lai. Boux goengdamengz neix dwg “fwenvuengz” ndawmbanj, de caeuq boux lwgnyez sai neix caemh mbanj, goengdamengz raen de hoj- lienz, couh daiq de riengz henz dah byaij doxroengz, bae gak mbanj gouz gyoengq beixnuengx bangcoh boux lwg neix, miz cienz ok cienz, miz haeux hawj haeux, bangcoh de gwnyungh, bae hagdangz doegsaw. Daxboh heuh gou ra cienz、haeux okdaeuj, soengq daengz gwnzfwngz boux lwgnyez sai neix. Boux goengdamengz raemxda doekswsw, aeu fajfwngz roz de lax gwnzgyaeuj gou, guhfwen docih dou. Gyoengq beixnuengx raen gou hawj cienz hawj haeux, bouxboux maranz dawz ngaenz dawz haeux daeuj soengq. Mbatneix daxboh mbouj gangj gijmaz nauq, amqamq doiq gou ngaekngaek gyaeuj.

Daxboh vihmaz yienghneix maij bang vunz? Hix dwg aenvih goeng gou son’gyauq de. Goeng gou caengz gvaqseiq mwhhaenx, doiq vunz cibfaen ndei, de lij coz mwhhaenx, soulouz boux vunz deuznanh gvaq, hawj bouxvunz diegrog neix youq ranz dou gwndaenj sam bi, daengz doeklaeng bouxvunz diegrog neix bingzan maranz, ndawsim cibfaen gamjgik, hawj dahlwg de daeuj nyinh goeng gou guh boh.

Ciep goeng gou son’gyauq, daxboh gou ciengzseiz bangcoh vunz, de naeuz gaiq neix doj dwg saeh’iq, mbouj yungh lwnh hawj vunz nyi. Bingzciengz gaiq “saeh’iq” neix dou yawj youq ndaw lwgda, geiq youq ndawsim, hawj dou rox daengz, guh vunz aeu miz daudwz, raeuz doiq vunz ndei, couh dwg doiq swhgeij ndei.

Daengz ngoenzneix, daxboh itcig yungh gaiq gangj gaiq guh de son- gyauq dou, mboujguenj gungzfouq, raeuz doiq gwndaenj, aeu miz aensim gamjaen、soengyungz、nyienghvunz, gvaq ndaej bingzan、cwxcaih，cijdwg yiengjsouh gij ceiq ndei seiqvunz.