Ciet Gozging cuengqgyaj, dax- meh daiq gou ma ranzcoj, mbouj siengj daengz ranzcoj baenzneix gyaeu!

Caeuq laeuz hung laeuz sang ndaw singz mbouj doengz, gij ranz ranzcoj dwg baenz baiz baenz baiz ranzbingzfuengz, cingjcaez seuqsak. Ranzranz cungj miz aen hongh hung ndeu, ndaw hong ndaem rim va, gak saek gak yiengh va hai rim ndaw hongh, gyaeundei dangqmaz.

Daxmeh daiq gou itmienh byaij itmienh naeuz, samcib bi gaxgonq, ndaw mbanj mbouj miz loh suijniz, cungj dwg loh namh. Ngoenzgvengq, baez bongj rumz, gwnz loh faenx mbinyagyag, ngoenz doekfwn, diuz loh boengzbwd myagmywd hoj byaij. Seizneix ndaw mbanj mboujlwnh loh hung loh iq, cungj dwg loh suijniz seuqsak, fwn doek geijlai hung cungj mbouj lau lo.

Bakmbanj miz aen suenmak ndeu. Mwngz yawj, gwnz go mak- bingzgoj mak de duenghruemruem ndingyanyan; makcaujnding youq ndaw rumzcou mbouj dingz ngaek gyaeuj, lumj dwg dongx gou nei; baenz roix baenz roix makit gwnz gyaq ronghcingx lumj majnauj nei…… “Gizsaed, ceiq gyaeu dwg seizcin.” Daxmeh riu naeuz, “Mwhde ndaw suenmak hai rim va, valeiz hausag, vadauz hoengzmaeq, vamakbingzgoj hoengzdamh…… Mbouj rox geijlai gyaeundei ha!”

Daxmeh lwnh gou, mwh de lij iq, gizneix dwg cauhcangz dak meg. Gaxgonq mbouj miz souhgozgih, meg baenzsou le, cungj dwg aeu vunz gvej, yienzhaeuh rap daengz cauhcangz, bu ok dak sauj. Dak sauj le cuengq gwnz nienjrin bae hawj vaiz rag nienj, byak meg baenz di baenz di buqsoiq, nienj ndei lo, caj miz rumz daeuj, gyoengq- vunz couh dawz meg nienj ndei haenx bau hwnj gwnzmbwn bae, rumz ci byak meg bae le, cij lw naed meg, yienzhaeuh dawz meg dak sauj haenx cang haeuj cang bae.

Daxmeh naeuz, gaxgonq sou gohuq youh naet youh uq, danghnaeuz mwh sou gohuq doek fwn, doengh gohuq couh fatmwt gwn mbouj ndaej, ndigah guh hongnaz cungj caeuq aen mbwn ciengj seizgan, baez daengz geiqciet sou huq, gyoengqvunz cungj laep ok laep haeuj nyaengq baenz ndwen, naetnaiq dangqmaz. Seizneix ndaw mbanj miz souhgozgih lo, souhgozgih hai daengz ndaw naz, “dududu” byaij dangq ndeu, byak meg buq lo, naed meg couh daengz aen sieng coux meg bae, gig fueng- bienh, gyoengqvunz caiq mbouj deng naet lo. Aen cauhcangz neix hix yungh mbouj daengz lo, couh bienqbaenz le suenmak.

Byaij daengz diuz rij gyaeuj- mbanj, gou nyaenx mbouj ndaej diuq roengz raemx bae. Raemx rij saw- dikdik, nywjraemx heuyauyau youq ndaw raemx cwxcaih bidoengh, geij duz byalwg youq ndaw raemx cwxcaih youz bae youz dauq. “Mwngz yawj raemx neix geijlai saw ha, ndaw singz gizlawz miz gijdieg baenzneix ndei ha.” Daxmeh itmienh haenh itmienh caeuq gou boenz raemx.

Ma daengz ranz, daxmeh caeuq daxdaiq gangj hwnj gij bienqvaq ndaw mbanj. Daxdaiq naeuz: “Mwngz lij geiqndaej gij loqsiengj seiziq mwngz lwi?”

“Baenzlawz geiq mbouj ndaej ha, mwhde, loqsiengj gou couh dwg ndaej youq aen ranz mbouj roh fwn, ngoenz fwn doek mbouj yungh gyanghwnz hwnqdaeuj ra bat coux raemxfwn, mbouj yungh buen denz buen mbinj ra giz mbouj roh fwn haenx ninz, lijmiz ngoenzngoenz miz mienhhau、manzdouz gwn. Roxnyinh yiengh- haenx couh dwg vuenyungz.” Daxmeh doenghcingz dwk naeuz.

“Caen siengj mbouj daengz dinjdinj geij cib bi, saedceij raeuz fatseng le bienqvaq mbwn fan deih boek! Seizneix ha, ngoenzngoenz gwn mienhhau、manzdouz, gou cungj gwn nywnx lo. Saedceij neix yied gvaq yied ndei lo!” Gangj dwk, nyaeuq gok da daxdaiq cungj riu baenz duj va ndeu lo.

Mbouj rox mbouj nyinh, gou youq ranzcoj youq le geij ngoenz lo, yaek dauqma lo, caen miz di sij mbouj ndaej biek bae ha!

(Gvangjdungh Swngj Sinhcin Si Baujanh Gih Vangzdenz Siujyoz roek nienzgaep Dwng Yi)