Bet nyied cibngux ngoenzde, dou gwn sat haeuxcaeuz le, daxmeh couh hemqnaeuz: “Vaiq di sij cozyez, gyanghaemh raeuz bae ndaw hongh ngonz ronghndwen, gou bwh ndei gak cungj bingjronghndwen ndeigwn hawj sou lobw!”

“Ndei ha ndei ha!” Gou caeuq dahnuengx caez han naeuz.

Ngoenzde ronghndwen youh hung youh luenz, gyaeundei dangqmaz. Dou daengx ranz vunz buen daizdaengq bae ndaw hongh. Mwhde, daxmeh hix dawz gak cungj gak yiengh bingjronghndwen ndeigwn okdaeuj: Miz yiengh aen sim、yiengh seiqfueng、yiengh luenz…… Miz sim saduh、sim gyaeqhenj、sim noh……

Gou caeuq dahnuengx ngiengx gyaeuj yawj gwnzmbwn, itmienh gwn bingjronghndwen, itmienh ngonzyawj ronghndwen. Cij raen gwnzmbwn ronghndwen luenzlulu cingq menhmenh swng hwnjdaeuj, ronghndwen cibngux lumj aen buenznyawh nei, sieng youq gyanghaemh gwnzmbwn saek lamz- ndaem haenx, yienhndaej daegbied ronghhau. Rongh saekngaenz ronghndwen ndonj gvaq baenz geu baenz geu fwj mbang, ciuq youq gyangmbwn, youh saj rim le daihdeih. Ronghndwen ciemhciemh swng sang lo, gij rongh ronghsag unqswnh de, hawj doxgaiq seiqhenz cungj longz hwnj caengz sa’ngaenz ndeu, gyaeundei dangqmaz.

Gou mbiq aen gyoij ndeu hawj daxmeh, daxmeh riu dwk haenh gou roxsoq. Gou yaengyaeng ing youq gwnz ga daxmeh, ngiengx gyaeuj dinghdingh ngonzyawj ronghndwen, cam naeuz: “Meh, mwngz gangj aen goj 《Cangzngoz Buet Coh Ronghndwen》hawj gou dingq vei!” Daxmeh ngaekngaek gyaeuj, couh gig sengdoengh dwk gangj hwnjdaeuj:“Doenghbaez, miz dah sau saundei ndeu heuhguh Cangzngoz, de miz boux gvan maenh’ak ndeu, heuhguh Houyi……” Aiq dwg daxmeh gangj ndaej sengdoengh lai, dingq dwk dingq dwk, gou lumj maj ok song gaiq fwed mbin hwnj gwnzmbwn, daeujdaengz ndaw ronghndwen, caeuq dahcej Cangzngoz caez cimzgwn bingjronghndwen ndeigwn haenx.

Mbouj rox seizlawz, gyanghwnz lo, seiqhenz dinghsubsub, cijmiz vunz ndaw ranz gou humx naengh youq doxcaez……

Ronghndwen bet nyied cibngux geijlai gyaeundei ha!

(Gyanghsuh Suhcouh Gungh- yez Yenzgih Daihngeih Sizyen Siujyoz ngeih nienzgaep Luz Cwnz- hanz)