Ngoenz fwn doek byaj raez,

Aemq gou bae ywbingh,

Gyaep mbouj liengj cw dingj,

Yaek ce mingh gwnz roen.

-

Yw ndaej ndei mbouj ndei,

Ngaenz ciuq bae gvaq fanh,

Mbouj ce gou yienqdanq,

Geijlai fanh hix yw.

-

Bingh yied ngoenz yied naek,

Sim boh lumj saek oen,

Yamqdin mbouj raen roen,

Gou sim moen liuxnauq.

-

Canghyw gangj mbouj ca,

Naeuz lwgda gou vaih,

Bohmeh caen doeknaiq,

Seiqgyaiq laepnyamnyam.

-

Ywbingh boek gya ranz,

Fandauq yienghneix vah,

Mbwn cawq roengzdaeuj gvaq,

Caj ngoenz dai daeujdaengz.

-

Bohmeh caen sinhoj,

Mbouj rox yienghlawz naeuz,

Guh sinhoj ngaeu’ngaeu,

Raeuz ngoenzmaz boiz hwnq.

-

Fanz bohmeh lailai,

Nai gyoengqde mbouj doh,

Gwndaenj yienghyiengh goq,

Hwnzngoenz roh raemxda.

-

Doiq bohmeh mbouj gvaq,

Youq lajdeih mbouj baenz,

Baez ngeix dauq ndangsaen,

Mbouj baenz gijmaz yungh.

-

Bohmeh ciengx raeuz hung,

Caeuq vunz riu doengz angq,

Gou le gya mbouj dangq,

Rox angq duz gijmaz.

-

Gou caeuq vunz caemh ban,

Ngeix fanz lai gvaq doih,

Mingh gou yienghneix boiq,

Mboujmiz naj doiq vunz.

-

Gou caeuq vunz caemh saemq,

Naemj daenj mboujmiz gwn,

Heiq lumj raemx dumh mbwn,

Mbouj lumj vunz lumj doih.

-

Gou goetmingh mbouj ndei,

Seizseiz raemxda doek,

Gou mingh mbouj baez goet,

Ngoenz daimboet geij baez.

-

Yawj maz mbouj raen maz,

Song da mbouj raen rongh,

Faj din yamq bae gonq,

Loemq congh hix mbouj dwen.

-

Yawj maz mbouj raen maz,

Gou song da mbouj raeh,

Gwn baenz guh mbouj ndaej,

Ngoenz daej youq ndaw ranz.

-

Ngoenz gwn ngeix lailai,

Ngeix dai mbouj baenz yiengh,

Ngoenz gwn cungj luenh siengj,

Yawj yiengh mbouj raen ngaeuz.

-

Ngoenz gwn cungj gag heiq,

Sim’eiq fouz giz naeuz,

Ngoenz gwn cix gag you,

Raeuz ngoenz maz gvaqciuh.

-

Ngoenz gwn loenq raemxda,

Ngoenz maz ndaej gvaqciuh,

Gag ngeix sim gag diuq,

Ngoenz maz gvaq ciuhvunz.

-

Ngoenz gwn sam ngoenz daej,

Mbouj ndaej yamq okdou,

Gvaq lawz cungj gag gou,

Sim fouz lumj raemx dumh.

（3）