(ciep geiz gonq)

Menhmenh dwk, gou majhung le, bienq ndaej beij nyezsai lij manz, ciengzciengz nyangqbiz ndaej hawj daxboh gyaeujnaemq simnyap, gvaiq diet singq mbouj lienh ndaej baenz gang. Daxboh ciemhciemh mbouj caiq lumj seiziq yienghhaenx menq gou maij gou, mboujguenj ndaw swnghhoz roxnaeuz gwnz yozsiz, daxboh doiq gou yied daeuj yied yiemz. Geiq ndaej miz baez gaujsi ndeu, gou cijmiz diuz daezmoeg laeuh dwk aen siujsoqdiemj, deng saetfaen lo. Daxboh mboujdanh youq gwnz ban bihbingz gou, lij fad gou gyalienh 10 diuz daezmoeg. Lijmiz baez ndeu, gou doeg haj nienzgaep, banngaiz cuengqhag le, gou couh caeuq boux doengzhag ndaw ban ranz gyawj baema gwn ngaiz. Aenvih bak siujgvij, gwn imq le dou lij caegcaeg daj ndaw daehbuh daxmeh doengzhag dawz maenz ngaenz he bae cawx sietdiuz gwn, dauq hwnjhag couh daengz ceiz lo. Daxboh haihoih dauqma rox le, dawz dou bae bangunghsiz ndaq le baeznaemz. Gou rox hit lo, cigdaengz seizneix gou lij geiq ndaej daxboh heiqginj dwk fan fajnaj hoengz ndaej gig dwglau haenx. Daj baezhaenx hwnj, gou youh bienq ndaej “roxsoq” haujlai. Bingzseiz yienghyiengh siujsim, mbouj gamj caiq famh loek. Hoeng gou ndaw sim caegcaeg naeuq daxboh, menhmenh mbouj maij boux lauxsae.

Cuhcungh bizyez dienz ceiqnyienh, gou itdi mbouj siengj senj bae doeg swhfan. Daxboh rox le, mbouj huj mbouj gaek, de hemq doenghboux aunyaeq ndaw ranz itheij, caenhrengz gienq gou senj swhfan. Euq mboujgvaq, gou couh dienz bae doeg swhfan. Sam bi gvaqbae, gou bang daxboh saedyienh le aen “simnyienh” de, hix youq ndaw yangh dang le boux lauxsae sonsaw ndeu.

Vih le fuengbienh hwnj ban roengz ban, daxboh laeg saivaq bae cawx aen mohdozceh ndeu, gou moix ngoenz ndaej naengh ci daxboh, caeuq de itheij youq diuz loh gumxgumx gangxgangx baebae dauqdauq. Seizhaenx daxboh son seiq nienzgaep suyoz, gou hwnj ngeih nienzgaep yijvwnz. Gohmuz mbouj doengz, hoeng sonfap hix loq doxdoeng. Daxboh hai ci gou naengh ci, gou dawz swhgeij youq gwnz sonhag nyangz daengz gij vwndiz gaijgez mbouj ndaej haenx lwnh daxboh nyi, daxboh it loh naihsim son saeqsim lwnh, seizseiz ietfwngz rex gou youq gwnz diuz loh son’gyauq baez yamq baez yamq byaij baenaj. Hoeng saedceij ndei mbwnlaux hozhaenz, gou ngamq gunghcoz ndaej aen haggeiz lai, daxboh couh biek dou bae lo.

Seizneix, gou gaenq dang lauxsae ngeihcib bi lo. Diuz loh laj din, daj ndaw mbanj iet coh gwnz haw, giz vaih giz gumz, gyoengq vunz youh coih youh dienz, dienz ndei ci youh rad vunz youh byaij; caiq gumz caiq dienz, diuz loh hix yied daeuj yied bingz. Danhseih diuz loh sonhag gou, daj daxboh biek bae, gou byaij ndaej saemxsaemx saxsax. Mizseiz moengzloengz, mizseiz ngeizvaeg, hix mizseiz naetnaiq……it loh byaijbyaij dingzdingz. Geij bi neix gietvaen baenzgya, seizneix hix guh le bohmeh, saedceij hwnjhwnj roengzroengz, seiz ndei seiz rwix. Gou ciemhciemh roxyiuj gij yunghsim daegbied daxboh doenghbi, caemh rox faenh cwzyin naekgywggywg daxboh. Faenh simyou daxboh doiq gyauyuz, ndiepgyaez caeuq genhciz, de yungh swhsiengj caeuq cihsiz swhgeij caenhsim guh, caenhcingz ndiep, muengh hagseng bouxboux cungj baenz boux vunz mizyungh, muengh lwg de ndaej guh boux lauxsae, cienzswnj faenh hong hungmbwk gyauyuz de, caemh bae yinxlingx gij vunz henz- ndang. Gou nyinhnaeuz neix wnggai couh dwg faenh hong daxboh roengzsim genhciz baenz ciuh laemxsim bae guh ba.

Ngoenzneix, doengh boux hagseng daxboh son gvaq haenx wngdang cungj baenz vunz cungnienz, youq gwnz gangjvih swhgeij wnggai cungj ra ndaej gwn, guh ndaej bae. Gyoengqde wnggai hix caeuq gou ityiengh gaenq dwg bouxcawj seizdaih moq, dwg aen doih cawjlig dangj raeuz saedyienh haenqguh aen moegbiu bak bi daihngeih.

Diuz loh daj ndaw mbanj doeng bae ndaw yangh caeux sam bi gaenq coih ndei, gvangqlangh youh bingzbwdbwd. Aen yiengh gyuek boengz gyuek namh gaenq bienq aen ngaeuz moq seuqcengh. Ngoenz cieng gvaq ciet dauq ranzmeh, lajmbanj dauqcawq cungj dwg mbanjmoq seizdaih moq: Loh suijniz diegdieg cungj doeng, mbanjmbanj doxlienz, ranzranz doxdoeng. Lohhung gvangq youh bingz, song henz faex heu va rang, doenghbaez giz gumz giz gangx caiq mbouj raen, giz gaeuq giz uq cungj bienq seuq bienq gyaeu, caemh guh miz giuzcangz ronghdaeng, daemz dajcaemx……Vunz- mbanj sou hong dauq ranz miz giz guh’angq, seiz mbwq miz dieg miz doih gaijmbwq. Miz boux lij yinx haeuj gisuz moq dajndaem dajciengx, daiq gyoengq vunz ndaw mbanj baenzfouq baenzmiz. Gou vih gyoengqde miznaj, hix vih daxboh miznaj.

Cib bi cauh faex, bak bi cauh vunz. Sawjmingh lauxsae dwg son saw son vunz, ganq vunzcaiz seizdaih. Bi 2018, gij baugau Cibgouj Daih Dangj, Siz Ginbingz mingzbeg yeixok: Gyauyuz giengz guek cix giengz, gyauyuz hwng guek cix hwng. Aeu saedyienh Cunghvaz Minzcuz fukhwng hungmbwk, gyauyuz dwg gij hong ceiq gaenbonj raeuz.

Gou guh boux lauxsae seizdaih moq, caemh guh bouxmeh cungnienz, gou caencingq rox daengz gyauyuz youqgaenj caeuq diuzrap hungnaek gwnz mbaq swhgeij. Vih ranz miz cwzyin, vih guek miz rapnaek, dwg cingzvaiz aenguek caeuq aenranz gou. Baezlaeng gou laebdaeb lumj daxboh son gou ityiengh, dabsaed guh hong, haenqrengz bae cak, caenhsim bae guh ndei moix gienh saeh. Gou aeu son ndei lwgnyez, yungh hengzdoengh bae dajyinx, aeu cihsiz bae vujcangh ukgyaeuj, hawj gyoengq hagseng gou son gvaq haenx majhung vih sevei okrengz, guh bouxvunz mizyungh, vih saedyienh aen loq Cungguek raeuz ok faenh rengz swhgeij.

Gou nyienh dwg ndaek rin buloh gwnz loh hagseng seiqvunz, hawj gyoengqde fwngz yien fwngz caezcaemh byaij coh ngoenzcog ronghsag.

（sat）