Lij Gyangz Camgya Yizsiz Haimuq Gaiq Ngeihcib

Cunghgoz-Dunghmungz Bozlanjvei Caemhcaiq Gangjvah

Sinhvazse Nanzningz 9 nyied 17 hauh dienh Gozvuyen cungjlij Lij Gyangz 9 nyied 17 hauh banhaet youq Gvangjsih Nanzningz camgya Yizsiz Haimuq Gaiq Ngeihcib Cunghgoz-Dunghmungz Bozlanjvei caeuq Yizsiz Haimuq Hoih Bouxdaeuz Cunghgoz-Dunghmungz Doxyaeng Hongsaeh Seng’eiq Nem Roengzcienz caemhcaiq gangjvah. Genjbujsai soujsieng Hungzmajnai、Laujvoh cungjlij Sungsai、Majlaizsihya cungjlij Anhvajwj、Yeznanz cungjlij Fan Mingzcwng、Yindunizsihya fucungjdungj Majlujfuh、Daigoz fucungjlij caeuq sanghyez bucangj Bujdanj、Dunghmungz misuhcangj Gauh Ginhhungz, vanzlij miz doengh boux daibyauj gyaiq gunghyez sanghyez laeng Cunghgoz、Dunghmungz daengj guekgya caeuq digih daihgaiq 1200 vunz camgya.

Lij Gyangz naeuz, Cungh- goz-Dunghmungz Bozlanjvei cauh- banh 20 bi doxdaeuj guhcingq gij gvenhaeh song baih hwngfat mbouj- duenh. Raeuz dingjmaenh doxgiet youh gag’ak、doxgap caez ndaej gwn(leih)、sim miz daengx lajmbwn, Cunghgoz caeuq Dunghmungz dox- caeuq doxgyau gaenq baenz le yienghbanj gvaengxdieg Yacouh Dai- bingzyangz doxgap ceiq baenzsaeh caeuq ceiq rengzak, baenz aen saehlaeh sengdoengh cingqmingz raeuz doinyoengx cauhlaeb aen cingjdaej vunzloih caezcaemh minghyinh.

Lij Gyangz daegbied gangj daengz, aen gizmen ndei Cunghgoz caeuq Dunghmungz doxcaeuq doxgyau ndaej daeuj mbouj ngaih(yungzheih), gietcomz miz gak baih guhdoih haenqrengz, ndawde miz naed cehsim bonjcaet caeuq diuz sienqmeh ronzdoeng goekbyai, neix couhdwg seiq cih saw“caensim、doxndei、doxik、bauyungz” youz Siz Ginbingz cujsiz cingdaeuq gyonjgangj. Seiq cih neix mboujdan dwg gij byaijyiengq giek- bonj aen vaigyauh fuengcim Cungguek caeuq doengh aen guekgya seiqhenz, hixdwg dauhleix doxcaeuq doxhuz doxndei, engqdwg fapbauj youqgaenj raeuz guhdoih youq coglaeng ndaej hwngfat ndeindet. Raeuz yaek lai roengz goengrengz bae saedguh seiq cih saw neix, haenqrengz cauhlaeb aen vanzging haemq ndei leih raeuz hwngfat hwnghoengh、huzbingz an’onj, hawj gak guek hwngfat miz leih ndei doh doengh aen guekgya seiqhenz、cauh fuk hawj yinzminz gvaengxdieg.

It dwg laiak laindei bae saedguh cih“caensim”, caiq gyalaeg bae hawj gamjcingz doxgyaux. Cungguek nyienh caeuq Dunghmungz lailai doxgap guh hongsaeh vwnzva、lijyouz、sonlienh、bouxcoz daengj, mboujduenh bae hawj yinzminz lai doxrox doxgyaez. Ngeih dwg laiak laindei bae saedguh cih“doxndei”, caiq cukmaenh aen giek- daej doxsaenq. Cungguek nyienh caeuq Dunghmungz gak guek guhdoih, gangj vah suenq vah bae doxgap guh gak yiengh hongsaeh. Cungguek dawzmaenh aen gihbwnj gozcwz doiq rog hailangh, haenqrengz cauhlaeb gij vanzging ceiq hab guh seng’eiq dwg hawj bouxdouzswh gak guek sim’onj simnet simsoeng. Sam dwg laiak laindei bae saedguh cih“doxik”, caiq daz haen diuzsai leih’ik. Cungguek nyienh lailai cawx haeuj gij canjbinj miz daegsaek huq laindei laeng guekgya Dunghmungz, mboujduenh bae gyaak gvaengxdieg doxlienz doxdoeng, cauhguh diuzlienh canjnieb caeuq diuzlienh gunghawj gvaengx- dieg engqgya onjdangq、doengrat、doxbeij laiak. Seiq dwg laiak laindei bae saedguh cih“bauyungz”, caiq hawj aek hai lai gvangq bae guh hailangh. Cungguek giendingh haeuj- coengh guh aen gvaenghgaq gvaengx- dieg doxgap aeu Dunghmungz guh daeuz, doidoengh aen cawjcieng caez hwnqguh “it rangh it loh” caeuq gij canloz hwngfat gak guek doxciep laindei, lienzdaemh bae doi ginghci gvaengxdieg doxcaemh doengzcaez.

（Vangz Binh Banh Gyangz）

（youq Sinhvazvangj aeudaeuj genj mbangj fanhoiz）