Gou gangj caengz baenz sing,

Yamq din geij yamq laemx,

Gou caeuq vunz doengzsaemq,

Bohmeh raemxda roengz.

Bingh yied ngoenz yied naek,

Daej daengz laep mbouj dingz.

Bohmeh mbouj ok sing,

Sim’in lumj cax heh.

Bingh yied ngoenz yied naek,

Raen mbwn laep liuxcaez,

Miz canghyw couh bae,

Geijlai gyae hix nyienh.

Bingh yied ngoenz yied haenq,

Gaenj lumj feiz remj bya,

Bingh liux cix baihgya,

Ranz haz hix gai liux.

Yienghyiengh gai liuxcaez,

Boh bae bya dwk danq,

Ngoenzndit ngoenzfwn ganq,

Canh ngaenz ra canghyw.

Ok haw gwnz haw laj,

Caj ndaej maenz suenq maenz,

Gaen fwnz gai song faen,

Ra ngaenz mbouj yungzheih.

Ndaej geijlai geijlai,

Haibak ciq beixnuengx,

Bohmeh sim caen muengh,

Ndaej beixnuengx doxbang.

Vaij gwnz caiq vaij laj,

Hajgak ngaenz hix aeu,

Vih yw gij bingh raeuz,

Bohmeh gaeuzngo’ngo.

Bohmeh gou ranz hoj,

Geu buhdoj hix gai,

Ngaenz mbouj miz geijlai,

Gai cij ndaej ywbingh.

Seizgonq hoj lailai,

Daenj haiz mbouj miz naj,

Daenj buh mbouj baenz vaq,

Gvaq saedceij hix nanz.

Seizgonq caen dwg hoj,

Doiq haizmoq caengz raen,

Doiq haiz geij maenz ngaenz,

Raen boiqseiz boiqnanh.

Aen rek mbouj miz fa,

Baengh goengda yahdaiq,

Daengz ciet rox daengz caiq,

Baengh dadaiq hawj raeuz.

Ndaw ranz mbouj miz haeux,

Gwn caeuz youh ra ngaiz,

Yienznaeuz mbouj miz lai,

Cix gai bae yw bingh.

Gwn haeux mbouj miz byaek,

Yw dwk raeg(gungz) liuxcaez,

Seiz sou daengngoenz raez,

Cienq souhsaw ciengx mingh.

Haeux mboujmiz roengz cauq(rek),

Gauq(baengh) bae ciq ranz nden,

Ndaej saek geng song geng,

Ciengx sengmingh gaxgonq.

Mbouj cam dungx cix iek,

Cam dungx cieglinlin,

Doengzdoih guenj lwgnding,

Gou ging hoj ging nanh.

Dungxiek nanz gvaq doeng,

Haeuj ndoeng bae ra byaek,

Boh buet ga yaek raek,

Gou binghnaek caj dai.

Gou goet mbouj baenz mingh,

Bingh hwnj youh bingh roengz,

Bae geijlai ngoenz roen,

Doeng(hix) bae sim cij net.

Gizlawz hix ndaej gvaq,

Dahlawz hix ndaej bae,

Bingh gou naekngae’ngae,

Fanz ndawdungx bohmeh.（2）