Gou doekseng youq aen mbanjbya mbanjrungh gig bienbik ndeu, daengx mbanj cib geij ranz, mwngz bang gou rex, saedceij gvaq ndaej baenz ranz vunz he. Daj ndaw mbanj daengz gwnz haw ndaw yangh, dwg diuz loh saejgaeq, ngutngut ngeujngeuj, gumxgumx gangxgangx, raez miz 3 goengleix baedauq. Baez daengz ngoenz doek fwn, namhsa raemxboengz doxgyaux, ci gyanx vaiz byaij, diuz loh couh dwg “suijniz lu” cingqmbaek lo, hawj boux ndi daenj sijhaiz ndi miz giz yamq din.

Daxboh youq gwnz haw son saw, seizgonq banhaemh hix aeu hwnjdangz, daxboh moix ngoenz cungj aeu youq diuz loh neix baedauq 6 baez. Mbwn rengx mbouj ci rumz lij ndei di, baedauq gwn di moenq uq di faenx couh daengz ranz. Baez loq ci di rumz, moenq gaen rumz cifedfed, ma daengz ranz byoemndaem cungj bienq byoemhau lo; Langh miz saek aen ci soujfuzdohlahgih hai gvaq, couh baenz raq baenz raq namhfaenx youq gyang mbwn geuj bae geuj dauq, vunz byaij gwnz loh aeu bau gyaeuj goemq rwz cix ndaej.

Seiz doek fwn couh yak lai lo, namh met loh raeuz, gyaeuj ngaem hwet gaeuz. Youq ndaw yaenqsiengq gou: Baez daengz doek fwn, daxboh dauq ranz ciengzciengz dwg buh dumz gyaeuj met. Mizseiz loh raeuz lai, de byaij loh cix cungj daengxlaemx daengjhai, haiz caeuq gavaq cungj dwg raemxboengz, uq ndaej faen mbouj ok dwg vaj roxnaeuz dwg vaq.

Doenghbaez seizneix, daxboh cungj mienx mbouj ndaej ndaqnaeuz: Aen mbwn raq neix, caeux mbouj doek fwn ceiz mbouj doek fwn, ngaeu- ngaeu(nyengh) ra seiz langhhag doek fwn.

Miz haemh ndeu, cuengqhag seiz fwn doek, daxboh soengq Dahhoengz ranzgwnz baema, byaij diuz lohnaeuh laeng ranz, youh lingq youh raeuz, de seiq ga caez yungh hix nanz benz hwnjbae……

Fwn naek lai, daxboh naemj, aenmauh Daegsam roh lo, raemxfwn rih deng gyaeuj met lo; Rumz haenq lai, geu buhsuliu Dahhaj deng fongz mbongq, buh dumz vaq hix met, mboujrox gyoengq- de daengz ranz rieg doxgaiq mboujcaengz?……Gyoengq lwgnyez ndaw mbanj souhhoj lai ha! Ai! Langh diuz lohvaih neix ndaej coih ndei, geijlai ndei ha……

Aen ban daxboh son haenx, miz cib geij boux hagseng dwg lwgnyez ndaw mbanj. Gyoengqde cib’it cib’ngeih bi, beij gou loq hung, gou heuh gyoengqde daeggo dahcej. Seizdoeng ngoenz mbouj hwnj dangz, gyoengqde cungj maij comz daeuj ranz gou byoq feiz dajging. Seizhaenx ndaw ranz lij dwg aeu fwnzhaz dajcawj, ndigah gyoengqde moix baez daeuj cungj swnhfwngz do daeuj song sam nga faexroz cauxfeiz, mizseiz lij riuj geij aen maenz geij aen biek daeuj saz, aenvih daihgya baez naengh roengzdaeuj dajging couh dwg ngoenz daengz laep.

Baenz bang vunz naengh henz feiz, gangjgangj riuriu, gangj rumz gangj fwn, gangj mbwn gangj deih……Hoeng daxboh gangj dwk ging dwk cungj mbouj lumz guh gij hong bonjfaenh: Gangj aen gojgaeq sat youh swnh gangj di suenqsik suyoz haeujbae, gangj di sinhvwnz youh gangj di sijcih caeuq dozveh. Seizhaenx gou ceiq maij naengh youq gyaeujhoq daxboh, ngeng gyaeuj dingq daxboh miz goek miz rieng dwk gangj goj Couh Wnhlaiz, goj Cuh Dwz, goj Bwngz Dwzvaiz……De lwnh gyoengq vunz byoqfeiz nyi: Gijneix dwg boux maenh’ak minzcuz seiz dwk Yizbwnj caeuq seiz gaijfang, daengx guek gwnzlaj lijmiz haujlai bouxak minzcuz raeuz, gyoengqde dawz gij vunzdig daeuj ciemq gyaep okbae, aeu lwedhanh vuenh daeuj cij vuenh ndaej gij huzndei saedceij raeuz ngoenzneix daeuj. Moixmoix gangj daengz gaenlaeng, de lij daengq sam daengq seiq: Sou aeu ndeindei hagsib, ceng’aeu gauj hwnj daihhag, hag ndei gohyoz vwnzva, hag ndaej bonjsaeh maenh’ak, ngoenzlaeng dauqma gaijbienq aen mbanjranz gungzhoj raeuz, gensez ndei aen mbanjranz raeuz. Yaek guh ndei aen mbanj raeuz, daih’it couh aeu sien dawz diuz loh “suijniz” doeng bae ndaw yangh coih baenz diuz loh “suijniz” cingqmbaek.

Seizhaenx gou yienznaeuz lij saeq, doiq gij goj daxboh gangj haenx buenq rox buenq mbouj, mizdi gip ndaej gyaeuj mbouj gip ndaej rieng, hoeng daxboh gangj ndaej mizyinx raixcaix, gou dingq ndaej ngaezngwdngwd. It bae ngeih dauq, gou hag ndaej cihsiz, daj ndaw sim boiqfug aen ukgyaeuj daxboh: Aen ukgyaeuj daxboh baenzlawz cang ndaej baenzlai, de yienghlawz rox baenzlai goj a? Seizhaenx ndaw sim gou caegcaeg laebceiq: Majhung le gou hix aeu guh boux vunz lumj daxboh ityiengh, ceng’aeu rox doh gij saeh lajmbwn, caemh aeu dang boux lauxsae son haujlai haujlai hagseng hungmbwk. Geiq ndaej seizhaenx lwnh gij siengj- muengh hawj daxboh, daxboh dingq le gig vuenheij dwk gujli gou ndeindei roengzrengz ne.

Doeklaeng hwnjhag doegsaw, gou hix dwg boux hagseng daxboh, cawz gaen daxboh hag cihsiz, lij daj daxboh gizhaenx roxdaengz haujlai gojgaeq mizgven gohyozgyah hungmbwk, lumjbaenz goj boux “boh yenzswjdan Cunghgoz” Cenz Yozswnh sienseng, goj boux suyozgyah seiqgyaiq gig mizmingz Va Lozgwngh……Haujlai goj daxboh cungj dwg hai bak couh gangj dwk naiz sinxbyadbyad, cigdaengz gangj daengz byai cix dingz daeuj gwn raemx. Moix baez daxboh gangj daengz doenghgij gojgaeq seiz, de cungj ceijyinx dou bae ra gij saw mizgven doengh boux gohyozgyah daeuj caiq yawjyawj, mizseiz de lij cujciz dou itheij gangjlwnh gyauhliuz. Raen gyoengq doengzhag yawj saw maezmwdmwd, daxboh cungj sim’angq naj hai lumj duj va ronghsien. Doengh boux nyangz daengz aen vwndiz geizheih, daxboh cungj naihsim bae gangjgej; raen doengh boux yawj ndaej daegbied nyinhcaen, daxboh iet fwngzmeh daeuj gujli de, daengq de lai gaenx doengh uk bae naemjngeix.

（caengz sat）