Dienheiq gig ndei, daxboh daxmeh naengh youq gwnz sahfaz, ndaw fwngz dawz soujgih, mizyinx dwk gangjlwnh gij saeh gyoengqde gvansim haenx. Gyoengqde mbouj yungh sij cozyez, mbouj yungh boih saw, engq mbouj yungh hwnj bandaeg- ciengz, cwxcaih soengyungz dangqmaz, gou hozhaenz raixcaix.

“Vaiq di sij cozyez, govwnz fuzsiz mbat ndeu, lij miz……” Daxmeh youh nda hong lo, simcingz gou sikhaek bienq ca. Ai, danghnaeuz gou miz fapswd, gou caen siengj caeuq bohmeh doxvuenh ndang! Siengj daengz neix, aen cung gou sawqmwh gangj vah lo: “Gou ndaej caeuq goenggeq seizgan naeuz, de itdingh muenxcuk gij simnyienh mwngz.” Gou baez dingq, angq ndaej diuq hwnjdaeuj lo.

Ngoenz daihngeih, gij loqsiengj gou bienq caen dahraix lo. Gyanghaet baez hwnqdaeuj, couh raen song laeq lwgnyez naengh youq naj conghcueng, cingq nyinhcaen boih saw ne. Song boux de itmienh boih saw itmienh yungh fwngz beijveh, cim youq ndaw biengz swhgeij. Gyoengqde lumjdwg daxboh daxmeh gou ne! Dwg maz saeh lo? Yawjyawj gou, gingqyienz dwg vunzhung lo. Gawqyienz yienghneix, gou ndaej ndeindei “yiengj- souh” gij gienzvi dang bohmeh haenx mbat ndeu cij ndaej.

“Meh, gou yaek gwn bijsaz gya cazcij caencaw, vaiq di, iek lai lo!” Gou dwg bohmeh, couh ndaej muenxcuk gij iugouz lwgnyez. Gou vid genbuh hwnj, nyaengq- nyatnyat guh dwk. “Meh, diuz daez neix gou mbouj rox guh.” “Meh, gou hozhawq lo.” “Meh……” Gou guh sat gijneix, caengz goq ndaej gwn saek gaemz raemx, youh nyaengq guh haeuxngaiz、saeg buh、sousib ndaw rug, baet uet ndaw ranz……

Dang bohmeh mbouj yungzheih ha! Gou buet haeuj rug gou, gaem hwnj aen cung gou, laeglemx naeuz de nyi, gou yaek guh dauq swhgeij……

(Hoznanz Nanzyangz Si Youzdenz Daihhaj Siujyoz Yungz Swngsinh)