Suyoz cij gauj ndaej 80 faen, gou doeknaiq ma daengz ranz, ciedmuengh ninz youq gwnz mbonq. Rog cueng, mbwn gig lamz, hoeng cix mbouj ndaej sawj gou simhai.

Mbouj rox seiz lawz, daxmeh byaij haeuj aen rug gou. De dawz soujgih ndenq hawj gou naeuz: “Mwngz yawj, ngoenzneix Huz lauxsae fat saenqsik hawj gou gujli mwngz ne.” Gwnz soujgih dwg mbaw doz gataeu gij gyaiqmienh daxmeh caeuq Huz lauxsae gangjgoj haenx, cij raen henz siengqgyaeuj duz douq Huz lauxsae riengz miz coenz vah haenhndei gangj gvaq mauh ndeu. “Caen ha? Neix mbouj lumj bingzseiz Huz lauxsae gangjvah haenx ha?!” Gou buenq saenq buenq ngeiz, hoeng daxmeh lumjdwg mbouj dingqnyi nei, hix mbouj gangj vah.

Gvaq yaep ndeu, daxmeh youh hawj gou yawj mbaw doz gataeu gij gyaiqmienh daxmeh caeuq Gauh lauxsae gangjgoj haenx, laxlawz dwg Yinghyij Gauh lauxsae hix fat siusik gujli gou lo. Gou hainduj hozngeiz lo: Baenzlawz ndaej song boux lauxsae haenh gou ne? Baenzlawz baenzneix ngamj? Hozgvang mboengqneix cingzcik Yinghyij gou hix mbouj ndei ha! Hoeng, gij angqyangz ndaej lauxsae haenh haenx gig vaiq couh hoemq gvaq gij hozngeiz gou, gij simcingz nanzgvaq “suyoz 80 faen” haenx hix lumz lo, gou hainduj angqvauvau ngonzyawj gingjsaek gyaeundei rog cueng. Guenj de ne, simhai couh ndei.

Soujgih daxmeh mbouj dingz yubyab, gou nyaenx mbouj ndaej dawz daeuj yawj. Cij raen henz aen siengqgyaeuj caeuq Huz lauxsae doxdoengz haenx biumingz aen coh daxboh. Dahraix, dwg gij gou liuh daengz haenx. Hw, gou caen dwg boux diencaiz ndeu, mbat ndeu couh yawj byoengq lo. Vihliux cingqsaed gou liuh daengz haenx, gou bued daengz gyaiqmienh daxboh daxmeh gangjgoj haenx, gingqyienz mbouj miz saek yiengh, baez yawj couh dwg daegdaengq guh baenz yienghneix. Gou youh yungh banhfap hoizfuk gij geiqloeg gangjgoj, miz gij gangjgoj daxmeh hawj gou yawj haenx dahraix.

Yienznaeuz dwg gou liuh daengz haenx, hoeng uk gou lij dwg camhdingz sam miux cung, gvaengzda gingqyienz miz di cumx. Mbouj siengj daengz daxmeh vihliux hawj gou hagsib miz saenqsim, gingqyienz cangguh caeuq lauxsae gangjgoj daeuj gujli gou. Mwhde, daxmeh daihgaiq liuh daengz gou gaenq fatyienh de guhgyaj, byaij gvaqdaeuj bekbek gou: “Neix mbouj dwg vih mwngz ndei ma.” De miz di simhaw ndwn youq baihlaeng gou. “Gij bajheiq mwngz gou caeux couh yawjok lo, gou daegdaengq boiqhab mwngz hane.” Gou diuqbeiz yaepyaep da coh de. Daxmeh sim’angq riu lo.

“Baez ndeu gauj mbouj ndei suenq maz lo, saetbae saenqsim cij aeumingh ne. Lwg ha, laebdaeb roengzrengz ba, daxmeh siengsaenq mwngz!” Gangj sat, daxmeh yungh rengz bek aen mbaq gou. Gou ngaekngaek gyaeuj suenq dwg han daxmeh, ndawsim gag naeuz: Gou itdingh roengzrengz, gyo- mbaiq daxmeh!

(Nanzgingh Si Siujyingz Siujyoz roek nienzgaep Vangz Swjyenz)