Yangz Siujsinh, vunz Bingzgoj Si Daibingz Cin Cazmiz Cunh Mbanj- buzranz, de okseng ndaej bi he le, baenz baez binghnaek he, bienq baenz boux dafangz he. Bohmeh guhhaemz gwnhoj, siengj caenh banhfap, dauqcawq ra canghyw, doeklaeng hix yw mbouj ndei lwgda de.

Aenvih mbouj miz gijmaz souhaeuj, youh bibi ywbingh, ndaw- ranz hojndoq, daengx ranz vunz ciengzciengz gwn donq neix ra donq haenx, doeklaeng ndaejdaengz dangj gvansim caeuq cwngfuj bangcoh, ranz de gwn imq daenj raeuj, saedceij gvaq ndaej mbouj you mbouj heiq.

Bien fwen neix, lwnh de dafangz le, gvaq saedceij baenzlawz mbouj fuengbienh、bohmeh baenzlawz sinhoj ra ngaenz hawj de ywbingh、bae doegsaw bungzdaengz saeh、baengz- youx baenzlawz doxbang doxfuz、beixnuengx baenzlawz mbouj yiemz mbouj cuengq、dangj caeuq cwngfuj baenzlawz soengq gwn soengq daenj okdaeuj.

Fwn doek byaj raez moq,

Rwi doq mbin faenfaen,

Gwnzbiengz haeux duh baenz,

Gizgiz raen hoenghhwd.

Fwn doek byaj raez gvaq,

Lajdeih faex nywj heu,

Gou boux dafangz ndeu,

Eu fwen daeuj lwnh goj.

Raek gouj ndwen dungx meh,

Deq ngoenzseng daeujdaengz,

Bohmeh gag doxyaeng,

Sim angq saengz angq meih.

Raek gouj ndwen ndawdungx,

Meh ngoenz mungh(mwnh) geij

baez,

Lau seng raeuz mbouj ndei,

Mbei cieg lumj raemxgoenj.

Raek dungx meh gouj ndwen,

Bak wen gwn mbouj feih,

Ndwn ninz mbouj hab’eiq,

Heiq lumj raemx dumh mbwn.

Ngoenzde gou doekfag,

Cak daengz meh yaek dai,

Muengh raeuz baenz vunz gvai,

Meh ngoenz dai geij sauh(yaep).

Ndaejnyi daej ok sing,

Bohmeh sim hailangh,

Raen genga rox sangj,

Bouxboux angq ndawsim.

Baez ndaejnyi sing daej,

Bohmeh heiq ndawsim,

Ndaejnyi daej ok sing,

Hix ninz mbouj baenz naengh.

Meh seng gou okdaeuj,

Haeujok haenh lumj gim,

Bouxboux gyaez daeuj cim,

Bohmeh sim hailangh.

Gou doekfag daengz laj,

Yiuq haeujnaj hix baenz,

Fouq lwgda hix gaen(gvai),

Baenz bouxvunz lumj doih.

Seng okdaeuj hix ndei,