Cuengqgyaj le，gou caeuq mehyah guhdoih okgai bae youz，byaij gvaq gaidoeng seiz，yawj raen aen diemq he baij miz haujlai doxgaiq，rimraengraeng baiz daengz bakdou daeuj. Bakdou baihgwnz raiz miz geij cih saw：“Yienghyiengh song maenz”.

“Yienghyiengh song maenz?” Mehyah doq gangj doq byaij haeuj ndaw diemq bae，yaep he couh senj ndaej haujlai yiengh doxgaiq okdaeuj lo. Gou naeuz de gij doxgaiq mbouj gaenjaeu hix cawx guhmaz，mehyah fatheiq fofo naeuz：“Mwngz raen song maenz ngaenz dij lai bw?”

Gou gag ngeix ndaw dungx，seizneix guekgya fouqmiz，lwgminz ra ngaenzcienz gig heih，bouxboux miz gwn miz daenj，song maenz ngaenz doiq gyoengqvunz seizneix daeuj gangj，cungj mbouj gvaq lwgda gyoengqde. Hoeng，bouxlawz rox, mwh gou doeg siujyoz，song maenz ngaenz doiq gou daeuj gangj，caendwg gig naek gig hung bw.

Mwh gou ngamq haeuj hagdangz doeg it nienzgaep，daxboh gou couh binghdai lo，vut ce dou geij meh lwg gag youq.

Seizhaenx，ndawmbanj ngamq- ngamq faen reihnaz daengz hoh，dou geij beixnuengx nienzgeij cungj lij iq, ndawranz ngamq miz daxmeh boux vunz ndeu bae guh reihnaz. Daxmeh ndangdaej yoq, ciengzciengz baenzbingh, guhhong mboujmiz rengz, ganq hong mbouj gib, youh mbouj miz ngaenz cawx feizliu, haeuxyangz haeuxnaz cungj mbouj baenz geijlai, daengx bi daengz haemh cij gwn haeuxcuk imq, gaej gangj naeuz miz ngaenz yungh lo.

Siujyoz bizyez lo, seizhaenx mbouj dwg yivu gyauyuz, naemj bae doeg cuhcungh, aeu gaujsi cijndaej. Mbangjseiz aen yozyau ngamq miz song sam boux hagseng gauj ndaej bae doeg cuhcungh, lamq roengzdaeuj couh youq ranz guhhong roxnaeuz okbae dajhong gvaqciuh lo.

Lauxsae geij ngoenz gaxgonq couh gangj hawj gak boux doengz- hag nyi， seizgan bauqmingz gaujsi ngoenzcog sat lo，ceiq nguh ngoenzcog gvaqringz itdingh aeu gyau song maenz ngaenz，mbouj gyau couh mbouj ndaej bae gaujsi，mbouj gaujsi couh mbouj ndaej bae doeg cuhcungh lo.

Gou cuengqhag ma ranz le couh gangj hawj daxmeh nyi, daxmeh nyaeuqnaj naeuz：“Gou bae ciq daeuj hawj mwngz ba.”

Haetromh gou rumzrag hwnj- daeuj, naemj heuh daxmeh aeu song maenz ngaenz bae bauqmingz gaujsi，hoeng，ranzding caemrikrik，gwnzdaiz miz bat haeuxcuk ndeu，daxmeh mbouj rox bae gizlawz lo. Gou ngeixnaeuz daxmeh bae cuengqvaiz，hoeng，duzvaiz lij youq lajriengh.

Mbouj miz ngaenz bae hagdangz hix mbouj miz yungh，gou raemxda doekbyagbyag，singhung heuh：“Meh a，mwngz bae gizlawz，maranz vaiqdi aeu song maenz ngaenz daeuj hawj gou.”

Banngaiz, daxmeh cij hanh rihroenroen dauqma ranz. Gou fatheiq hemq daxmeh vihmaz bae lawz mbouj dauq vaiqdi aeu ngaenz hawj gou. Daxmeh raemxda doekboebboeb naeuz：“Lwg a，haetneix meh bae mbiengj goengda ciq ngaenz，ranz gyoengqde hix gungzhoj，hix mbouj miz ngaenz ciq hawj raeuz，mingh raeuz cawq dwg yienghneix lo，mbouj ndaej doegsaw couh ma ranz caeuq meh guh reihnaz gvaqciuh ba.” Gangj le，daxmeh couh cuengq duzvaiz ok- riengh bae lo.

Gou gig siengsim，hix mbouj rox ngeix gijmaz，ngamq rox doq daej doq nauh daxmeh aeu song maenz ngaenz.

Daxmeh cuengq duzvaiz daengz gyangdoengh，gou hix riengz daengz gyangdoengh, cungj rag fajfwngz daxmeh nauh aeu song maenz ngaenz. Daxmeh fouznaih doq bengq cagvaiz doq rag fwngz gou, raemxda lae- byagbyag，mbouj rox gangj coenz vah.

Gvaq banringz le，gou rox seizgan bauqmingz gvaqbae lo， gou siengsim linlin buet maranz, ngeix daengz ciuhvunz baezlaeng aeu guh reihnaz daengxciuh，gou ndawsim gig mbouj fugheiq，hoeng，hix mbouj rox guhlawz baenz. Youq ndawranz baenqlulu，ndwn mbouj dwg ndwn，naengh mbouj baenz naengh，hwnj gwnzmbonq bae aeu moeg goemqgyaeuj daejuu.

“Gveiq a，mwngz youq ranz lwi？”Seizneix fwt dingqnyi miz vunz heuh gou，gou byaijok bakdou baez yawj，laxlawz dwg bouxyoux gou——Vangz Yungzlij. Gou raen gyangfwngz de gaem mbaw ceij ndeu, de saenqsaenq mbaw ceij coh gou naeuz：“Mwngz vaiqdi dienz aen biuj bauqmingz gaujsi neix，haetcog dawz bae gyauhawj lauxsae bw.”

Gou youh doeksaet youh angq- yangz：“Gou mbouj miz ngaenz gyau bauqmingz gaujsi bw，guhlawz ndaej dienzbiuj a？”

“Lauxsae naeuz mwngz doeg saw rox， itdingh gauj ndaej cuhcungh bw.” Bouxyoux riunyumnyum naeuz，“Gou doeg saw laet lai，gaujsi itdingh gauj mbouj ndaej，vaih song maenz ngaenz dem bw，dauqnyienh nyiengh hawj mwngz bae gauj lo.” Gangj le de son gou yienghlawz dienzbiuj，couh byaij bae ranz lo.

Bihaenx gou gauj hwnj cuhcungh dahraix，doeklaeng daxmeh gai duz- vaiz bae vuenh aeu ngaenz，caiq ciq ngaenzhangz dem，cijndaej gaeuq gou doegsaw. Gauhcungh bizyez fouzfap doeg daihhag，dauq lajmbanj dang lauxsae daigo，doeklaeng hix ndaej cienjcingq，miz yiengj lingx， mbouj lau mbouj miz song maenz ngaenz yungh lo.

Bouxyoux gou mbouj ndaej doeg- saw le，youq ranz bang bohmeh guh hong geij bi，doeklaeng riengz gyoengq vunz okbae dajhong，youq giz dajhong aeuyah dinghyouq roengzdaeuj，bingz- ciengz gig noix dauq ranzgaeuq.

Gou gig siengjniemh bouxyoux. Mbouj rox de seizneix gvaq baenz yienghlawz，mbouj miz de，couh mboujmiz gou gwndaenj ngoenzneix，gij aencingz de ciuhvunz gou bauqdap mbouj hwnj.