Aeueiq bouxwnq dwg cungj daudwz ndei gauhsang ndeu. Dwg daejyienh boux vunz ndeu miz mbouj miz siuhyangj. Youq ndaw hagsib gwndaenj bingzseiz, baenzlawz aeueiq bouxwnq ne? Haenx couh dwg mbouj hawj bouxwnq saetnaj.

Miz baez ndeu guhlaeuj, gwn daengz doeklaeng, bouxfugsaeh dawz bat raemxsaw ndeu daeuj. Neix dwg gij raemx swiq fwngz, hoeng bouxhek mbouj rox, gwn gaemz ndeu, mwhde bouxcawj hix dawz hwnjdaeuj gwn gaemz ndeu. Yienghneix, daihgya youh laebdaeb gangjgoj. Danghnaeuz dangseiz bouxcawj vixok bouxhek loek lo, saehcingz doeklaeng couh mbouj ityiengh lo.

Byawz cungj muengh ndaejdaengz bouxwnq aeueiq. Aeueiq dwg song mbiengj bw, yaek ndaejdaengz bouxwnq aeueiq, mwngz yaek aeueiq bouxwnq gonq. Miz doengzhag gauj ndaej ca lo, mwh de cingq najmong dwk ngaem gyaeuj, danghnaeuz mwngz sing hung gangj ok gij cingzcik de, couh hawj de gig hozndat; mwh doengzhag hoizdap vwndiz, gaenjcieng ndaej gangjvah gazdwddwd, danghnaeuz mwngz sing hung riu okdaeuj, couh hawj doiqfueng gig hojsouh; gwnz yindungcangz, doengzhag yungh rengz baez diuq, deng laemx lo, danghnaeuz mwngz hemq ok sing bemx de, couh hawj doiqfueng engqgya mbouj miz saenqsim lo.

Swhgeij mbouj siengj guh haenx, gaej ep hawj bouxwnq. Aeueiq bouxwnq, couh dwg aeu gij danaj bouxwnq cuengq youq daih’it.

(Vuj Fungh)