Gou geiq ndaej, mwh iq gou miz haujlai seizgan dwg youq lajmbanj youq. Moix baez cuengq sujgyaj, bohmeh cungj soengq gou bae lajmbanj ranz daxgoeng daxbuz youq, dahcej ranzcoj ciengz daiq gou seiqlengq bae guhcaemz.

Gou ceiq maij lajmbanj mwh ngamq doek fwn hung gvaq le. Mwhde hoengheiq daegbied singjsien, mbawfaex engq heu lo, heuyauyau lumj yaek miz raemx ndik okdaeuj nei, rumz hix mbouj ndat geijlai lo, ndaw hoengheiq gap miz feihfwn caeuq feihnywj, ndei mbup dangqmaz. Daxgoeng yousim fwn hung rwed vaih gomeg, itdingh bae ndaw naz yawjyawj, gou caeuq dahcej mbouj siengj youq ndaw ranz youq, hix nauh riengz daxgoeng bae.

Fwn doek gvaq le gwnz loh iq miz haujlai gumz raemx iq, gou caeuq dahcej it loh caij gumz raemx byaij, angq dangqmaz. Seizneix gou lij geiq ndaej baez daih’it youq ndaw gumz raemx raen moed- raemx haenx. Gou doeksaet ndaej hemq hwnjdaeuj, maeuq youq henz gumz raemx cimyawj duzde. Moedraemx maj miz roek gaiq ga saeqset, aen ndang saeqraez, gig lumj duzmoed ga raez. Duzde byaij loh baez yat baez yat, ndeiriu lai lo. Gou caeuq dahcej sawq bae gaeb de, hoeng duzde yat ndaej gig vaiq, gaeb haujlai nanz cij gaeb ndaej geij duz. Dou lij guh gij saeh “doegsieb”: Aeu moedraemx gaeb ndaej haenx caeuq boengz doxgyaux, yienzhaeuh moek roengz ndaw namh bae.

Caj guhcaemz gaeuq lo, ngaem gyaeuj baez yawj, gwnz vaq cungj dwg boengz, gouh haiz engq mbouj yungh gangj lo, uq ndaej mbouj miz da yawj. Gou caeuq dahcej hixnaengz duet haiz bae. Ha, mbatneix cwxcaih lai lo! Dou lohdin byaij youq gwnz loh homq, louz roengz song coij rizdin mbitmbit mbiengmbieng.

Haemq vaiq, doengngoenz okdaeuj lo. Mbouj yaep ndeu, gwnz dieg deng ndit dak ndaej ndatfwdfwd lo, lohdin byaij youq gwnz dieg cungj roxnyinh miz di nad din lo. Song boux dou daeujdaengz nazmeg, gomeg cungj okriengz lo, riengzmeg deng fwn rwed gvaq le heuyauyau, doengh nazmeg riengz rumz ci fubfed diuqfoux dwk.

Ma daengz ranz, daxbuz raen gij yiengh diuqgah dou, cungj noix mbouj ndaej miq dou, dangyienz, lij miz donq haeuxbyaek homfwdfwd ndeu caj dou ne.

Youq ranzcoj lajmbanj gvaq gij saedceij angqfaengz haenx, dwg gij ndaejgeiq gou ciengx- lwenx mbouj lumz haenx.

(Sanhdungh Swngj Dunghyingz Si Sizyen Siujyoz haj nienzgaep Vangz Swnggiz)