Gou bet bi seizhaenx, daxboh youq aen diengzhag cunghyoz lajmbanj guh lauxsae. Daxboh mbouj haengj gangjriu, de gingciengz nyaeuq bwnda, naj cix nyaeuq lumj aen lwghaemz nei, gij yienghsiengq de couh lumj bouxvunz yaek daej nei. Daxboh gig nanz ndaejhoengq, gwnz daizsaw de cungj doi rim swhliu, sang lumj aenbya iq nei, de cijndaej ngoenz daengz haemh naengh youq henz congz guhhong, mbat bit mbat veh, youq gwnz ceijlab raiz cih aenq saw.

Moix baez yinx ien le, de couh rubrab mo ok ci ien he daeuj haenqrengz cit geij amq, youh youq gij hoenz ien biufetfet neix guhhong lo. Moix daengz seizneix, gou muengh raen gij ngaeuz daxboh youh gaeuz youh geq seiz, gou gig nanzgvaq, gou geijlai maqmuengh swhgeij ndaej yungh bangxmbaq iqet gou bang daxboh dawz diuzrap de ha.

Gihvei cungjsuenq daeuj lo. Miz haemh ndeu, daxboh miz saeh ok rog, gou gipmuengz buet daengz baihnaj aen daiz sang caeuq gou ca mbouj geijlai haenx, nyaenx dwk gij simcingz gikdoengh youh angqfwgfwg haenx, yungh faj fwngz iq saenz- dedded gaemh hwnj gonj bitdiet, yousim lili, youq gwnz mbaw ceijlab daxboh caengz raiz sat haenx baez mbat bit baez mbat bit raiz roengz gij cih engq vang engq raeh swhgeij.

Daxboh gig vaiq couh dauqma lo, gou guhgyaj lumj mbouj miz saeh nei, muengzfwtwt buet deuz lo, ndawsim gag angq riu, danghnaeuz daxboh raen gij “cih ndei” gou, de dwg geijlai sim’angq ha. Bouxlawz ngeix daengz daxboh yawjraen mbaw ceijlab haenx le hozhwnj dangqmaz, mboujguenj sam caet ngeihcib it, sikhaek ndonj haeuj ndawrug bae, dawz godaih cingq ninz ndaek haenx lumj riuj duz gaeq iq nei rag roengz lajnamh moebndoiq hwnjdaeuj, itmienh ndoiq it mienh singsang ndaq. Naeuz godaih dawz gij ceijlab de sinsin hojhoj sij haenx cienz guh vaih lo. Gou baez dingqnyi, aen’ gyaeuj yiengjhuhu, dai lo, dwg gou dawz gij ceijlab guh vaih hani. Ngeix mbouj ndaengz “saehndei” bienq “saehvaih”, gou youh dwglau youh aeuqnaeuq. Geij baez siengj cung okbae nyinhloeng, raen daengz gij yienghsiengq daxboh dwklau haenx, gou youh mbouj gamj okbae, cij rox bomq youq gwnzcongz goemqbak daejswkswk. Daxboh laih- naeuz godaih dajlaih, engqgya hoz- hwnj, yaengx faj fwngz laux lumj fagcanj nei moeb dwk godaih, godaih in ndaej youq gwnznamh roux bae roux dauq daej mbouj dingz. Gou lau yaek dai, siengj buet okbae nyinh dwg gou guh, hoeng cungj mbouj gamj okbae, cij rox yungh faiq goemq bak dwk gongzngw’ngw daej.

Banhaemh, godaih aenvih in lai ninz mbouj baenz, seiz mbouj seiz daej geij sing, haujlai nanz cij ninz ndaek bae, gou aenvih gvaqeiq mbouj bae, ndawsim gig ienq, nanznanz ninz mbouj ndaek. Mbouj rox seizlawz, gou yawj raen daxboh laeglemx ndwn youq henz congz godaih, de nanznanz yawj dwk gij raemxda venj youq gwnznaj godaih haenx, menhmenh maeuq roengzdaeuj mo aen naj godaih, aen naj nyaeuq de cix venjrim raemxda. Laxlawz, daxboh yienznaeuz beizheiq haenq, gizsaed ndawsim de dwg gyaez lwgnyez swhgeij ne. Raen daengz neix, raemxda gou nyaenx mbouj ndaej doekbyoegbyoeg youq gwnzswiz……

Daj ngoenz haenx hwnj, daxboh simcingz mbouj ndei seiz, mboujcaiq dawz gou caeuq godaih ok heiq lo, de gingciengz gag danqheiq, gij nyaeuq gwnznaj de engq laeg engq maed lo, godaih hix bienq lo, de mboujcaiq guh saehrwix, lij daiq gou guhdoih bae diengzhag doegsaw. Gou ne, hix bienq ndaej rox di saeh lo, mboujcaiq guh- unj. Hoeng, gij saeh gaxgonq cungj lumj ndaek rin nei nik youq aensim gou, sawj gou mbouj haisim, ienq lailai.

Seizneix, gyoengqdou cungj maj- hung lo. Geij ngoenz gonq dou guhdoih maranz yawj daxboh, gou nyaenx mbouj ndaej dwen daengz gij saeh gaeuq simnyap haenx, daxboh caeuq godaih cungj riuhaha lo. Aenvih gyoengqde caeux rox gij saeh haenx dwg bouxlawz guh lo, cij miz gou mbajnyw’nyw mbouj rox. Seizde, gou hix siengj riu, raemxda cix laebyoegbyoeg roengzdaeuj, vih go- daih, vih swhgeij, engq dwg vih faenh cingz naek gangj mbouj ok bak neix……