Gou caeuq bouxgvan baenzgya geijcib bi lo, gij siengsim caeuq angqyangz yienghyiengh cungj miz. Gou mbouj miz gienzleih bae lwnh gvan gou ndei yak, hix mbouj siengj bae gangj gij saedceij cingzgamj baenzlawz yiengh, ngoenzneix dwg ngoenzseng gou, gou dauq siengj daengz aen huzlaeuj bouxgvan gou.

Caengz gezvwnh gaxgonq, gvan gou ndik laeuj mbouj gwn, bohmeh gou cungj naeuz gou miz lwgda genj ndaej boux vunzsai ndei ndeu, baenzgya gvaq bouxgvan hix mbouj gwn laeuj. Doeklaeng rox gwn laeuj dwg daj de daeuj daengz ranz gou le cij gwn laeuj. Sihlinz dwg aen dieg bya lai ndeu, cib geij bi gaxgonq, Sihlinz lij caengz saedhengz linzgenz gaijgwz cidu, bohmeh gou hwnj bya bae ndaem haujlai doenghgo haeux daeuj bangbouj gwndaenj. Gvan gou daeuj daengz laeng gou, couh lai boux vunz guhhong ndeu lo.

Seizhaenx de ngamq doegsaw okdaeuj mbouj geij nanz, couh caeuq dou hwnj bya bae haifwz lo. Lauheiq bouxgvan lij caengz ndaej lienh gaeuq, hwnj bya mbwn laep dauq daengz ranz, de couh naengh mbouj hwnj- daeuj lo. Gou yawj gig sim’in, lau miz ngoenz ndeu de couh lumj duz roeg iq ndeu mbin deuz, ciengxlwenx mbouj dauqma. Yienghneix, gou couh doiq de naeuz:“Mwngz gwn di laeuj ba, couh mbouj baeg lo.” De lumj gwn yw nei cimz le geng ndeu. Hwnz haenx, de maezsim raixcaix, de ninz daengz ranzrongh. Ngoenz daihngeih, de naeuz caen mbouj raen yienghhaenx baeg lo. Daj seizhaenx hwnj, gou haemhhaemh cungj hawj de gwn di laeuj ndeu.

Youq lajmbanj, bouxgvan dwg boux vunz guhhong ceiq youqgaenj ndaw ranz, hix dwg diuz saeumeh ndaw ranz. Bouxsai hix lumj go faex ndeu, gyoengq mehmbwk raeuz youq daej faex yietliengz. Gou rox bouxgvan, hix gig sim’in de. Hoeng doeklaeng, bouxgvan gwn laeuj yied daeuj yied lai, baengzyoux yied daeuj yied lai. Bouxgvan mbouj rox seizlawz couh cawx aen huz laeuj haj gaen ndeu, miz hek mbouj miz hek cungj cang rim bae. Miz ngoenz ndeu, ranz gou guh le aen ranzdajcawj ndeu, aeu haujlai diuz vengz. Bouxgvan daj mbat denva ndeu, haj roek boux baengzyoux couh hwnj bya bae raemj vengz soengq daengz ranz daeuj. Haemh haenx, gvan gou laeujfiz lo, gou gig ndatheiq, gou caeuq de doxceng hwnjdaeuj lo. Bouxgvan naeuz:“Baengzyoux daeuj bang ha, gou gwnlaeuj lai di lo, mwngz mbouj gawlwnh ba.” Gou lau yienghneix roengzbae, bouxgvan yaek bienqbaenz duz fangzlaeuj ndeu, yienghneix, miz ngoenz ndeu, gou swngz de mbouj youq, gou laeglemx yo aen huzlaeuj de hwnjdaeuj. Bouxgvan ra mbouj raen huzlaeuj, de mbouj gangj saek coenz, de rox gou gaenq yo huzlaeuj bae lo. Hoeng couh daj seizhaenx hainduj, de couh gag haeuj bya bae raemj vengz, baengzyoux de caiq hix mbouj daeuj bang, haujlai haemh bouxgvan hix mbouj naeuz gwn laeuj. Daengz ngoenz daihroek, bouxgvan sawqmwh baenzbingh lo, gou ganjmuengz soengq de bae yihyen, canghyw naeuz, de dwgrengz gvaqbouh cix cauhbaenz. Dangseiz gou sikhaek raemxda doek roengzdaeuj. Ok yihyen le, gou aeu aen huzlaeuj okdaeuj lo, bouxgvan yawj aen huzlaeuj, yawj yiengh de lumj ndwi gijmaz nei.

Bouxgvan bingh ndei le, de mboujcaiq gwn laeuj, hoeng beizheiq de lumj bienq ndaej gaenj di. Gou gag siengj: Dwg mbouj dwg gou guh mehmbwk mizseiz doiq bouxsai miz di gvaqbouh lo, mizmbangj gag goq bonjfaenh lo? Mwh gou naemj cungj mbouj ndaej lijgaij de, bouxgvan couh caeuq gou doxceng gij saeh hwnq ranzdajcawj haenx daeuj. Mbouj geij nanz, baengzyoux boux- gvan daj ndaw yienh daeuj yawj de, gou raen gyoengqde daeuj, gou cang mbouj miz saeh couh bae ciepcoux gyoengqde. Gou daengq bouxgvan guh byaek, gou couh daezhwnj aeu huzlaeuj bae daeklaeuj. Gwn seiz, gou caeuq baengzyoux bouxgvan doq gingqlaeuj doq gangjriu, hawj gyoengqde yawj mbouj ok dou gaenq doxceng gvaq, gyoengqde lij hoz- haenz dou dwg doiq gvanbaz ceiq doxgyaez ndeu.

Daj baez haenx hwnj, bouxgvan doiq gou yienghneix guh saeh gig gingqfug. Dou mboujcaiq doxceng lo, song dou doxrox, huzlaeuj bouxgvan gou hix mboujcaiq aeu bae yo hwnjdaeuj lo. Ngoenzneix bouxgvan naeuz:“Daeglwg, aeu aen huzlaeuj bae daek laeuj daeuj, haemhneix gou yaek gingq meh mwngz gwn cenj ndeu, ngoenzneix dwg ngoenzseng de.” Gou dingq le gamjdoengh dwk raemxda rih bae.

Gizsaed, huzlaeuj bouxsai cang haeujbae dwg laeuj get, ndingq ok- daeuj dwg cingzngeih gvanbaz.