Bouxvunz doekseiq daengz lajbiengz,

Mbouj yungh gaengjgiengz doiq

beixnuengx;

Caezcaemh damqra miz maqmuengh,

Guh ndei buengjyiengh hawj lwglan.

Caez guh huzndei aen sevei,

Gaemmaenh seizgei coh baihnaj;

Buekmingh haenqguh cungj mbouj caj,

Gyoengqraeuz ceiq ngah biengz huz-

haiz.

Bouxvunz ma lajmbwn,

Aeu ra gwn,

Vunz caeuq vunz caez youq;

Danghnaeuz gangj vahyaeuh,

Gyoengqvunz naeuq,

Nanz ndaej caeuq vunz ndei.

Aen sevei huzndei,

Vunzlai maez,

Byaengqsim bae gangjvah;

Bouxboux mbouj gangj gyaj,

Lumj doekgyaj,

Ngoenzngoenz maj ndaej baenz.

Guhsaeh miz gunnanz,

Sim gaej fanz,

Ra seizgan damqdauj;

Miz dangj daeuj lingjdauj,

Ndaej baenghgauq,

Haengjdingh gauj ndaej baenz.

Doxgap guh seng’eiq,

Ndawsim eiq,

Caez daeuj ngeih guh baenz;

Gyoengqvunz da hix raen,

Guh ndaej gwn,

Huzndei caen dahraix.

Hwnjhaw bae dajgai,

Caen huzndei,

Bae gwnngaiz mbouj heiq;

Simnduj seizseiz geiq,

Lai bae ngeix,

Ndaej baenzseiq vuenyungz.

Caezcaemh bae gwnlaeuj,

Aen sim raeuj,

Caez ngeix laeuq lohngaenz;

Mboujdwg loqfangzhwnz,

Da raeuz raen,

Laeujfiz caen doxmoeb.

Laeujfiz haici ma,

Caen daima(radai),

Bungq vunz dai gwnz loh;

Mboujdwg luenh gangjboq,

Byawz cungj rox,

Laeujfiz doq mbouj ndei.

Laeuj lai ngaih huzndei,

Laeuj daengz daiz,

Aeu lailai guenj bak;

Vih ndwenngoenz vaiqlag,

Saeh ndei yak,

Gag boux gag gaemdawz.

Yunghsim son lwgnyez,

Cungj mbouj sez(cuengqsoeng),

Rox mbouj ce conzdungj;

Vwnzmingz huzndei hoengh,

Sevei hoengh,

Bouxboux cungj angqyangz.

Lwgbawx caeuq gyabuz,

Caez doxhuz,

Youh haengj mu haengj hag;

Daengx ranz laenz baenz cag,

Ndaej vaiqlag,

Gij saehyak bienq ndei.

Seiqgyaiq mbouj huzndei,

Bei(bi) dem bei(bi),

Cungj raen meiz(miz) hoenxciengq;

Aen guek mbouj baenz yiengh,

Sim nanz siengj,

Minz mbouj yiengj vuenyungz.

Guek raeuz ndaej huzndei,

Youh mizmbei,

Bei(bi) dem bei(bi) haenqguh;

Dangj hawj raeuz hailoh,

Duet gungzhoj,

Guek wnq rox myaizrwi.

Sevei huzndei,

Gaemmaenh seizgei haenqguh,

Mbouj lau haemzhoj,

Cauh’ok cwngzgoj dingh lai.

Guh ndei huzhaiz,

Bouxminz simhai dahraix;

Gaenxguh mbouj naiq,

Guek fouq vunz maij dangqmaz.

Doxhuz damqra,

Raemxdah caeuq bya hix angq;

Raeuz miz aen dangj,

Doengh gij lajmbanj hix gyaeu.

Gyoengqvunz cungj naeuz,

Huzndei doiq raeuz miz leih;

Binaengz guh saeh,

Yienghyiengh swnhleih habhoz.

Duh raeuz Cunghgoz,

Vunzlai doxhuz haenqguh;

Dangj raeuz hailoh,

Doengh gij haemzhoj ndonjdeuz.

Gyoengqraeuz angq liux,

Bouxgeq siuyiuz cihcaih;

Vuenyungz vunz maij,

Haenqguh daihdaih huzndei.

Caezcaemh guh huzndei,

Haenqsim bae cauhmoq;

Haenqguh mbouj gangjboq,

Guekcoj coj(itdingh) bienq gyaeu.

Ndaemnaz ndaej fungsou,

Cungj mbouj you gwndaenj;

Gyoengqvunz guhhong gaenx,

Doenghgij gagsaenq giengz.

Bouxboux mbouj gaengjgiengz,

Caenh siengliengz guhsaeh;

Gyoengqvunz miz ceiqheiq,

Sevei ndaej huzndei.

Guek wnq raen simmaez,

Cungj siengj caez doxgap;

Guek raeuz cungj mbouj nyap,

Eiq doxgap caezhingz.

Doxgap ndaej caezhingz,

Siuyingzyingz(najriu) dahraix;

Gaen vunqdin dangj byaij;

Daih dem daih vuenyungz.

Dangjcunghyangh, yawj ndaej gyae,

Son raeuz lwgminz guh huzndei;

Mbouj ngeizvaeg, youh mizmbei,

Doengzcaez haenqguh mbouj cizngeiz

(ngeizvaeg).

Gwndaenj ndei, ndwenngoenz ndei,

Vih guek vih minz caez yamq bae;

Cien diuz mae, fanh diuz mae,

Laenz baenz cag hung dwg cag ndei.

Laenz baenz cag, ndaej cag ndei,

Miz rengz haenqguh engq fouqmeiz

(miz);

Minz gaez dangj, dangj dwg gaez,

Baihnaj miz feiz hix yat bae.

Roen miz oen, ciuqyiengh bae,

Aenvih miz dangj hai loh ndei;

Seizdaih moq, vunz simmaez,

Gvaq dah bin bya hix aeu bae.

Yawj seizgei, gaemh seizgei,

Caez veh lamzdoz guh ndaej ndei;

Guek bienq ak, guek bienq meiz(miz),

25 bi laeng engq huzndei.