“Roegenq iq, daenj buhva, bibi seizcin ma gizneix……”

Gou dwg ciengq golwgnyez《Roegenq Iq》majhung, hoeng mwh iq cix mbouj raen gvaq roegenq. Mwh iq, daxdaiq daiq gou ma ranzcoj, gou yawjraen gijmaz cungj roxnyinh geizheih. Neix dwg gijmaz? Gaeqlwg. Haenx dwg gijmaz? Bitlwg. Sawqmwh, gou yawjraen laj yiemhranz miz aen doxgaiq geizheih namh caep baenz he. Gou cam goengda: “Neix dwg gijmaz ha?” “Neix dwg aen rongz roegenq.” “Roegenq ne?” “Gaxgonq, moix bi seizcin roegenq couh dauqma youq, seizcou caiq mbin ma baihnamz gvaq seizdoeng.” “Yienghneix bineix seizcin gou ndaej yawjraen roegenq lwi?” “Ai!” Goengda damq gaemz heiq ndeu, hawj gou naengh youq gwnz daengq iq, menhmenh gangj saehcingz doenghbaez.

Cihhoz dwg giz dieg ndei bya heu raemx saw ndeu. Mwh goengda seizcoz, gizneix faex hung raemhrwd, namh bizbwd, seizcin godauz nding, goliux heu, seizhah va’ngaeux homfwd, seizcou doenghnaz henjrwgrwg, seizdoeng nae hoemq daihdeih hausagsag, vunz ndaw ranz humx henz feiz gangjgoj gwn saejdaeuz, angqvauvau. Mwhde mbwn daegbied lamz, gyanghwnz seizcou daegbied rongh, gwnzmbwn ndaundeiq deihded yubyab lumj caeuq daihgya gangjvah nei. Baez daengz vaiqhaemh, ranzranz conghheuq hoenzfeiz hwnjneuneu, cungj mup daengz gij heiq fwnz coemhfeiz. Raemx Dahcihhoz daengx bi lae mbouj duenh, raemxdah sawdik yawjraen daej dah, ciengzseiz miz bya doxgyaep guh’angq. Vunzlai haet ok ranz guhhong, haemh dauqma yietnaiq, vunz caeuq vunz doxhuz doxndei, yienznaeuz mbouj fouqmiz, hoeng gvaq ndaej gig vaiqvued. Mwhde, roegenq dwg anqseiz ma bw. Vunzlai hix angqcoux roegenq daeuj ranz caep rongz, aenvih roegenq dwg cungj roeg gitleih ndeu, ndaej haeuj ranz caep rongz dwg gienh saeh ndei ndeu.

Hoeng doeklaeng, siengjfap vunzlai bienq lo. Vunzlai hwnj bya raemj faex, gwnz bya ndoq- ndatndat. Hai bya caq rin, baenz goengq baenz goengq bya loemqlak ndoqndat, gizgiz cungj dwg rinsa sanq doek. Raiq Dahcihhoz hix deng gyoengqvunz vat sa vat ndaej cungj dwg gumz laeg. Dahcihhoz hix ndangj lo. Baenz gaiq baenz gaiq reih deng ciemq bae guh gunghcangj, baenz aen baenz aen vagunghcangj seizbienh baiz raemxuq, raemx- lajdieg deng uq lo. Mbwn bienq ndaej mongmwtmwt, ciengzseiz miz mokfaenx, ndaw hoengheiq sanqfat heiq gyanq. Ndaw bya doenghduz hix yied daeuj yied noix, luenh yungh nungzyoz, roeg hix gaeb mbouj daengz non, couhsuenq gaeb daengz hix deng doeg dai. Ndigah, haujlai bi roegenq cungj mbouj dauqma lo.

Gou dingq le gij vah goengda, yienznaeuz lij moengjmoengj doengjdoengj, hix roxnyinh haengjdingh dwg vunzlai guh loek cauhbaenz cungj cingzgvang neix. Caj daengz hwnjhag doegsaw, doeg daengz “roeghenj douh gwnz faex dak ndit, roegenq ranz lawz nyaengq hit(guh) rongz” hot sei neix, gou geijlai muengh mwh seizcin daeujdaengz ndaej yawjraen gwnzmbwn miz roegenq mbin ha!

Bi’gvaq seizcin, goengda dwk dienhvah hawj gou, naeuz roegenq doenghbaez youh dauqma lo, youq henz aenrongz gaxgonq youh caep aen rongz moq ndeu, haeujhaeuj okok nyaengq mbouj dingz. Gou angq lai lo! Sikhaek caeuq daxmeh ma yawjyawj, cij raen laj yiemhranz daxmeh roegenq nyaengq gaeb non dauqma, ndaw rongz seiz mbouj seiz miz geij aen gyaeuj ndonj okdaeuj, dwggyaez dangqmaz！

Daxmeh lwnh gou, geij bi neix cwngfuj yawjnaek vanzging baujhoh, gven dingz vagungh- cangj seiqhenz, doiq geng ndaem faex, mbouj hawj hai bya vat sa, mbouj ndaej seizbienh buqvaih swhyenz guekgya. Coih le Daigunghhuz、Maj- lenzdaiz daengj swnghdai gingjgih, youq gwnz bya ndoqndat ndaem faex. Ginggvaq geij bi neix ceihleix, mbwn youh bienq lamz lo, hoengheiq hix ndei lo, faex lai le yinx daeuj haujlai roeg iq. Baez daengz seizcin, va hom faex heu, ndaw hoengheiq cungj dwg feih hom va!

Byaij youq gwnz loh, seiz mbouj seiz miz roegenq damzbwd mbin gvaq, yienznaeuz sing de gig iq, hoeng gou dingq ndaej ok, gyoengqde cingq naeuz: “Gou gyaez dieg ndei bya heu raemx saw neix!”

Dwg ha, rangh ramx namh he, ciengx rangh vunz he. Henhoh ndei benq namh neix, cijndaej louz hawj lwglan bya heu raemx saw. Bya heu raemx saw, couh dwg byagim bya’ngaenz!

(Sanhdungh Swngj Cihboz Si Yenyingh Siujyoz Cij Gyahveij)