Rogcueng fwn doeksasa, naedfwn doek daengz gwnzcueng, aencueng angq ciengq “dak dak”, ndang de engq seuqcengh lo; naedfwn saj daengz gwnz gomak, gomak ajbak hemq “sa sa”, gogo ndoet dwk dungx bongq dungx vangj; gwnzcongz gyoengqvunz cix ninz dwk ndaekfotfot, ngoenzcog gyoengqde mbouj yungh hwnqcaeux bae caeuraemx lo.

ha, muengh ha! Muengh ndaundeiq, muengh ronghndwen, muengh dwk vaizdaeg roengz lwgcoh, gwnzmbwn lumj boizcaiq nei, doekfwn lo, lumj raix, lumj bok.

Song ndwen lai lo, gwnzmbwn lumj dwgcaengz lajdeih nei, naedfwn mbouj doek, daengngoenz hix lumj angq mboujgaeuq, mboujrox naetnaiq ityiengh, ciuq dwk gwnzdieg ndat- yagyag, doenghgo dairatrat, raemx- daemz hawq lo, raemxdah gat lo, raemxcingj mboek lo, gyoengqvunz hoj gwnraemx lo. Cijmiz gomak hojsik gyoengqvunz dwgrengz sinhoj.

Gomak doxiu naeuz:“Mbwn baenz rengx, raeuz cajcaj ba, mbouj ndaej yienghneix couh laemx. Danghnaeuz raeuz dai lo, gyoengqvunz haemzhoj guhhong baenz buenq bi, mbouj couh satsoq lo? Gyoengqde baenzlawz swnghhoz, baenzlawz ciengx lwg soengq lwg doegsaw, baenzlawz hauq bohmeh? Caiq cajcaj ba, mbouj daengz gaemzheiq doeklaeng mbouj ndaej laemx, dwgrengz raeuz di he, vuenyungz cienfanh gya.” Gomak laux cengq- cengq cehda, singdaemq naeuz.

Gomak iq dungx iek hoz hawq, caiq hix souh mbouj ndaej, daejnga- nga naeuz:“Meh, boh, gou dungxiek, gou hozhawq, meh, gou yaek gwnraemx, gou couh yaek dai lo, hw, hw hw, hw hw hw……” Sing daej cienz doh lajbiengz, gok daengz gwnzmbwn.

Gomak daxmeh nyubnyub myaiz, cengqgengz hannaeuz:“Lwg ha, caiq cajcaj ba, mboujdan raeuz dungxiek hozhawq, gyoengqvunz engqgya yaek iekdai. Raeuz caiq nyaenxnyaenx di ba! Mwngz yawj, ranznden miz geij go gaenq dai lo, haujlai youh henj lo, danghnaeuz raeuz caiq mbouj ceng gaemzheiq, baenzlawz doiq ndaej hwnj gyoengqvunz?”

“W! Meh, raeuz itheij roengz- rengz cajcaj!” Mehlwg couh yiengh- neix mwngz gawq gou coenz, doxnai doxbang lix roengzdaeuj lo.

Gamjdoengh deih gamjdoengh mbwn, muengh ndaundeiq muengh ronghndwen, caj daeuj gwnzmbwn doekfwn lo.

Gou mbouj ndaem reih ndaem naz, mboujmiz saek go mak, gou lohgvaq henzreih henznaz, cix doeg rox gij vah gomak, dingq rox gij sing gyoengqvunz. Aenvih gou dwg lwg nungzminz, seiziq gij saeh haemzhoj lumj yawj denyingj loh youq baihnaj gou.

Doeg siujyoz seiz, gou bouxvunz daemqiq, cijmiz mij samroek, hoeng, rap byaekmou daeh raemxbyaek, ndai nyaengqreih lik mbawoij, yiengh- yiengh guh gvaq. Vihliux aeu ndaej song maenz ngaenz cawx doxgaiq, gou lij daengz liz ranz 4 goengleix bae rap sae’gva ma gai.

Geiq ndaej miz baez ndeu, dou daengx ranz haj boux itheij bae dwk vafeiz haeuxyangz, gou、daeggo、daegnuengx moix vunz sam coij, byawz ndaej byawz dauqma. Daeggo daegnuengx vunzsai mizrengz, songde baz ndaej seiq haj baz, gou cix ngamq ndaej saek song baz, songde ndaej coij he, gou ngamq ndaej saek cib go. Diemjcung gvaqbae, songde lumx liux, riu dwk angq dwk baeranz lo. Gou ngamq ndaej coij lai di, daxboh daxmeh gag guh faenh hong de, coenz vah cungj mbouj gangj. Ciemhciemh dwk, gou dungxiek hix hozhawq, dinfwngz mboujmiz rengz, nyaenx mbouj ndaej daejfwtfwt. Ranz gou miz gvigawj: Gak vunz gak faenh, mboujmiz doxbang, byawz ndaej byawz youq. Vihneix gou cijndei doq daej doq guh, itcig daej daengz lumx liux, youh daej dwk dauq ranz, vanzcienz mboujguenj gij vunz gwnz loh baenzlawz gangj.

Seizneix siengj daeuj caen najmong, hoeng, gou engq docih daxboh daxmeh dingh gij gvigawj, aenvih de hawj gou roxdaengz gijmaz heuh “haemzhoj”, hawj gou roxdaengz “siengj mbouj dwgrengz haemzhoj cijmiz roengzrengz doegsaw”, hix caemh cijmiz ngoenzneix vuenyungz swnghhoz gou.

Gou siengj dawz gij vah gangj hawj sou dingq, cienz hawj hagseng nyi, muengh gyoengqde dingq bohmeh gangj, dingq lauxsae gangj, mbouj nyaemx soujgih, noix maez youzhi, roengzrengz doegsaw, mbouj sai seizgan, doiq hwnj bohmeh, doiq hwnj swhgeij.

Gomak muengh doekfwn, gou muengh hagseng cangqheiq majhung.

Muengh