Duzguk youq gwnz bya guh daihvuengz, de gamj gaeb duzmou、duzmax、duzyiengz gwn, hoeng de gag lau duzvaiz. Duzguk vihmaz lau duzvaiz ne?

Cienznaeuz seizgonq, duzguk youq gwnz bya gwn raeg gij nyaenhung nyaen’iq le, roengz laj bya daeuj cimh doxgaiq. Miz ngoenz ndeu, duzguk daeuj daengz henz dah, raen duzvaiz ndeu gwn nywj. Duzguk dungxiek yaek dai, hoeng raen duzvaiz youh sang youh hung, de nanq hoenx mboujhingz duzvaiz, couh mbouj gamj raen naj doq gaemj. De yawj duzvaiz baez ngvanh yaep ndeu, menhmenh byaij gvaqbae cam duzvaiz: “Mwngz heuh maz coh?” Duzvaiz han: “Gou heuh duzvaiz.” Duzguk naeuz: “Raeuz gyau lauxdoengz baenz mbouj baenz?” Duzvaiz naeuz: “Danghnaeuz mwngz miz sim, gou couh nyienh’eiq caeuq mwngz gyau lauxdoengz.” Duzguk naeuz:“Daj ngoenzneix hwnj, raeuz couh miz doxgaiq doengzcaez gwn lo.” Duzvaiz naeuz: “Ndei ha, seizneix mwngz couh caeuq gou itheij gwn nywj ba!” Duzguk naeuz: “Gou mbouj gwn nywj.” Duzvaiz cam: “Mwngz ij gwn gijmaz?” Duzguk naeuz: “Gou ij gwn noh.” Duzvaiz mbat dingq doq rox duzguk mbouj an simndei, hoeng de cix cang guh mbouj rox lwk. Duzguk yawj raen duzvaiz gwnz dingjgyaeuj hwnj song diuz gaeu, youh ngvanh yaep ndeu, cam duzvaiz: “Song diuz gaeu gwnz gyaeuj mwngz yungh gijmaz guh ne?” Duzvaiz naeuz: “Yungh noh guh lo, mwngz yawj mbouj rox ma?” Duzguk naeuz: “Yungh noh guh ha! Lauxdoengz, song diuz gaeu mwngz ndeiyawj, hawj gou gaenh yawj mbat ndeu ndaej mbouj?” Duzvaiz naeuz: “Mwngz haengj yawj couh yawj ba.” Duzguk dingq duzvaiz baenzneix gangj le gag riunyaen, nyinhnaeuz duzvaiz ngaiz de yaeuh lo, byaij gvaqbae song yamq doq sawqmwh hai bak haeb diuz gaeu duzvaiz. Byawz rox, duzvaiz diuz gaeu geng dangq diet, duzguk mbat haeb heuj in dwk yaek doek. Duzvaiz gaenq rox duzguk ij gwn de, vanzlij cang guh ngawz lwk, cam duzguk: “Gij heuj mwngz humz lai ha, vihmaz haeb diuz gaeu gou ne?” Duzguk nyaenx dwk gij heuj youh in youh dot, yaeuh duzvaiz naeuz:“Gou sawq yawj gij gaeu mwngz geng mbouj geng lo.” Duzvaiz youh cang guh mbouj rox- nyinh saekdi, ngaemgyaeuj gag gwn nywj, song ceh da cix caeg yawj duzguk vanzlij ij guh gijmaz banz- daeuz. Duzguk caemh cang guh mboujmiz maz saeh byaij gvaq henz bae, ngamq cienq daengz baihlaeng caekhangx duzvaiz, duzguk faemxfwg saet hwnjdaeuj, coemj gwnz ndang duzvaiz. Duzvaiz rox duzguk yak le gaenq re raixcaix, vaiq cienq ndang yungh song diuz gaeu dingj gvaqbae, dingjgyaeuj duzguk bungq deng gij gaeu duzvaiz le, ndang baez ngeng doq laemx gwnz daem, youh in youh ndatheiq. Duzguk dacaengz duzvaiz maenj song sing, caiq coemj gvaqbae hai bak ij haeb duzvaiz. Duzvaiz hujhaemz dwk nyaenx mbouj ndaej, song diuz gaeu caiq baez dingj gvaqbae, duzguk caiq ngaiz laemx gwnz daem, mbatneix duzvaiz couh haenqrengz yungh song diuz gaeu coeg aen dungx duzguk. Duzguk aen dungx ngaiz duzvaiz yungh gaeu camz song congh, lwed riuz lumj raemxmboq, couh vaiq gvih duzvaiz gouznyiuz: “Lauxdoengz, gou loek lo, nyiuz gou mbat ndeu ba!” Duzvaiz yiemzhaenq naeuz: “Mbatneix ndaej nyiuz mwngz, baezlaeng caiq gamj sienghaih gyoengqdou, gou couh mbouj nyiuz mwngz lo.” Duzguk cix gangj cix riuz raemxda: “Baezlaeng gou caiq mbouj gamj sienghaih gyoengqsou lo.”

Daj seizneix hwnj, duzguk raen duzvaiz couh mbouj gamj byaij bae gaenh lo. De mboujgag lau duzvaiz hung, youq ndaw ndoeng raen duzvaiz lwg byaij loengroen, de cungj mbouj gamj haeb duzvaiz lwg lo.