Saedceij ngoenz gvaq ngoenz, gou gaenq miz haujlai nanz mbouj raen daxmeh lo. Liz ranzmbanj geij bi, ngamq caj daengz ngoenz gvaq ciet le cij ndaejhoengq bae ranz caeuq bohmeh gwn donq haeuxcaeuz ndeu.

Gij feihdauh gwnzndang daxmeh lumj aen daengngoenz rongh nei raeujrubrub, hoeng miz baenz hix ndatndoek, miz baenz unqswnh.

“Ya, mwngz youh yawj densi le? Cozyez mwngz sij liux caengz?” Daxmeh youq ndaw ranzdajcawj yawj okdaeuj, gangj sangnengneng cam gou, hawj gou roxnyinh lumj yaek byajraez nei. Gou ganjgaenj gven densi bae, buet haeuj ndaw rugsaw bae sij cozyez lo. Raen gou buet haeuj rugsaw, daxmeh byaij gvaqdaeuj lumj boux lauxsae gaujsi yienghneix cim bae cim dauq. “Yaek gaujsi lo, geij ngoenz neix mboujndaej yawj densi lo, lai yawj di saw he, nyinhcaen sij saw ba.” Daxmeh dingz youq henzndang gou unqswnh naeuz. Gou ngaekgyaeuj diekdiek. Raen gou lauxsaed sij cozyez le de couh byaij okbae nyaengq gij saeh de lo.

Aencung venj youq gwnzciengz “dikdag dikdag” yiengj hwnjdaeuj, cib diemj lo, gou lij youq gwnz mbonq fan bae foek dauq ninz mbouj ndaek, ndawuk cungj dwg gij ciengzmienh dwglau ndaw densi banngoenz yawj- raen, denz goeb gyaeuj mbouj gamj yawj ok baihrog, daengxndang hanh dumz liux, song fwngz saenzdwddwd hwnjdaeuj, doeklaeng lau dwk daej oksing.

Daxmeh dingqnyi gou daejhwhw, gaenjgip buet gvaq rug gou daeuj, bengq bunzdenz gou hwnjdaeuj, umj gou haeuj rungj de bae, fajfwngz lumh aen gyaeuj gou unqswnh doiq gou naeuz:“Mbouj lau, mbouj lau, meh youq henzndang mwngz, gaej daej lo, ndeindei ninz ba.” Mwh neix, gij gyaez daxmeh couh lumj nditndat seizcin nei, ciuq dwk sim gou raeujrubrub.

Moix baez daengz ciet gvaq cieng, gou couh dauqranz yawjyawj, caeuq daxmeh gangjgangj gij saeh gou youq baihrog……Dingq daxmeh gangjgangj gij saeh ndawranz, saeh lajmbanj, hix dwg gou bak ngah lo, naemj gwn gij haeux byaek homrwdrwd daxmeh cawj haenx.

Gangj daengz gwn, gou couh ngeix daengz gak cungj yiengh gwn doxgaiq lij iq haenx. Daxmeh ciengz- ciengz cawj gak cungj gak yiengh doxgaiq hawj dou gwn. Ngamq byaij haeuj ranz, mup raen gij feihdauh haeuxnaengj homrwgrwg. O ho, caen ndeigwn!

Haeux cauj, dwg daxmeh ciengz- seiz guh hawj dou, de yungh raemx swiq seuq haeuxhau, dak hawq. Yungh bathang cauj, cauj baenz saekhenj gig ndeiyawj, gya di gyuyouz he, couh baenz gij haeuxcauj homrwgrwg, youh hom youh byot. Moix baez gou gwn ndaej song duix, daxmeh yawj dou ajbak nyaijngoepngoep, de youq bangxhenz naj riunyumnyum, riu dwk song ceh da laep baenz diuz sienq ndeu.

Gou gig gyaez gwn ceizmbarouh, engq gyaez gij ceizmbarouh daxmeh guh. Daxmeh guh ceizmbarouh caen dwg baenzgwn lai bw. De dawz haeuxcid muh baenz mba le couh yungh raemxraeuj caeuq mbahaeuxcid doxgyaux, naemj gwn van di couh gya dangzsahau caeuq gyaux cij ndaej. Gyaux baenz le couh hainduj guh ceizmbarouh lo, song fwngz laenx baenz aen baenz aen hung lumj aen daizgiuz nei le, youh mbon aen congh ndeu, dwk daeuhfouh soiq roxnaeuz baekheu haeujbae caiq laenx luenz ndei couh baenz, mbouj yungh cuengq daeuhfouh roxnaeuz gijmaz hix ndaej. Guh baenz ndei le cijndaej haifeiz cawj lo, dwk song sam rok raemx roengz rek bae, caj raemx goenj couh dwk dangzhoengz roxnaeuz dangzhau roengz ndaw raemx goenj bae, yaep he caiq dwk ceizmbarouh roengz bae goenj geij faen cung couh ndaej gwn lo.

Daek ceizmbarouh roengz duix bae, gij heiq de biu haeuj ndaeng daeuj hom raixcaix. Baez ndaej gwn geij aen, gwn imq lij naemj gwn, gwn daengz dungx youq mbouj onj bae cij youq.

Mwh deng daxmeh ngauzgyaeuj rangrang naeuz lumj sam ciuh mbouj raen ceizmbarouh nei, gwn mbouj baenz yiengh, naengh mbouj baenz naengh. Dou geij boux youq henz congz doq gwn doq riu, daxmeh caen doiq dou mbouj miz banhfap.

Daxmeh lij rox guh haujlai doxgaiq gwn dem. Haeuxnaengj haj- saek、faengxmaenz、ceizhaeux……yiengh lawz baenzgwn guh yiengh de.

Dou sam beixnuengx moix baez dauqranz, daxmeh couh haeuj ndaw ranzdajcawj bae nyaengqdetdet hwnj- daeuj, de boux vunz ndeu youq ndaw ranzdajcawj nyaengqdidi, hanh lae dumz geu buh de liux, hoeng de cungj dwg naj riuriri cawj gij haeuxbyaek ndei hawj dou gwn. Gij feihdauh haeuxbyaek riengz rumz ci ok rogdingh daeuj haenx lij daiq miz feihdauh daxmeh, hom raixcaix.

Gij feihdauh daxmeh, buenx gou ciemhciemh majhung. Gou gig vuen- yungz, moix bi cungj ndaej gwn daengz gak cungj haeuxbyaek daxmeh caenfwngz guh haenx. Gij hom youq byailinx ndaw bak hawj gou roxnyinh daengz, gij neix couh dwg gij feihdauh daxmeh. Gij gyaez daxmeh couh yo youq baihndaw haeuxbyaek, diemz- cubcub, laeglinlin yaenq youq ndaw- sim ndaw ukgyaeuj gou.