Gou soqlaiz cungj dwg genjgwn, vihliux gaij cungj sibgvenq mbouj ndei gou neix bae, daxboh daxmeh heuh daxdaiq daeuj, hai baez hoih ndawranz ndeu.

Daxboh gangjvah gonq:“Lij Gyahcwnz doengzhag genjgwn gig youqgaenj, ngoenzneix daegdaengq hai hoih ndawranz. Seizneix hainduj haihoih, cingj daxdaiq Gyahcwnz gangjvah.”

“Lan ha, gou mwh iq ndaw ranz hoj lai, gingciengz bae ra byaekcwx daeuj gwn, lienz aen manzdouz hau ndeu cungj mbouj miz gwn, engq gaej dwen gwn noh lo. Bingzciengz, ranz lawz danghnaeuz miz noh gwn, gij feihhom neix ha, ndaej cienz daengz byongh aen mbanj. Mwh soucingz mbouj ndei, ngoenz ndaej gwn donq ndeu suenq ndei lo. Gizlawz lumj seizneix, ngoenzngoenz cungj miz noh miz bya gwn, mwngz lij ngoenzngoenz genjgwn.” Baez dwen daengz gij ginglig deng iek, daxdaiq couh hainduj gikdoengh lo.

Ciep roengzdaeuj dwg daxmeh gangjvah lo: “Gou mwh iq beij mwh daxdaiq ndei di. Gou mbouj deng iek lo, ngoenzngoenz ndaej gwn imq, hoeng, ciengzseiz dwg haeux caemj byaekhamz gwn, noh ne, mbouj dwg gvaq ciet cungj raen mbouj daengz. Mwngz yawj mwngz seizneix, doxgaiq gwn daihbaj, couh lienz saejdaeuz hix dwg lai cungj lai yiengh.”

Daxdaiq caeuq daxmeh itmienh baij saedsaeh gangj dauhleix, itmienh lij mbouj lumz naeuz gou. Daxboh nyaenx haemq nanz le hix ndwn okdaeuj lo:“Daxmeh ngoenznaengz sinhoj cawj haeux hawj mwngz, noh byaek dapboiq ndei, yingzyangj yienghyiengh miz, mwngz lij genj sam genj seiq, gijneix mbouj gwn, gijhaenx mbouj gwn. Hawj mwngz ma daengz aen nienzdaih daxdaiq, deng iek yawjyawj, mwngz couh mbouj baenz- neix nanz fugsaeh lo!”

Aen nienzdaih daxdaiq liz gou gig gyae, gij gamjsouh gwn mbouj imq haenx dauqdaej baenzlawz yiengh, gou dwg mbouj miz banhfap siengjsieng. Hoeng, ndaej haengjdingh haenx dwg, raeuz miz gij gwndaenj ngoenzneix mbouj yungzheih, wnggai daegbied insik.

(Hoznanz Cwngcouh Si Ginh- suij Gih Ausinh Gozci Yozyau Lij Gyahcwnz)