“Dinglingling……” Sing lingz nauhcung hawj gou daj ndaw loq ndiu daeuj, gou nunu lwgda, saedcaih mbouj siengj hwnqdaeuj, caiq ninz yaep ndeu ba. Gou gven nauhcung, dajsuenq gvaq yaep ndeu caiq hwnq.

“A, mwngz baenzlawz lij caengz hwnq? Baehag yaek gvaiz lo, haeux- caeux gwn mbouj gib lo, vaiqdi vaiqdi……” Daxmeh itmienh raemh itmienh biengj denz gou. Gou sikhaek singj lo, ganjvaiq daenj buh cat heuj swiq naj. “Mbouj miz seizgan lo, haeuxcaeux youq gwnz ci gwn ba. Mwngz danghnaeuz caeux di hwnq couh mbouj yienghneix ganj lo……” Daxmeh youh ienq lo, ganjgip aemq daehsaw, ciep gvaq mienhbau caeuq cijvaiz daxmeh ndenq gvaqdaeuj haenx, roengzrengz riengz hwnj yamqdin daxmeh.

Mwh yaek daengz hagdangz, haeuxcaeux cungjsuenq gwn liux lo, gou yawj aen daeh coux mienhbau haenx uq gij ciengqmak, siengj dwk danghnaeuz daengq ci deng uq, youh deng daxmeh naeuz lo, gaem ndaw fwngz youh lau yaep he roengz ci buh gou deng uq, yienghneix couh ngauz cuengci roengz, swnhfwngz vut okbae. “Wt——” mbat sab ci ndeu, daxmeh youq henz loh dingz roengzdaeuj, naeuz: “Bae dawz nyapnyaj haxbaenh mwngz vut haenx gip dauqma.” “Meh, gou yaek daengz gvaiz lo!” Gou coi daxmeh. “Mbouj ndaej! Bae gip dauq- ma.” Gou yawj daxmeh mbouj lumj gangjriu, cijndei buet bae gip dauqma. “Gaemdawz daengz bakdou hagdangz caiq vut roengz doengjnyapnyaj bae!” Daxmeh caen raemhraex, di saeh neix nanzdauh beij gou baehag daengz gvaiz youqgaenj ha? Gou miz di siengj mbouj doeng, hoeng daxmeh mwh fatheiq hix gig dwglau, gou cijndei ciuq guh.

Banhaemh cuengqhag, daxmeh daeuj ciep gou, gou raen baiz daengq baihlaeng gyaq ci lai aen doengj- nyapnyaj iq ndeu. Daxmeh raen gou ngeizvaeg, riunyumj cam gou: “Gyanghaet baehag gvaiz lwi?” “Caeklaiq gou buet ndaej vaiq, ceng di ndeu couh daengz gvaiz lo, danghnaeuz mwngz mbouj heuh gou roengz ci gip nyapnyaj, couh mbouj yungh baenzneix ganj lo.” Daxmeh raen gou miz di ienq de, riuriu le, mbouj gangj vah.

Ma daengz ranz, daxmeh rag gou naengh roengzdaeuj, doiq gou gangj: “Daxmeh gag genjdauj mbat he, gou mbouj naemj daengz mwngz naengh baihlaeng gwn doxgaiq mbouj miz dieg vut nyapnyaj, ndigah gou ngoenzneix daegdaengq cawx doengjnyapnyaj caeuq daehnyapnyaj, baezlaeng mbouj ndaej caiq vut nyapnyaj ok rog ci bae lo.” Gou roxnyinh gig geizheih, daxmeh bingzseiz ragraix caezbienh, vihmaz ngoenzneix gou cijdwg vut aen daehsuliu ndeu ok rog ci bae, couh baenzneix yiemzsuk caeuq nyinhcaen ne? Daxmeh lumjdwg yawj ok gij ngeizvaeg gou, cam gou: “Mwngz rox moix bi miz geijlai bouxbaetgai aenvih daengz gyang loh baet nyapnyaj cix deng ci daemj dai bae lwi?” Gou bibi gyaeuj. Daxmeh ciep dwk naeuz: “Miz haujlai vunz youq mwh hai ci daj ndaw ci vut nyapnyaj ok rog ci bae, mboujdanh hawj aen singz uq, youq gwnz goengloh gauhsuz caemhcaiq ndaej yinxhwnj oksaeh. Bouxbaetgai ndaw singz dingzlai dwg nienzgeij haemq laux, hengzdoengh mbouj riengj geijlai, vihliux cingleix gij nyapnyaj vunzlai swnhfwngz vut ok rog ci haenx, youq gwnz loh ci bae ci dauq haenx gig yungzheih oksaeh.” Gou sawqmwh roxnyinh najmong, mbouj siengj daengz vut nyapnyaj ok rog ci gienh saeh iq neix ndaej yinxhwnj hux baenzneix hung. Gou naeuz: “Meh, gou rox loek lo, gou baezlaeng mbouj caiq vut doxgaiq ok rog ci bae lo.” Daxmeh riu dwk ngaek gyaeuj coh gou.

Laxlawz saeh iq mbouj iq. Doenggvaq gienh saeh neix, gou roxdaengz vut doxgaiq ok rog ci aiq ok saeh hung, hix roxdaengz le boux- baetgai sinhoj caeuq mbouj yungz- heih. Gyaezhoh vanzging, gangj goengdaek sevei, daj gou guh hwnj, daj seizneix guh hwnj. Danghnaeuz bouxboux cungj guh daengz mbouj vut nyapnyaj ok rog ci bae, couh ndaej sawj bouxbaetgai mienx oksaeh, aensingz raeuz couh engqgya seuqsak, saedceij vunzlai couh itdingh engq gyaeundei!

(Gyanghsuh Cangzcouh Si Yanghbinhhuz Siujyoz Hoz Cungh- han)