Mbanjmbwk bya heu raemx saw, seiqcawq miz raengzraemx ndei, ndaw raengz miz haujlai bya caeuq baeu sae, boux rox bae dwk cungj miz souhaeuj.

Mbanjmbwk miz ranz haemq hoj he, bouxsai heuhguh Daeghoj, yah de heuhguh Dahgungz. Gvanbaz neix miz song laeq lwgnyez. Bi haenx daegdaih doeg siujyoz roek nienzgaep, dah iq doeg ngeih nienzgaep.

Geizlaj, song beixnuengx neix couh swng hag lo, seizneix cienzhag mbouj caengz raen maenz ngaenz ndeu, Daeghoj gvanbaz ndaw sim gig gip.

Miz ngoenz he, Dahgungz doiq bouxgvan naeuz:“Ngoenzlwenz gou dauq ranz daxdaiq, daxdaiq doiq gou naeuz, mbanj raeuz miz haujlai aen raengz rangh dah iq, daxda miz aen geidiemjbya he, mwngz dawz baema, hawj boh lwgnyez ndaejhoengq bae diemj di bya ma dawz bae gai, lai miz di souhaeuj. Geidiemjbya gou gaenq dawz dauq, mwngz rox yungh lwi?” Daeghoj dingq le gig angq naeuz:“Rox yungh, yienghneix, gvaqlaeng raeuz couh mbouj hoj baenzlai lo.”

Daj haenx hwnj, mbwn baez laep, Daeghoj camboujlai haemhhaemh bae diemj bya, bae mbat ndeu diemj ndaej 3 daengz 5 gaen, daengz ngoenzhaw le, Dahgungz couh dawz bya bae haw gai. Miz seiz ndet guh byasauj louz hwnjdaeuj.

Yaek haihag lo, miz ngoenz ndeu, Daeghoj bungz raen Goengbet, raen Goengbet gwnz buh najaek naep aen dangjyenz veihcangh he. Goengbet riu dwk doiq Daeghoj naeuz:“Dingq gangj mwngz mboengqneix ciengz bae diemj bya, Baezlaeng diemj ndaej bya dauq dawz daeuj gai hawj gou, byalix bya- ndengj gou cungj cawx.” Daeghoj riu naeuz:“Ndei ha, yienghneix dou hix mienx ndaej dawz bae haw gai. Goengbet cingsaenz lai bw.”

Mbat daih’it dawz bya bae gai hawj Goengbet, Daeghoj naeuz：“Daxgoeng, gij byalix neix ngamq 5 gaen, gou mbouj ndaejhoengq senj geijlai, miz di rinsa nyapnyaj cab ndaw, cingj mwngz gaej yiemz, menhmenh senj okdaeuj ba.” Goeng- bet riunyumnyum naeuz:“Mbouj youqgaenj, gou menh senj okdaeuj. Mwngz dawz bya daeuj gai hawj gou, dwg gvansim gyaezhoh gou, dwg in dou bouxlaux, docih mwngz, neix gou lai hawj 10 maenz hawj mwngz.” Daeghoj lienz naeuz:“Mboujaeu mboujaeu, gou mbouj lai aeu cienz daxgoeng.” “70 maenz, dawz bae ba, mwngz diemj bya sinhoj lai.” Goengbet gangj sat, nyengh oet cienz hawj Daeghoj. Daeghoj gig mbouj ndei eiqseiq naeuz:“Docih daxgoeng, baez laeng gai bya hawj mwngz couh siuj aeu 10 maenz. O, daxgoeng, mwngz caeuq Buzbet cungj lingx gunghswh, mwngz ciq 2000 maenz hawj gou hawj lwgnyez doegsaw gonq ndaej lwi? Baezlaeng gou ra ndaej cienz menh boiz mwngz.” “Ndaej ha！Ngoenzcog gou bae lingx dauq, mwngz gvaqdaeuj aeu cienz. Gvaqlaeng mbouj yungh mwngz boiz 2000 maenz neix hawj gou lo.”

Daj haenx hwnj, Daeghoj moix diemj ndaej bya dauq couh dawz bae gai hawj Goengbet, Goengbet cungj riunyumnyum naeuz:“Dou youh ndaej gwn byacwx singjsien lo.”

Song sam ndwen gvaqbae lo, miz ngoenz he, Dahgungz cam bouxgvan:“Goengbet mbatmbat cawx bya, ranz de gwn ndaej baenzlai?” Daeghoj naeuz:“Gou hix ngeiz, ranz de cancan gwn bya mbouj mbwq? Gai bya hawj de, mizseiz ndaw cab miz di rinsa, de cungj mbouj naeuz. Moix baez lij lai hawj 8-10 maenz hawj gou. Goengbet caen ndei ha！Mwngz ndaejhoengq laeglemx bae damqdamq de, yawj de baenzlawz cawqleix bya lw.”

Dahgungz bae lieg Goengbet geij ngoenz le, de dauq ranz doiq bouxgvan naeuz:“Goengbet gwn bya mbouj liux, de dawz byalix byasauj bae gai hawj aen diemqlaeuj he, gyaqcienz gaen ndeu beij duh vunzwnq lai daemq 2 maenz. Fanz de dawz bya bae gai, bouxcawj diemqlaeuj cungj nem de cawx. Ngoenzlwenz ngoenzhaw, gou menhmenh bae aen diemqlaeuj haenx, raen Goengbet dawz bya bae gai lo, gou guhcaeg yawj dingq de caeuq bouxcawj gangjvah. Bouxcawj naeuz, Goengbet, mwngz cienzlai cawx bya, cienzsiuj gai bya, yienghneix guh saetbonj lai bw. Goengbet riu naeuz, lauxbanj ha, mwngz mbouj rox bw, gou nyaenx neix guh dwg banghoj. Mbanj dou miz geij ranzvunz haemq hoj, Daeghoj couh dwg ndaw gyoengqde ranz ndeu. Aenvih gou miz cienz, gou ndwen lingx geij cien maenz gunghswh, raen lwgnyez Daeghoj ndaej doegsaw, gou angq raixcaix. Neix gou sien bang ranz Daeghoj, ndwen laj caiq bang lingh boux ranzhoj, song sam ndwen bang ranz ndeu. Bang ngaenz mbouj suenq, lij aeu bang gyoengqde baenzlawz bae ra ndaej cienz. Hawj gyoengqde cungj bienq ndei hwnjdaeuj. Gou yienghneix guh, gyoengq vunzmbanj hix angq hane, mwngz roxnyinh gou guh ndaej deng lwi? Bouxcawj naeuz, deng, deng, dou hix aeu hag mwngz. Bang vunz dwg sou goengdaek, sou songlaux itdingh gyaeu ndaej 130 bi……” Daeghoj dingq liux gij vah yah de, gikdoengh dangqmaz, lae raemxda naeuz:“Goengbet caen ndei ha！Gvaqlaeng raeuz caeuq lwglan aeu……aeu lai in bouxlaux, lai……lai gyaez Goengbet Buzbet cij baenz bw……”