Gungcanjdangj banhsaeh,

Hab minzeiq,

Miz vi doengz duzbyaj,

Minz miz vuenyungz gvaq,

Riuhaha,

Dangj hanhmax goenglauz.

Bouxyauz doengz ngaenzva,

Youq ndawbya,

Mbwnrengx va nanzfat,

Dangj roengz fwn daeuj rwed,

Youq gak dieg,

Va fat yiengq daengngoenz.

Doenghbaez raeuz Yauzgya,

Youq ndawbya,

Gwn raghaz ciengx mingh,

Daekbaengh Dangj aencingz,

Raeuz Yauzminz,

Cij miz gwn miz daenj.

Ngeiqcib Daih gvaqdaeuj,

Mbwn engq raeuj,

Raeuz ndaej haeuj siujgangh,

Lwgminz angqyangzyangz,

Ndaw sim van,

Angqhemq Dangj fanhbi.

Bouxyauz youq ndawbya,

Hai lwgda,

Baihnaj raen gaz dat,

Vih raeuz miz fuk fat,

Dangj bag dat,

Ci gag ma daengz ranz.

Ngeihcib Daih gvaqdaeuj,

Vunzyauz raeuz,

Bouxboux gvaq engq ndei,

Guhhong yungh geiheiq(gihgi),

Ndei youh heih,

Baereih daenj haiznaeng.

Ngeihcib Daih hai gvaq,

Naz gwnzbya,

Mbouj baengh byaj ndaem naz,

Dienhguenq raemx miz ga,

Raih hwnjbya,

Ciengx haeuxnaz fungcanj.

Ngeihcib Daih gvaqma,

Raeuz Yauzgya,

Dauqcawq va hoengzoq,

Ranzranz haeuj laeuzmoq,

Sang hwnj fwj,

Lajroq doeng dahngaenz.

Raeuz Bouxyauz lwgminz,

Fouz gungzvunz,

Gvaq vuenyungz saedceij,

Gwnndei daenj hix ndei,

Minz muenxeiq,

Singriu beij byajraez.

Seizneix raeuz Yauzminz,

Ndaej vuenyungz,

Simhai doengz vamoq,

Cancan bya rengh noh,

Soengq laeujdoj,

Byaijloh naengh heiqci.

Byaheu raemxsaw moq,

Laux rengh coz,

Bouxboux guh vwnzmingz,

Va rang bya youz raemx,

Roeg caeuq gaeng,

Dem vunz caez diuqfoux.

Lajmbanj dem gwnzhaw,

Ndei lijyouz,

Cienzbouh fouz “seiq haih”,

Nou raeg maet hix dai,

Va mwnnyaij,

Meuz bae gai guh’angq.

Ngeihcib Daih cingsaenz,

Raeuz Yauzminz,

Aeu nyinhcaen doeksaed,

Daihgya caez oklig,

Fouz vunzgik,

Cikgig vih guekcoj.

Dangj hai loh gvangqmuengx,

Gak beixnuengx,

Caezsim gvangh(bongh) siujgangh,

Cizlieng sang fazcanj,

Caez riengz Dangj,

Gunggvan guh giengzguek.

Minzcuz daih doxgiet,

Ndongj baenz diet,

Vih guek lai ok rengz,

Caiq gvaq it bak nienz,

Guek engq giengz,

Minz beij sien lai fouq.

Cungguek Gungcanjdangj,

Naengh gyanghsanh,

Onjdangq cienfanh cou,

Gou guh fwen dangq laeuj,

Gak baengzyoux,

Daihcaez daeuj gingz boi.