Mboengqneix, gicej cam Swcigih Swnghdai Vanzging Dingh roxyiuj, bineix doxdaeuj, aen dingh neix hopheux lajmbanj raemxuq ngoenz- naengz baizcuengq、raemxhaeu raemxndaem caeuq ciengx doihduz uqlah daengj fuengmienh, laebdaeb gyagiengz cingjceih vanzging vunz- youq lajmbanj, caensaed gaijgez gij vwndiz “gip hoj you muengh” boux- minz ginzcung.

Ceihleix lajmbanj raemxuq ngoenznaengz baizcuengq fuengmienh, Swcigih Swnghdai Vanzging Dingh anbaiz ngaenzcienz cienhangh swcigih 1.05 ik maenz, haeujcoengh 27 aen yienh （si、gih） guh buek hanghmoeg cingjceih vanzging lajmbanj ndeu. Daengz seizneix, Nanzningz Si Majsanh Yen、Ginhcouh Si Bujbwz Yen、Ginhcouh Si Ginhnanz Gih、Gveigangj Si Bingznanz Yen、Yilinz Si Yicouh Gih、Bwzswz Si Denzdungh Yen、 Hozciz Si Duh’anh Yauzcuz Swciyen daengj dieg gaenq guhsat bienguh hengzguh fueng’anq, ceng- aeu 2023 nienz daej daengx gih lajmbanj raemxuq ngoenznaengz baiz- cuengq ceihleix cingzsoq daengz 25%.

Cingjceih raemxhaeu raemx- ndaem lajmbanj fuengmienh, aen dingh neix couzcomz ngaenzcienz 4700 fanh maenz, cungdenj cingjceih Nanzningz、Liujcouh、Bwzhaij、Ginh- couh、Gveigangj、Yilinz、Bwzswz 7 aen si laeb gih 17 aen yienh （si、gih） 23 aen hingzcwngcunh 26 dieg raemx- haeu raemxndaem, gyonjgyoeb ceih- leix diegraemx najdieg daih’iek 10 fanh bingzfuengmij, ginzcung ndaej ik 9.2 fanh vunz, gaijgez ndeindi raemx miz feih haeu、saek ndaem、soq cijbyauh gamcaek mauhgvaq daengj gij vwndiz vanzging yienhda bouxminz naeuz haenqrem haenx. Daengz 6 nyied daej, gaenq guhsat ceihleix dieg raemxhaeu raemxndaem 12 dieg, dieg ndeu cingq ceihleix, cingq guh hanghmoeg ciudouzbiu 13 dieg.

Cingjceih gij vwndiz ciengx doihduz uqlah fuengmienh, aen dingh neix cingjceih baizcaz baizcuengq cingzgvang henz dah ciengx doihduz, cujyau dwg donh dah nga Dah- bwzdunghhoz henz dah 20 cienmij dieg gapgyaiq Hozciz Si Bahmaj Yauzcuz Swciyen nem Bwzswz Si Denzyangz Gih. Daengz 6 nyied ndawcib, gizdieg neix seivunz gag bu guenjloh baiz raemxuq gaenq lid liux, riengh ciengx mou daih’iek 1400 duz ok riengh lid riengh liux, baujcang Denzyangz Gih Yifung Cin Mbanjbwzgyaz 138 ranz 504 boux gwn raemx ancienz.

(Ciuq 《Gvangjsih Yizbau》 Yiz Fungh Lanz Haugingj)