Miz dah niq ndeu, ndaw ranz gungzhoj. Miz baez ndeu, dahniq caeuq daxmeh bae haw, de yawjraen haujlai vunz humx aen dan gai duhngaz ndeu, couh cam daxmeh:“Vihmaz dan duhngaz neix gai ndaej baenzneix ndei?” Daxmeh naeuz: “Aenvih daengx aen hawciengz cij miz dan neix gai duhngaz!” Dahniq sawqmwh siengj daengz, cam daxmeh: “Yienghneix raeuz ndaej ndaem duhngaz gai lwi?”

Dingzlai bohmeh dingqnyi lwg- nyez baenzneix cam, aiq dwg yiengh- neix gangj:“Ndaem maz duhngaz? Ndeindei doegsaw, gaej doeng siengj sae siengj.” Roxnaeuz naeuz:“Ndaw ranz mbouj miz dieg ndaem duhngaz, raeuz hix mbouj rox ndaem.”

Hoeng, daxmeh dahniq cij han coenz vah genjdanh ndeu:“W, raeuz sawqsawq.” Yienghneix, mehlwg youq yangzdaiz ranz de ndaem duhngaz lo. Hoeng duhngaz maj okdaeuj mbouj geij nanz couh rozdai lo, dahniq siengsim dwk daej lo. Daxmeh nai naeuz: “Raeuz caiq sawqsawq.”

Mehlwg neix ra daeuj bonj saw gaisau baenzlawz ndaem duhngaz ndeu. Ciuq gwnz saw sij haenx, daxmeh youq yangzdaiz cang aen yiemz dangj rongh ndeu. Dahniq cam: “Baezneix raeuz ndaem baenz lwi?” Daxmeh han lumj baezgonq nei:“Raeuz sawqsawq.” Hoj- sik, baez daihngeih hix ndaem saetbaih lo.

Doiq gij saetbaih neix, gyoengqde senj laebdaeb sawq ndaem. Daxmeh fatyienh, gij yienzaen duhngaz rozdai dwg mbouj anqseiz rwed raemx. Hoeng daxmeh yaek bae guhhong, dahniq hix yaek baehag, mbouj miz banhfap anqseiz rwed raemx. Mehlwg song boux siengj ok aen banhfap ndeu, youq aen bingz suliu mbouj yungh haenx mbongq haujlai congh iq, ndaw bingz coux rim raemx, venj youq gwnz duhngaz, yienghneix ndaej lienzdaemh rwed raemx hawj duhngaz lo. Mwh cang aen bingzsuliu, dahniq cam daxmeh: “Baezneix ndaem ndaej baenz lwi?” Daxmeh gig miz saenqsim riu naeuz: “Raeuz sawqsawq ba.”

Duhngaz cungjsuenq ndaem okdaeuj lo, dahniq angq lai lo. Daxmeh yawj dahniq baenzneix angq, cam naeuz: “Raeuz dwg mbouj dwg sawq ndaem gij wnq?” Dahniq riu naeuz: “Raeuz sawqsawq!” (Lij Gyah)