“Gyayouz! Gyayouz!” Bouxgyauqlienh youq henz gikdoengh dwk bang gou gyayouz. Ha, cibbet miux bet! Gou angq dwk youq ndaw raemx diuq hwnjdaeuj—— cungjsuenq mauhgvaq gij giluz samcib mij swyouzyungj swhgeij lo!

Geiq ndaej mwh iq gou ciengzseiz baenz bingh, daxmeh couh hawj gou bae hag youzraemx. Mwh baez daih’it raen aen daemz youzraemx, gou geiz- heih dangqmaz, bouxgyauqlienh dak gou youq ndaw raemx lienh youzraemx. Ginggvaq hag duenh seizgan ndeu, gou gaemdawz gij dungcoz ceiq gihbwnj youzraemx haenx lo.

Hag rox gihbwnj dungcoz le, gou bungq daengz nanzdaez lo—— mbaetheiq. Mwngz rox lwi, danghnaeuz mbouj rox mbaetheiq, couh mbouj ndaej youq ndaw raemx youzraemx seizgan nanz, danghnaeuz mbouj siujsim doek roengz giz raemx laeg bae, lienz gij gihvei iet fwngz hemq gouqmingh cungj mbouj miz.

Bouxgyauqlienh naihsim sonyinx gou: Fwngz rex haenz daemzraemx, mbaet gaeuq heiq, dawz gyaeuj ndaem roengz raemx bae, caiq iet din fwngz, hawj daengx aen ndang fouz youq najraemx. Hoeng gangj ndaej yungzheih guh hwnjdaeuj dwgrengz ha! Gou gig lau, cungj mbouj haengj lienh. boux- gyauqlienh yawj ok gij simsaeh gou, unqswnh doiq gou naeuz: “Mboujmiz couh mbouj hag, yaek hag couh itdingh yaek hag rox, bungq daengz di hojnanz ndeu couh lau, yienghneix mwngz baezlaeng bungq daengz hojnanz engq hung, mwngz baenzlawz guh ne?” Bouxgyauqlienh dingz yaep ndeu, song fwngz gaem aen mbaq gou, naeuz: “Gou siengsaenq, cijaeu mwngz miz mbei miz saenqsim laebdaeb guh roengzbae, yienghneix, mboujlwnh geijlai dwgrengz, cungj nanz mbouj ndaej mwngz!” Gou yawj lwgda bouxgyauqlienh gujli gou haenx, ngaekngaek gyaeuj. Doeklaeng, gou mbeihung dawz gyaeuj ndaem roengz raemx bae. Mwh ndaem roengz raemx, gou roxnyinh seiqhenz miz raemx at aen rwz gou in dangqmaz, gou youq ndawsim siengj: Dingj youq! Dingj youq! Laebdaeb dingj roengzbae couh hingz! Mbat ndeu、 song mbat、sam mbat…… Gou rox ndaem raemx lo, seizneix gou ndaej youq ndaw raemx mbaetheiq seiqcib miux lo!

Doeklaeng, youq mwh hag youzraemx, gou lij bungq daengz haujlai hojnanz, gou cungj baenz yiengh baenz yiengh haekfug gij hojnanz neix.

Youzraemx yiengh yindung neix, daengz seizneix gou gaenq laebdaeb youz roek bi lo. De mboujdan ndaej hawj gou ndang cangq, lij hawj gou rox gij youqgaenj “itcig cungj guh mbouj cuengqsoeng.”

(Gyanghsuh Suhcouh Si Swhsanh Sizyen Yozyau Fu Swjyenh)