Dangjcunghyangh yinghmingz,
Dingh ok cawz fujbai,
Daengx guek cungqvunz lai,
Hai fwen danq dangj cingz.
Cunghyangh roengz gietsim,
Gyimh(gven) cawz boux damguen,
Coemj(gaeb) ndi liux ndi cuengq,
Hawj biengzbingz anningz.
Lwgminz seih gyanghsanh,
Gyanghsanh dwg lwgminz,
Dam’aeu cienz lwgminz,
Bietdingh gyimh(gven) haeuj coek.
Lwgminz da ceiq raeh,
Byawz hawj guen luenh hengz,
Guhguen gaej luenh mengx,
Deng hwnj dondouzdaiz(daiz gyaeuj-
doek).
Lwgminz ceiq miz gienz,
Lwgda cienq ceiq soem,
Boux damguen biet coemj,
Mbouj baen guen hung’iq.
It soengq cienz mwngz daix,
Ngeih soengq laex cungj aeu,
Hainduj ngeix goj mbaeu,
Nanz comz daeuj miz soq.
Yied ngoenz ndaej yied lai,
Daix ndaej fanh laeb fanh,
Yied ndaej sim yied dam,
Soh cam ndaej cij banh.
Haeuj siujlaeuz bae gwn,
Ninz aeu lwgsau buenx,
Mbat yaeux(hai) ngaenz fanh cienz,
Sau yiemz naeuz lij noix.
Sai bau(aeu) yah vunz bak,
Mbwk ciengx youx baenz bueng,
Byawz guh neix dangguen,
Biengz bouxlawz ndi haemz.
Vihliux ndaej gij cienz,
Cienmonz guh yienghneix,
Siuhsaj youq lajseiq,
Ngoenz mbei saenzdiddid.
Damcienz ndaej baenz bueng,
Cang ndaw ciengz bae caeu,
Vat ndaw namh bae yaeuq,
Ndaw saeu lai onjmaenh.
Yaek naemj youq yiengz gyaiq,
Wnggai guh sim cingq,
Cienz vunzlai gaej ning,
Ndawsim ngeixfawhfawh.
Faplwd mwngz mingz rox,
Caih iethoz hawj raemj,
Sim byawz yienghneix naemj,
Lwg nyied daemj saeu dai.
Seng ndi daiq cienz daeuj,
Dai byawz aeu ngaenz bae,
Dam aeu gag ndaej nyaez,
Bouxlawz bae coh mwngz.
Faexdog mbouj baenz ndoeng,
Goengdog ndi baenz vunz,
Gwn daenj guen baen yinz,
Lwgminz bouxboux gingq.
Guhsaeh gaej doeklaeng,
Dangguen gaej damcienz,
Okseiq gyaeu bak nienz,
Hengz sienh cungqvunz gyaez.
Dangguen guenj ngaenz bo,
Ndawhoz seizseiz nenq,
Faen ndeu gaej damnem,
Mbaengq lwed venj lajhoz.
Dang guen sim aeu ndei,
Aeu hingz ndaej biengz haenh,
Cog geq (daihvunz) ndaej bingzan,
Dauq mbanj beixnuengx angq.