Gyanghwnz laepnyepnyep, seiq- henz caemriri, naedfwn “doegdoeg dagdag” doek youq gwnz aen congh- cueng, aen sim gou luenhhubhub, gij simnyap ndawdungx mbouj rox caeuq bouxlawz gangj.

Naemj mbouj daengz aenvih coenz vahriu ndeu, hawj mwngz fatheiq. Mwngz naeuz gou gangj gij vah de, ciuh vunz neix cungj mbouj caiq naemj caeuq gou miz gijmaz gvanhaeh, ngoenzneix daengz baez- laeng caeuq gou doxliz gyae’gyae bae. Coenz vah mwngz neix sawj gou youh in youh dot.

Gou mbouj rox dauqdaej dwg gangj loeng coenz vah lawz, mwh mwngz leh sam coenz vah gou okdaeuj le gou cij rox mwngz dwg vih gij vah yienghneix hozndat. Gou doeksaet, gou caen naemj mbouj daengz lumj mwngz gangj yienghneix. Gangj caen, naemj mbouj gvaq, doiq doengh boux vunzlai mbouj miz aensim yienghneix, doiq mwngz engq mbouj miz. Gou caen ngeix mbouj daengz baenzneix, gvaiq couh gvaiq gou bingzciengz gangj vah mbouj lamx bak, ngeix naeuz raeuz songboux naemj gangj gijmaz couh gangj gijmaz, hix mbouj ngeix daengz gamjsouh mwngz. Seiz- neix vah gangj ok bak, hix mbouj ndaej sou doxdauq lo, roxnaeuz loeng hix mbouj ndaej gib gvaq, cij ndaej gouz mwngz hozroengz caeuq yienz- liengh gou.

Seizneix gaenq dwg byonghhwnz caemriri, lwgda gou baenzhwnz cim dwk aen mingzcoh veihsin mwngz, mingzcoh cungj dwg ngaeuzndang mwngz, moix mbat bit veh cungj dwg najriu mwngz, fwngz youq gwnz bingzmuq soujgih veh bae veh dauq cungj dwg gij heiqhom mwngz, yinhyoz yiengj hwnjdaeuj cienzbouh dwg sim diuq mwngz. Gij geiqloeg baihndaw veihsin hix bienq hoengq, ngamq muengh mingzcoh mwngz vaiq ndongq hwnjdaeuj, hoeng diemj hoengz mingzcoh mwngz daengz seizneix itcig mbouj raen rongh okdaeuj, caj haujlai nanz hix mbouj nyi gij sing hawj gou gikdoengh hwnjdaeuj. Gou mbouj rox mwngz dwg mbouj dwg lij hozndat dwk gou, roxnaeuz dwg mwngz ninz ndaek lo. Raiz haujlai vah ndawsim youq bingzmuq baihndaw soujgih yaek fat okbae hawj mwngz hix dingz roengz- daeuj, gou lau nyogluenh daengz mwngz, youh lau gangj mbouj deng le caiq hawj mwngz hozhwnj, raiz haujlai haujlai vah, raiz youh cad, cad youh raiz, doeklaeng daengz soujgih rongh daenghoengz hwnjdaeuj, dienh yaek liux lo, gou cij buet bae ra sienq daeuj cungdienh.

Gou mbouj rox yienghlawz guh cij baenz, ninz youq gwnz mbonq doeknaiq linlin lumj yaek dai bae nei, lwgda ngiengx yawj gwnz benj, aen daeng gwnz benj ronghsagsag, gij ronghdaeng hix lumj riu gou nei. Yienghneix souciengz couh dwg gangj vah mbouj gvaq ukgyaeuj ba?

Fwn mbouj rox seizlawz dingz lo, mizseiz dingqnyi sing ci gvaq loh ninghumhum, lumj yaek dawz raq fwn haemz neix daiq bae dieggyae nei.

Hoeng, gij fwn ndawsim gou cungj doek mbouj dingz, fwn doek cucu caca, mbouj dingz mbouj duenh, fwn haemz lae gvaq sim gou, ndawsim rimrwd, dumh haeuj sim gou.

Youq ndaw haij baihgwnz, miz aen ruz ndeu riengz rumz mbinyagyag. Dwg mwngz lwi? Dwg mwngz dauq lwi? Raemxhaij hwnjhwnj roengz- roengz, aen ruz mbinyagyag, mbouj rox de yaek bae rox dauq, lumjnaeuz gig gaenh youh lumjnaeuz gig gyae, naemj iet fwngz cij ndaej daengz, hoeng gijmaz cungj gaem mbouj ndaej. Raemxhaij heurikrik hix mbouj rox geijlai laeg, gou mbouj rox swhgeij miz mbouj miz rengz youz gvaqbae ra mwngz, seizneix muengh miz rumz daeuj hojlienz gou, soengq mwngz daeuj daengz henzndang gou, yienghneix ndaej bw? Hoeng rumz cungj dwg mbouj dingh fuengyiengq, naemj ci gvaq lawz couh ci gvaq lawz, ngoenzlawz cijndaej daiq mwngz daeuj daengz henzndang gou.

Gou byaij youq baihhenz aenhaij, muengh aen ruz gyanghaemh dauqma. Baihgwnz sadan miz haujlai duz- saebuengz, duzsaebuengz yaenq ok ngaeuzndang mwngz gyaeulili, gou mbouj rox duz lawz cij dwg mwngz, gou baenz duz baenz duz gip hwnj yawj, youh baenz duz baenz duz cuengq roengzbae, duzduz dwg mwngz, youh duzduz cungj mbouj dwg mwngz. Raemxhaij cung gvaq sadan, ra mbouj raen rizdin mwngz, gou baenz yamq baenz yamq byaij, naemj yaek ra yienghsiengq mwngz, hoeng raemxhaij dawz gij rizdin cung gvaqbae mbouj raen gijmaz lo. Gou ninz youq gwnz sadan, ngeix daengz gij unqswnh gaxgonq mwngz, raemx- haij youh cungca gvaqdaeuj, cung dwk ndang gou nitriri, sim riengz raemxhaij hwnjhwnj roengzroengz, ukgyaeuj hoengqliuliu, ngiengxgyaeuj yawj aen mbwn, ndaundeiq ronghriri, aen’aen dwg mwngz, aen’aen youh mbouj dwg mwngz.

Miz vunz naeuz, aenbaez ngeix boux vunz ndeu couh bae cam ronghndwen, ndigah gou unqswnh cam ronghndwen, hoeng ronghndwen hix mbouj dap gou.

Gou daj ndaw loq ndiu singj seiz, ranz yaek rongh lo, gij laeuz sang giz gyawj giz gyae daeng ndongqbyitbyit, yied nanz yied lai, youh yied nanz yied myoxmywd, gou muengh bae ngeix dauq, caj baenz hwnz cungj muengh mbouj ndaej mwngz okdaeuj leix gou.

Cungj naeuz bae gyae couh mbouj cam ngoenzlawz dauqma, hoeng sim gou ngeix mwngz, mbouj ndaej mbouj cam. Gou ciuqgaeuq naengh youq sadan, caj raemxhaij cung swiq song din gou, caih rumzhaij boq daengxndang gou, gou youq caemriri ngamq muengh aen ruz de dauqma.

Yawj bae yawj dauq, youq daeng rongh baihde, yienghlawz cungj yawj mbouj raen mwngz. Ciuhvunz neix gou mbouj ndaenq caeuq mwngz roxnaj, doekroengz ndaw namhboengz bae hix nyienh gyaez mwngz, mwngz youq gizlawz gou couh youq gizde, ciuhvunz neix deq mwngz, muengh mwngz dauq daengz henzndang gou.