Sam nyied sam it bi it baez haenx ciuqgeiz daeujdaengz lo, neix youh dwg aen cietheiq hawj vunz nanzlumz ndeu.

Moix bi liggaeuq sam nyied cosam, vunz Bouxcuengh raeuz yaek youq gwnzbo eufwen diuqfoux, gwn gijgwn ndeigwn, hoenghhwd angqhoh aen cietheiq youqgaenj neix.

Sam nyied cosam haetde, gou daenj hwnj buhvaq conzdungj Bouxcuengh daxmeh cawx hawj gou haenx, daenj haiz hau moq, aemq hwnj daehsaw, sam yamq gyoeb guh song yamq buet bae hagdangz, camgya gingqhoh ciet fwen sam nyied sam. Ndaw hagdangz gyoengq doengzhag cungj daenj gij buhvaq conzdungj Bouxcuengh, fwngz gaem luzswngh din riengz cezcou diuqfoux, daihgya itheij diemheiq gij hoengheiq singjsien haenx. Ndaw hagdangz cungmuenx sing riu, lumj sojmiz vunz cungj lumz le seizgan nei.

Youq gwnz ciet fwen, dou cimz haujlai gijgwn ndeigwn gyoengq lauxsae caenfwngz guh haenx, miz nohcaj、haeuxnaengj haj saek、faengx daengj, neix cungj dwg gijgwn ndeigwn conzdungj Bouxcuengh raeuz. Moix cungj gijgwn cungj dwg feihdauh daegbied, heiq rang coemj ndaeng. Gou daegbied maij gwn faengx henjrwdrwd haenx, ndaw faengx bau miz haeuxcid niu youh hom, caiq gya di nohhamz caeuq lwgduh, ndeigwn dangqmaz.

Hoeng ceiq hawj gou nanzlumz dwg eufwen. Moix baez daihgya daihsing ciengq gij fwen gig sug haenx, gou gamjsouh daengz le gij meiliz vwnzva Bouxcuengh. Sing fwen youq ndaw hagdangz rwenz, hawj vunz vaiqvued, caeuq gyoengq doengzhag itheij eufwen, gamjsouh daengz sim’angq youh miznaj.

Aen ciet neix hawj gou engqgya haeujlaeg liujgaij gij vwnzva conzdungj Bouxcuengh raeuz. Moix baez dwen daengz aen ciet neix, gij simcingz gou cungj dwg gikdoengh youh angqyangz.

Ciet fwen sam nyied sam Bouxcuengh hawj gou gamjdaengz miznaj caeuq vaiqlag. Gou miz saenqsim, mboujlwnh youq gizlawz, vwnzva ceiqndei Bouxcuengh raeuz cungj ndaej genhciz cienzciep caeuq hungzyangz roengzbae.

（boux lauxsae son’gyauq: Veiz Yungjgyah/韦永佳）