Muengh ha muengh ha…… Muengh ndaundeiq, muengh rongh- ndwen, gou cungjsuenq muengh daengz aen ciet raeuz—— sam nyied sam lo.

Liggaeuq sam nyied cosam dwg ngoenzciet yinzminz Bouxcuengh. Dingq bouxlaux gangj, aen ciet neix dieg Bouxcuengh raeuz hix heuh guh “rongzcehndoi”, roxnaeuz “rongzceh”. Ngoenzde daihgya ok doengh bae ciengq go, ndigah hix heuhguh “ciet hawfwen”. Yienghneix ndaw ciet cungj noix mbouj ndaej eufwen, ciengzmienh daegbied nauhyied.

Hagdangz dou moix bi cungj yawjnaek sam nyied sam aen ciet neix. Moix bi ngoenzde cungj banh gak cungj gak yiengh hozdung. Daegbied dwg hagdangz dou sonhag Cuengh Gun song saw vah le, ndaej daengz baihgwnz ngaenzcienz fuzrex, hozdung engq lai engq miz yinxdaeuz lo.

Ngoenzde haetromh, gou daenj ndei buhvaq conzdungj Bouxcuengh, din daenj gouh haiz hau, aemq daehsaw, doq saet doq ciengq go buet bae coh hagdangz. Caj gou daengz doulaux hagdangz couh raen gij ciengzmienh ndaw hag angq lumj raemx goenj nei, nauhyied dangqmaz. Gyoengq doengzhag sam boux baenz bang, song boux guhdoih comz youq giz ndeu, bingzlwnh gij daegdiemj buhvaq minzcuz gyaeundei dou daenj haenx, sing goenjhuhu lumj yaek dawz aen ranz bongj bae nei. Gou hix gyahaeuj gyoengqde doxlwnh.

Yaep ndeu, gvangjbo hagdangz yiengj hwnjdaeuj, heuh gyoengq doengzhag bae cauhcangz doxcomz. Gyoengq doengzhag baenz ban baenz ban baizdoih ndei le, yaucangj gyauh- dai ngoenzneix miz gijmaz cezmuz, baenzlawz baen cuj, lij yaek re ancienz daengj, yienzhaeuh gak cuj hai guh hozdung：Miz diuq foux- faexsaux、ringx gvaengzdiet、bau aendom daengj, lijmiz ciengq go 《Gvangjsih Ndeidihya》、 habciengq《Fwen Gingq Laeuj Bouxcuengh》 《Docih Lo》daengj. Aen ban dou diuq fouxfaexsaux, daihgya ciuq diuz faexcuk yiengj “goeg goeg” miz gvilwd diuq ndaej gig angq, gij buhvaq gyaeundei dou, youq ndaw diuqfoux dawzbanj haenx yienhndaej daegbied gyaeundei, daengx aen cauhcangz couh lumj suenva hai rim va nei, gyaeundei raixcaix!

Hozdung lai cungj lai yiengh guhsat le, ciep roengzdaeuj couhdwg gijgwn Bouxcuengh baij okdaeuj. Gwnz daiz baij rim gak cungj gak yiengh gijgwn ndeigwn: Nohcaj、haeuxnaengj hajsaek、faengx henjgim daengj. Gijgwn lai cungj lai yiengh, gak miz daegsaek, hawj vunz louzlienh lumz dauqma. Ndawde, gou ceiq haengj gwn haeuxnaengj haj saek. Haeuxnaengj haj saek naengj cug le, heiq hom saek gyaeu, gizgyae nyouq daengz couh hawj vunz myaiz rih. Hagdangz cujciz lauxsae bingz ciengj. Dou doq ngonz doq cimz, bouxboux cup bak “gyob gyob”, ndawsim van lumj dangz. Ngoenzde gyanghaet banringz cungj miz cezmuz, gyoengq doengzhag cungj guhcaemz mbouj mbwq……

Sam nyied sam ngoenzde, dou gvaq ndaej gig simhai, neix dwg aen ciet nanzlumz ndeu. Gyo’mbaiq dangj gvansim lwgminz Bouxcuengh! Miz dangj lingjdauj cij miz gij saedceij vuenyungz ngoenzneix! Baenaj dou itdingh aeu roengzrengz doegsaw, guh ok cingzcik ndei daeuj bauqdap aen dangj!

（boux lauxsae son’gyauq: Lungz Dwngzginh/龙腾军）