Doenghbaez, miz aen maenzdoengzlingz luenz- lulu ndeu, de deng ndaem youq ndaw namh.

Maenzdoengzlingz gag siengj: Gou daengx ngoenz youq ndaw namh laepraurau youq, aen seiqgyaiq baihrog dwg maz yiengh ha? Gou itdingh okbae yawjyawj dwg yiengh lawz cij ndaej! Yienghneix, de byoengq ok caengz namh nanwt gwnz gyaeuj, daeujdaengz seiqgyaiq baihrog, hainduj byaij diuz loh bienqvaq geizheih ndeu.

Maenzdoengzlingz ringx ha ringx ha. Ringx dwk ringx dwk, deng boux canghdwknyaen ndeu gip dawz lo. Canghdwknyaen siengj: Aen maenz- doengzlingz neix baenzneix luenz, dawz ma ranz caeuq lauxbaegnding aeuq gwn ba. Canghdwknyaen ma daengz ranz, swnhfwngz dawz maenzdoengzlingz cuengq gwnz daiz. Swnh mwh canghdwknyaen bae ranzdajcawj ra lauxbaegnding, maenzdoengzlingz yat hwnj gwnz daizcueng, daj gwnz cueng hai doucueng haenx diuq roengz gwnz diegnywj baihrog bae.

Maenzdoengzlingz laebdaeb ringx ha ringx ha. Ringx dwk ringx dwk, deng duz ma ndeu gip ndaej lo. Lwgma siengj: Yienznaeuz gou mbouj rox neix dwg gijmaz, hoeng dawz de daeuj dangq aen giuz guhcaemz itdingh gig mizyinx. Yienghneix, lwgma dawz maenzdoengzlingz dingj hwnj byonghmbwn bae, youq mwh de yaek doek roengzdaeuj caiq dingj hwnjbae. Maenzdoengzlingz ginglig baez youh baez mbin hwnj doek roengz yaek dai bae lo, naj cungj beg liux. De ciedmuengh hemq naeuz: “Vaiq cuengq gou roengzdaeuj, gou lau lai lo!” Duz ma guhcaemz miz di yeq lo, fan mbat ndang ndeu, aeu aen dungx ciep dawz maenzdoengzlingz, caeuq de doxbiek lo.

Maenzdoengzlingz laebdaeb ringx ha ringx ha. Ringx dwk ringx dwk, youh deng boux nungzminz guh nazreih ndeu gip ndaej lo. Nungzminz siengj, maenzdoengzlingz baenzneix fag, wnggai dwg ceh ndei, gij maenzdoengzlingz aeu de ndaem okdaeuj haenx haengjdingh youh hung youh luenz, itdingh gai ndaej gyaqcienz. Yienghneix, nungzminz dawz maenzdoengzlingz ndaem youq suenbyaek ranz de.

Maenzdoengzlingz siengj: Saedceij ringx bae ringx dauq youh miz maz yiyi ne? Moix aen sengmingh cungj miz gizdieg haeuj bonjfaenh. Namh ndaem cij dwg gizdieg sengmingh mbouj dingz mbouj duenh gou. Mwh seizcou daeujdaengz vihliux hawj vunzlai sou ndaej engqlai maenzdoengzlingz, youq ndaw namh vih vunzlai guh di gung’yen ba!

(Sanhdungh Swngj Cinghdauj Si Dungzanh Lu Siujyoz seiq nienzgaep Vangz Nenyuz)