Moix boux vunz cungj miz seiziq swhgeij, cungj miz saeh mizyinx seiziq hawj vunz nanzlumz.

Geiq ndaej miz baez ndeu, gou siengj rox swhgeij maj mbouj maj sang, couh siengj daengz aen banhfap “ndei” ndeu: Ra go faex ndeu, caiq aeu gonj bitgeiqhauh ndeu, moix bi aeu bit veh ndang sang swhgeij youq gwnz faex, yienghneix couh ndaej doxbeij bouh- faenh maj sang haenx. Gou aeu go faex veh ndang sang haenx dingh youq go faexmakdoengj ndeu, gou ndwn youq gwnzdieg, sijsaeq rau ndang sang swhgeij, yienzhaeuh siuj- sim aeu bit youq gwnz faex guh ndei geiqhauh.

Gou ndawsim cungj maqmuengh yawj ndaej raen bonjfaenh baenz di baenz di maj sang, hoeng doeklaeng sawj gou gig saetmuengh. Couh yienghneix gvaq le song bi, gou raen gou mboujdanh mbouj maj sang, lij beij gaxgonq veh gij geiqhauh haenx lij daemq haujlai, yawjraen gijneix gou hainduj mboujonj lo, aen sim lumj duz douq nei luenh diuq, nyaenx mbouj ndaej siengj: Gou gvaqlaeng dwg mbouj dwg yied maj yied daemq、yied maj yied iq, doeklaeng lienz daxmeh hix yawj mbouj raen gou ne? Dwg mbouj dwg deng duz meuz duz ma gwn ne? Dwg mbouj dwg deng bouxwnq caij roengz ndaw namh bae benz mbouj hwnjdaeuj ne? Gou siengj daengz gijneix couh lau yaek dai, ganjgip buet ma ranz ra daxmeh, lwgda aeng raemxda cam naeuz: “Meh, vihmaz gou yied maj yied daemq ha?” Daxmeh dingq le bae naj godoengj yawjyawj le, heux gofaex gien youh gien, sawqmwh, de riuhaha hwnjdaeuj, riu ndaej raemxda cungj rih okdaeuj lo, gvaq yaep ndeu cij dingz roengzdaeuj, de naeuz: “Mwngz caen dwggyaez ha, mwngz mbouj maj daemq law, mwngz dwg menhmenh maj sang, gofaex hix maj sang ha, maj ndaej beij mwngz lij vaiq di.” Sou yawj, gienh saeh neix dwg mbouj dwg gig mizyinx ne?

Seiziq moix boux vunz cungj miz di goj mizyinx ndeu, lumj: Dawz bwnda daeq bae ha, bang vunznae swiq ndang ha…… Seizneix, ndwenngoenz seiziq gaenq menhmenh bae gyae lo, hoeng doenghgij saeh mizyinx seiziq gou itdingh baenz yiengh baenz yiengh geiq youq ndawsim.

(Gyanghsuh Suhcouh Swhsanh Sizyen Yozyau Cau Sienghhanz)