171. Cam:

Gou cam mwngz beix ha,

Gaiq maz gvej dai fouz?

Gou cam mwngz beix ha,

Gaiq maz mou dai raq?

Hoiz:

Vunz cien haj nyeqngeq,

Gaiq de gvej dai fouz,

Rinbaenz youq haenz dou,

Gaiq de mou dai raq.

172. Cam:

Gou cam mwngz beix ha,

Gaiq maz yiengz song naj?

Gou cam mwngz beix ha,

Gaiq maz max song rieng?

Hoiz:

Lwggyoux venj laeng ciengz,

Gaiq de yiengz song naj,

Vunz gyaeb sai yuhyaz,

Gaiq de max song rieng.

173. Cam:

Gou cam mwngz beix ha,

Gaiq maz namh rox mbin?

Gou cam mwngz beix ha,

Gaiq maz rin rox gangj?

Hoiz:

Vunz dawz rauq haep loengh,

Gaiq de namh rox mbin,

Aekex heuh congh rin,

Gaiq de rin rox gangj.

174. Cam:

Gou cam mwngz beix ha,

Gaiq maz mboq raemxyaem?

Gou cam mwngz beix ha,

Gaiq maz gaeng gyaeuj mbiengj?

Hoiz:

Batdangh youq laj yiemh,

Gaiq de mboq raemxyaem,

Rokvad roengz bae ndaem,

Gaiq de gaeng gyaeuj mbiengj.

175. Cam:

Gou cam mwngz beix ha,

Gaiq maz roeg gwn hoi?

Gou cam mwngz beix ha,

Gaiq maz roix naeng diet?

Hoiz:

Vunz ndaem naz boegboeg,

Gaiq de roeg gwn hoi,

Vunz cang deih gwnz ndoi,

Gaiq de roix naeng diet.

176. Cam:

Gou cam mwngz beix ha,

Gaiq maz roengz mou ndaem?

Gou cam mwngz beix ha,

Gaiq maz daemj faiq reh?

Hoiz:

Feiz dawz ndoi baenz gumh,

Gaiq de roengz mou ndaem,

Mangzem daengj bihbaengz,

Gaiq de daemj faiq reh.

（25）