Bineix gouj nyied co’gouj, gou bae ranzcoj caeuq daxbuz gvaqciet.

Daxbuz gou bineix goujcib bi lo, de ndang lij gaenj, gwn ndaej byaij ndaej mbouj miz gijmaz naetnaiq. Hoeng de mbouj gyaez daeuj ndaw- singz riengz dou youq, gag boux dog youq ranzcoj, dou bae ranz heuh de, de cungj naeuz:“Seizneix lajmbanj yienghyiengh miz, gizgiz moqsaksak, caeuq ndawsingz hix ca mbouj geijlai, caiqgangj lajmbanj hoengheiq singj- sien, gou bae ndawsingz youq mbouj gvenq .”

“Mbouj miz Gungcanjdangj, couh mbouj miz Cungguek moq……”

Gwnhaeux sat, caeuq daxbuz gangj goj yaep he le, gou couh caeuq daeglwg byaij ok rog bae youz, sawqmwh dingqnyi gij sing yinhyoz neix daj gyangmbanj cienz gvaqdaeuj.

Gou baez doeksaet yat, gag naemj: Gaxgonq ndawmbanj haeuj- haemh cungj dwg caemnyamnyam, seizneix baenzlawz yienghneix ndwet hwnjdaeuj ni?

Gou ganjvaiq buet gvaqbae, naemj vaiqdi yawj baez cingqdangq ndeu.

Gyang mbanj ngamq guh baenz aen giuzcangz moq ndeu, henz giuz- cangz cang miz lohdaeng, mbwn laep le lohdaeng ronghsaksak, gyaeuj giuz- cangz laeb miz daizheiq, gyoengq beixnangz、 gyoengq nuengxliuz cingq youq gyang giuzcangz gaen yinhyoz diuqfoux.

Mehsauj he raen gou daeuj- daengz, byaij gvaqdaeuj yiu gou naeuz:“Dahnuengx, mwngz ngamq dauq ha, gvaqdaeuj caeuq dou diuqfoux vei?”

“Gou mbouj rox diuqfoux ni.” Gangj sat coenz vah neix, aen naj gou fwt nding lo, gou vunz youq ndawsingz doiq boux lajmbanj naeuz mbouj rox diuqfoux, saetlaex la.

Laxlawz gaenh bi neix daeuj lajmbanj ndwenngoenz yied daeuj yied ndei lo, banhaemh, gyoengq vunzmbanj gwnhaeux liux le couh okdaeuj diuqfoux guh’angq. Miz fwen naeuz:

Banneix seizdaih moq,

Gungzhoj bae mbouj dauq,

Gungcanjdangj lingjdauj,

Lauxnyaeq cungj angqyangz.

Gaxgonq mbanj dou ranz youq rwix, gwndaenj hoj, diuz roen haeuj mbanj roennamh youh gumzgamz, baez doek fwn, gwnz loh couh mbaeq- mbatmbat, miz ci gwih hix dwgrengz.

Haujlai bi gonq seizhah, ngamq doekfwn, goeng Vangz Laujbingj ranznden gou gwih ci bae cawx byaek, loh boengz mbouj ndaej gwih ci, hoeng Vangz daxgoeng euq gvaqbae, ci baez raeuz, laemx roengz lo, aen ndangdaej de boemz youq gwnz ngauq rin hung henz loh, aen gyaeuj de hix daemj deng rin, lwed boqfafa, gyoengqvunz raen le couh naeuz aeu bae yihyen yw. Hoeng ranz de mbouj miz cienz bae yw, Vangz daxgoeng soh ninz youq gwnz mbonq caj dai.

Ngoenz ciemh ngoenz gvaqbae, gij bingh Vangz daxgoeng yied daeuj yied naek, lwglan de ra roen byaij mbouj cawq, ciengzseiz caz mbouj siengj, haeux mbouj rang, gvaqlaeng gyoengq vunzmbanj yawjraen yiengh- neix, bouxboux gien cienz soengq hawj de, seizhaenx ranzranz gungzhoj, yienznaeuz bouxboux miz sim bang de, hojsik geubuh dinj lai——sim naemj ganq mbouj daengz. Gvaqlaeng cienz- yw vanzlij mbouj gaeuq, daxgoeng couh gvaqseiq lo.

Seizneix diuz roen ranzmbanj dwg roensuijniz sohrwdrwd, bingz- cwtcwt, ok dou couh ndaej naengh ci, fuengbienh lai lo.

Lajmbanj saedhengz le dox- gap ywbingh baujyiemj, vunzmbanj ywbingh couh mbouj you mbouj miz cienz lo.

Ndawmbanj, Huz daxbuz baenz bingh cihgi’gvanjyenz, bingh yied ngoenz yied naek, seizlawz dai bae cungj gangj mbouj cinj.

Ngoenz ndeu, Huz daxbuz naeuz yaek ngunh laemx youq gwnznamh, aenvih de mbouj miz cienz bae ywbingh, cij ndei laepda saesae ninz youq ndawranz, vunz ndawranz youq henz mbonq souj, cungj muengh de vaiqdi singj gvaqdaeuj .

Cingq youq mwhneix, boux ranz- nden ndeu gipmuengz buet haeuj- daeuj naeuz:“Vaiqdi soengq Huz daxbuz bae yihyen ha! Gaej caj dem la!”

Huz boh’au gangj: “Ranz dou mbouj miz ngaenz ha!”

Ranznden naeuz:“Mbouj youq- gaenj, raeuz miz hozcoz yihliuz, ndaej bauqsiu.”

Goeng’au baez dingq, lienz- muengz heuh ci daeuj aeu Huz daxbuz soengq bae yihyen.

Gvaq cib lai ngoenz, Huz daxbuz bingh ndei lo, hix mbouj yungh bae geijlai ngaenz. De ok yihyen ma daengz ranz, gikdoengh ndaej raemxda cungj doek roengzdaeuj. De bungz vunz couh naeuz:“Gungcanjdangj caen ndei, danghnaeuz mbouj miz aen cwngcwz ndei neix, gou couh bae gyaeujreih youq lo, caeuq duzndwen guh baengzyoux lo. ”

Lajmbanj saeh ndei saeh moq gienh ciep gienh, gienhgienh sawj gou doeksaet, gienhgienh sawj gou gamj- doengh.

Raeuz saenq, miz Gungcanjdangj daiq roen, ngoenzcog guekgya engqgya fouqgiengz, lajmbanj engqgya gyaeu- ndei, vunzmbanj engqgya fouqmiz.