Gou gyaez moix ngoenz gyanghaet. Singgo rwenz- rwz duzroeg heuh gou ndiu daeuj, byaengq lwgda moengzloengz, ndit gyanghaet ronghsag, rumz iq liengzsangj, hoengheiq singjsien, vih gou hainduj ngoenz gyaeundei ndeu. Youq daxgoeng daengngoenz coi gou lajde, gou hainduj lienhndang lo: Swix sam gien, gvaz sam gien, aen hoz niujniuj, aen gyaeuj bibi, yawj byoemheu gou geijlai mwn; ietiet ndang dikdik ga, gaenxguh diemheiq hung, yawj ndang gou geijlai maengh……

Gou gyaez moix ngoenz banngaiz. Daxgoeng daengngoenz fwngz raeujrub lumh gyaeuj gou, hawj gou ndaejdaengz naengzliengh yungh mbouj caenh. Daxmeh daihdeih dawz yingzyangj fungfouq soengq hawj gou, sawj gou ndaej haenqrengz maj ha maj ha, gangj mbouj dingh ngoenz lawz, ndaej caeuq fwjhau doxbungq ne. Noucoengz diuqbeiz youq gwnz ndang gou saet bae saet dauq, lumj bang gou gaeu humz, youh lumj bang gou nyaenxndang, cwxcaih dangqmaz! Roegvameiz、roegvenz、roeggacak, doengh gij roeg neix, mbouj dwg cici caca ciengq mbouj dingz, couh dwg bubu gyaep bae gyaep dauq. Laegraeh lai lo! Mboujgvaq, noix doenghgij lwg diuqbeiz neix, aen ndoeng hunggvangq neix couh mbouj yienghneix hoenghhwd lo! Duzndwen gaenxgyaek nyaengq byongh ngoenz lo hix mbouj haengj yietnaiq, lij gaenxgyaek bang gou soeng namh.

Gou gyaez moix ngoenz vaiqhaemh. Daxgoeng daengngoenz bienqbaenz boux canghdajveh ndeu, de dwk boek aen buenzdiuzsaek, aeu ndoengfaex nyumx baenz hoengzhoengz henjhenj. Byoem gou bienq lo, lumj fouzsoq duz cinglingz iq youq gwnzde diuqyat, yubyab gij rongh mumjgyumq; va laj din bienq lo, buhraiz gyaeundei vuenh le geu youh geu, lumj youq gwnz daiz biujyienj nei; diuz rij henz gou bienq lo, raemxrij yubyab saek henjnding lwenqda dangqmaz. Mbouj dwg bw, de mbouj dan cij dwg gij saek neix, lij miz ndaw saeklamz daiq miz saekmaeq、ndaw saekheu myigmyanz saekgim…… Haujlai saek gangj hix gangj mbouj okdaeuj.

Gou gyaez moix haemh gyanghwnz. Noucoengz、roegvameiz、roegvenz、roeggacak cungj haeujninz lo, ndaw ndoengfaex caemdingh haenx, yaeng’yaeng cienz daeuj singgo ndeidingq, haenx itdingh dwg yozdui ndaw ndoengfaex cingq danzciengq, rag siujdizginz haenx dwg daekdaeq, danz gizdah haenx dwg daekgaeuj, lij miz boux roq gyong dwg duzgoep…… Yinhyoz gyoengqde gaenq dwg ndaw saedceij gou bouhfaenh noix mbouj ndaej ndeu.

Gou dwg go faex ndeu, go faex bingzciengz ndeu. Gou gouz, vaiqvued gou ndaej daiq hawj sou vaiqvued; gou muengh, angqyangz gou ndaej ciengxlwenx gyaenanz……

（Fuzgen Swngj Anhhih Yenz Daih Cib’it Siujyoz Dungj Gyahgyah)