Saedceij seiziq dinjded, hoeng cungj miz song sam gienh saeh lumj fatseng youq ngoenzlwenz nei.

Geiq ndaej mwhde gou lij hwnj youwzyenz, gou daegbied gyaez youq ndaw hongh ranz daxdaiq guhcaemz, boenz gyaeq- gaeq, gaeb duzmoed…… Doxgaiq guhcaemz geq cungj geq mbouj caenh.

Miz baez ndeu, daxmeh soengq gou daengz ranz daxdaiq, gou mbat ndeu couh yawj hwnj aen raengzgaeq. Cij raen ndaw raengzgaeq miz geij aen gyaeqgaeq luenzlulu, gou sikhaek couh siengj aeu. Yienghneix, gou buet haeuj ndaw ranz aeu geij naed haeux daeuj vanq youq gwnz dieg, gyoengq gaeqmeh raen le da cungj heu lo, coemj gvaqdaeuj ciengj gwn. Dingq daxdaiq gangj de gaenq geij ngoenz lumz gueng gaeq lo. Swnh gyoengq gaeqmeh ciengj gwn, gou laeglemx haeuj ndaw raengz aeu geij aen gyaeq couh yaek buet, cingq youq mwh gou caeg riu, duz gaeqmeh ndeu coemj gvaqdaeuj, gou siengj buet cungj buet mbouj gib lo. Gaeqmeh da daengx gou, hwk dwk gou hanh cungj conh lo, de vaiqvet coemj daengz baihnaj gou, aeu aen bak soemset de dot gou, in ndaej gou hemqyaya, doeklaeng dwg daxdaiq okdaeuj gouq, gou cij deuz ndaej okdaeuj. Daj mwhde hwnj, gou moix baez byaij gvaq henz raengzgaeq, gou cungj lau dangqmaz, lau duz gaeqmeh lawz youh coemj okdaeuj dot gou.

Lij miz baez ndeu, gou ndaejdaengz geij aen gyaeqgaeq, ndwn youq henz loh cingq siengj gijmaz. Ndaw uk fwt siengj daengz: Dwg mbouj dwg gou dwkvaih aen gyaeq, gaeqlwg dwggyaez couh okdaeuj lone? Siengj daengz gijneix, gou sikhaek dawz gyaeq gveng roengz dieg bae, “gaeqlwg dwggyaez yaek okdaeuj lo!” Gou sing hung hemq sing ndeu. Hoeng ndaw gyaeq byaij okdaeuj haenx mbouj dwg gaeqlwg bwn yungzyubyub haenx, cix dwg gij raemx niunwk henjrwg. Geizheih lo, gaeqlwg ne? Doeklaeng gou cij rox, laxlawz faeg gaeqlwg dwg yaek aeu itdingh dohraeuj caeuq seizgan.

Caenhguenj gij saeh neix gaenq gvaqbae haemq nanz seizgan lo, caenhguenj mwhde deng gaeqmeh dot ndaej hemqyaya, caenhguenj gou mbouj hawj gyaeq faeg ok gaeqlwg, hoeng doengh gij saeh mizyinx neix couh lumj fatseng youq ngoenzlwenz nei, seizneix siengj hwnj cungj dwg vaiqvued!

Duenh saedceij seiziq vaiqvued neix, yaek baenz gij dauqngeix ceiq ndei gou.

(Gyanghsuh Suhcouh Swhsanh Siz- yenz Siujyoz Cwnz Yijdungz)