“A, dahcej ha, baenzneix fukcab ma!” Vangz Meijli aj bak gvangqlili, de caen mbouj saenq, Lungz lauxsae bingzseiz yiemzsuk nyinhcaen, de miz baenzlai siengjfap.

Songde doxbiek le, gag boux gag ma ranz. Vangz Meijli doq byaij doq siengj. De guhhong baenzlai hoj, ngamq daeuj aen hagdangz neix seiq haj bi, nyinhnaeuz nyinhcaen hwnj dangz son saw, miz cingzcik couh ndaej miz gihvei bingz ndaej maenh- ndei, baengh neix bae bingz cizcwngh. Hoeng ngoenzneix de dingq le gij vah Lungz lauxsae, cij roxnyinh baihlaeng liengzsumsum, de baenz- lawz hix siengj mbouj doeng, bingz baez maenhndei neix lij miz baenzlai gvicaek.

Aen gaujhwz bingz maenhndei ndaw hagdangz seizgan yaek daengz lo, cuj yijvwnz miz song aen mingzngeg. Vangz Meijli lumj duz- moed ndaw rek ndat nei. De mbouj soengq gvaq laex, lienz aen damj haeuj ndaw bangunghsiz yaucangj hix mbouj miz. Gvan de dwg boux vunz lauxsaed, mbouj gangj soengq laex lo, baez dwen daengz saeh neix, de couh mbouj doengzeiq. Neix couh maq- muengh mbouj hwnj lo, cijaeu swhgeij gag siengj banhfap.

Ngoenz daihngeih banhaemh, Vangz Meijli cawx le di makgam, caemhcaiq youq ndawde oet haeuj song cien maenz mbaw gaj guh meijyungz ndeu. De dingqnaeuz yah yaucangj ciengzciengz bae swiq naj guh meijyungz, yungh gij cienz caemh lai, baenzneix couh siengj soengq gij laex neix.

De cam rox ranz yaucangj youq gizlawz le, couh gietdingh soh bae ranz yaucangj.

Haeuj ndaw honghranz, Vangz Meijli ndawsim diuqbungbung, lumj guhcaeg nei. Laeuz hauh daih’it, laeuz hauh daihngeih…… De menh- menh geq, muengh vaiqdi ra daengz laeuz hauh daihbet.

“Vangz Meijli, mwngz bae giz- lawz ne?” Sawqmwh dingq daengz baihlaeng miz vunz heuh de, aen sing gig sug, laep lai cix yawj mbouj raen vunz. De duenhdingh, wng dwg Cinz fuyaucangj. De ngawh lo, Cinz fuyau- cangj caeuq yaucangj caemh youq doxgyawj.

Vangz Meijli ngaezngwd caez, seizneix baenzlawz guh cij ndei? De ganjgip ra coenzvah han Cinz fuyau- cangj cij ndaej. Cinz fuyaucangj cawjguenj gij saeh lauxsae bingz maenhndei baez neix. Cingq youq seizneix bungz daengz de yaek dai vunz lo, cungj mbouj ndaej lwnh de naeuz bonjfaenh bae ra yaucangj ba?

“Gou ngamq gvaq gizneix, cingq naeuz bae ranz mwngz yawjyawj ne.” Vangz Meijli naj hoengzlwdlwd naeuz.

“Aiya, mwngz mbouj yungh daeuj yawj gou, raeuz caez dwg doengzsaeh, mwngz youh gaenx guhhong, yiengh- yiengh guh ndaej beij bouxwnq ndei, miz maz saeh youq hagdangz gangj couh ndaej lo. Baez neix daeuj daengz neix couh haeuj ranz bae naengh- naengh ba.”

Songde doq byaij doq gangj vah. Byaij gvaq doiqnaj aen laeuz yau- cangj, Cinz fuyaucangj lij vix dwk lwnh de naeuz:“Yaucangj raeuz couh youq laeuz de caengz daihcibngeih.”

Haeuj ranz Cinz fuyaucangj, Vangz Meijli raen gwnzdieg coq miz haujlai doxgaiq: Laeujhau、laeujnding、ien、makgam caen lai, de miz di mbouj ndei eiqsei. Cinz fuyaucangj riu naeuz:“Haxbaenh Loz lauxsae caeuq Veiz lauxsae ngamq daeuj, dwg vih gij saeh baez bingz maenhndei neix, gou ndaej bang sou ndaej couh itdingh bang.” Lij aeu gangj maz dem, Vangz Meijli ganjgip cuengq doxgaiq roengz couh ra lijyouz dauqma lo.

Geij ngoenz gvaqbae le, gij mingzdan maenhndei ndaw hagdangz daengh okdaeuj lo, Loz lauxsae caeuq Veiz lauxsae cungj miz coh, hoeng cix mbouj miz coh de.

Vangz Meijli bungz daengz Cinz fuyaucangj couh cam de, Cinz fuyau- cangj naeuz:“Vangz Meijli a, gij saeh neix mwngz mbouj caeuq yaucangj nai gvaq ma? Ngoenzde doxyaeng byawz ndaej maenhndei, de naeuz mwngz lij coz, baez laeng cij daengz mwngz.”

Vangz Meijli baez dingq, daengx aen gyaeuj mazmwdmwd, lwgda baez laep couh daemjlaemx gvaqbae lo.

（2 sat）